༢༠༡༡ ཟླ་ ༥ ཚེས་ ༢༣ རེས་གཟའ་ཟླ་བ།
༄༅། །བཞུགས་སྒར་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༥ ཚེས་ ༡༢ ཉིན་རྒྱ་ནག་གཞུང་གིས་ཕ་ཡུལ་རྔ་པ་རྫོང་གཅའ་ཞང་། ནག་ཚང་མ་སྡེ་བའི་སྐར་མ་ཚང་གི་རྔ་པ་ཀིརྟི་དགོན་གྱི་དགེ་འདུན་བློ་བཟང་ཆོས་འཕེལ་ལགས། རང་ལོ་ ༡༩ ཡིན་པ་ཁོང་དགོན་པའི་ནང་ནས་འཛིན་བཟུང་གིས་བཀག་ཉར་བྱས་འདུག
དེ་ཡང་ཁོང་འཛིན་བཟུང་བྱས་ཏེ་ད་ལྟའི་ཆར་ས་གནས་གང་དུ་བཀག་ཉར་བྱས་ཡོད་མེད་དང། དེ་ལྟར་བྱེད་དགོས་པའི་རྒྱུ་མཚན་སོགས་ཞིབ་ཕྲའི་གནས་ཚུལ་ཤེས་རྟོགས་མེད་པར་གྱུར།
དེང་སྐབས་ཀིརྟི་དགོན་པའི་ཕྱི་ནང་ཚང་མར་དམག་མི་དང་ཉེན་རྟོག་མི་སྣ། དམིགས་གསལ་ཉེན་རྟོག་པ་བཅས་ཀྱིས་དྲག་ཆས་སྣ་ཚོགས་བཟུང་ནས་བཀག་འདོམས་བྱེད་མུས་ཡིན་པ་དང། དགོན་པའི་ནང་ལ་རྒྱུན་དུ་ཁང་ཤག་གཅིག་པའི་དགེ་འདུན་པ་ཉི་ཤུ་རེ་ཚན་པར་བགོས་ཏེ་གྲྭ་ཤག་ཁག་ཏུ་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་མུ་མཐུད་སྤེལ་བཞིན་ཡོད་འདུག་ལ། དེའི་སྐབས་དགེ་འདུན་པ་རྣམས་ལ་དྲི་རྩད་སྣ་ཚོགས་བྱས་ཏེ། གནད་དོན་མང་པོའི་ཐོག་དགེ་འདུན་པ་རྣམས་ཀྱིས་རྒྱ་གཞུང་གི་ལས་བྱེད་པའི་འདོད་པ་ལྟར་ལན་འདེབས་མ་བྱས་པར་བརྟེན། དགེ་འདུན་པ་མང་པོ་འཛིན་བཟུང་བྱེད་ཀྱི་ཡོད་ཚུལ་འདུག་ནའང་། རེ་རེ་བཞིན་ཤེས་རྟོགས་ཡོང་རྒྱུར་བརྒྱུད་ལམ་ཐམས་ཅད་བཀག་འདོམས་བྱས་ཡོད་སྟབས་དཀའ་ངལ་མང་པོ་འཕྲད་བཞིན་ཡོད་འདུག
དེ་བཞིན་རྨེའུ་རུ་མའི་རུ་ཆེན་གཉིས་པའི་རྔ་པ་ཚང་གི་ཀིརྟི་དགོན་པའི་དགེ་འདུན་བློ་བཟང་དར་རྒྱས་ལགས་ལ་དེ་སྔོན་ཕྱི་ཟླ་ ༥ ཚེས་ ༢ ཙམ་ལ་ལོ་གསུམ་གྱི་ཁྲིམས་ཐག་བཅད་ཡོད་ལ། སྐབས་དེར་ཁོང་ལ་དེ་ལྟར་ཁྲིམས་ཐག་གཅོད་དགོས་པའི་ནག་ཉེས་ནི་དེ་སྔོན་བཀག་ཉར་མ་བྱས་སྔོན་ལ་གྲྭ་ཤག་རེ་རེ་བཞིན་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་ལས་འགུལ་སྤེལ་སྐབས་ཁོང་གིས་རང་ཉིད་ཀྱི་བསམ་ཚུལ་ཇི་མ་ཇི་བཞིན་རྒྱ་གཞུང་གི་ལས་བྱེད་དང་། ཉེན་རྟོག་པ། དམག་མི་བཅས་ཀྱི་མདུན་དུ་བཤད་པ་དེས་ཡིན་འདུག་ལ། དེ་ནི་ད་ལྟའི་བོད་ནང་གི་བོད་མི་ཚོར་སྨྲ་བརྗོད་རང་དབང་ཇི་ཙམ་ཡོད་མེད་ཀྱི་དངོས་ཡོད་གནས་ཚུལ་ཞིག་ཡིན།
ད་བར་ཕྱི་ལོགས་སུ་ཡོད་པའི་གསར་འགོད་པ་མང་པོ་ཞིག་གིས་གཅིག་མཚུངས་ཀྱིས་དྲི་བ་ཞིག་དྲི་བཞིན་པ་ནི་དེང་སྐབས་རྔ་པའི་ནང་ལ་དམག་མི་ག་ཚོད་ཡོད་མེད་དེ་ཡིན་མོད། ང་ཚོའི་ངོས་ནས་ད་བར་ཡུལ་མི་ཚོས་མཐོང་སྣང་ལྟར་ཚོད་དཔག་བྱས་པའི་གྲངས་ཀ་ཞིག་བརྗོད་པ་དེ་ག་རང་ལས་གཞན་ལན་ཏག་ཏག་ཅིག་ཐེབས་མ་སོང་མོད།
ཉེ་ཆར་འབྲེལ་ཡོད་མི་ཞིག་གིས་དེང་སྐབས་རྔ་པར་གསར་དུ་ཐོན་པའི་དམག་མི་ཞིག་གི་ཁ་ནས་གོ་བར་རྔ་པའི་ནང་ལ་དེང་སྐབས་དམག་མི་ཁྲི་ལྔ་དང་ལྔ་སྟོང་བཀྲམ་ཡོད་པ་རེད་ཅེས་དམག་མི་ཞིག་གིས་བཤད་འདུག་ལ། མཐའ་གཅིག་ཏུ་དེར་རྩ་འཛིན་བྱེད་ས་ཡོད་མེད་མི་ཤེས་ཀྱང་། ད་བར་རྒྱ་ཕྱོགས་ནས་ཚུར་དམག་མིའི་གྲངས་ཀ་རག་པ་ཐེངས་དང་པོ་ཡིན་ཞིང་། གལ་སྲིད་གྲངས་ཀ་དེ་ཏག་ཏག་ཡིན་ན་ཀིརྟི་དགོན་པ་གཙོ་བོར་གྱུར་པའི་རྔ་པ་རྫོང་ཁྱོན་ཡོངས་ནས་བཀག་བསྡོམས་གང་འདྲ་ཞིག་གི་འོག་གནས་མུས་ཡིན་པ་ཧ་ཅང་གསལ་པོ་རེད།
ད་ལོའི་གསུམ་པའི་བཅུ་དྲུག་རྗེས་ནས་ད་བར་རྔ་པ་རྫོང་ཁོངས་ཀྱི་ཤང་ཡོངས་ཀྱི་འགོ་གཙོ་ཚང་མ་རྫོང་ཁག་གཞན་ནས་མི་བཏང་སྟེ་བརྗེ་བསྒྱུར་བྱས་ཡོད་འདུག་པ་བཅས། །
རྒྱ་ནག་གཞུང་གིས་ཀིརྟི་དགོན་པའི་དགེ་འདུན་བློ་བཟང་ཆོས་འཕེལ་ལགས་འཛིན་བཟུང་བྱས་པ།
གསར་གནས།
འབྲེལ་གནས།
