༢༠༡༡ ཟླ་ ༥ ཚེས་ ༡༣ རེས་གཟའ་པ་སངས།
༄༅། །བོད་ཀྱི་བདེན་དོན་ལ་རྒྱབ་སྐྱོར་གནང་མཁན་ཡུ་རོབ་སྤྱི་མཐུན་རྒྱལ་ཁབ་དང་རྒྱ་ནག་གཞུང་དེང་སྐབས་ཚོང་གི་འབྲེལ་བ་ཟབ་ཏུ་ཕྱིན་ཡོད་ཀྱང་ཡུ་རོབ་སྤྱི་མཐུན་ནང་བོད་དོན་ལ་རྒྱབ་སྐྱོར་འགྱུར་མེད་ཐོག་གནས་ཡོད་པའི་སྐོར་ཡུ་རོབ་སྤྱི་མཐུན་རྒྱལ་ཁབ་ལ་འབྲེལ་བ་གནང་མཁན་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་ཀྱི་ཕྱག་རོགས་སྐུ་ཚབ་སྐལ་བཟང་རྒྱལ་མཚན་ལགས་ཀྱིས་ཕྱི་ལོ་ ༢༠༡༡ ཟླ་ ༥ ཚེས་ ༡༢ ཉིན་གསུང་དོན། ཡུ་རོབ་སྤྱི་མཐུན་ལྷན་ཚོགས་དེ་རྒྱལ་ཁབ་ ༢༧ ལས་གྲུབ་པའི་སྒྲིག་འཛུགས་ཤིག་ཆགས་ཡོད། སྤྱིར་བཏང་ཡུ་རོབ་དང་རྒྱ་ནག་དབར་ཚོང་གི་འབྲེལ་བ་རྒྱ་ཆེན་པོ་ཆགས་ཡོད། དེར་བརྟེན་མི་མང་དག་ཅིག་གིས་ཡུ་རོབ་ལྷན་ཚོགས་ནས་འགྲོ་བ་མིའི་ཐོབ་ཐང་དང་བོད་ཀྱི་གནད་དོན་ཐོག་ཐུགས་ཁུར་བཞེས་རྒྱུའི་ཤུགས་ཆུང་རུ་འགྲོ་གི་རེད་ཅེ་སེམས་འཚབ་བྱེད་མཁན་མང་པོ་བྱུང་འདུག
འོན་ཀྱང་དངོས་ཡོད་གནས་ཚུལ་ཐོག་ཡུ་རོབ་སྤྱི་མཐུན་ལྷན་ཚོགས་དང་ལྷག་པར་ཡུ་རོབ་ལྷན་ཚོགས་ཀྱི་གྲོས་ཚོགས་ནང་རྒྱ་ནག་གཞུང་གི་ཐོག་དོ་སྣང་བྱེད་དགོས་རྒྱུ་མང་དུ་ཕྱིན་ཡོད། རྒྱ་ནག་དང་ཡུ་རོབ་ལྷན་ཚོགས་ཀྱི་དཔོན་རིགས་དེ་དག་ཐུག་འཕྲད་བྱེད་སྐབས་སྤྱིར་བོད་ཀྱི་གནད་དོན་དང་ཡང་སྒོས་འགྲོ་བ་མིའི་ཐོབ་ཐང་ཐོག་གླེང་སློང་བྱས་དང་བྱེད་མུས་རེད། དེ་བཞིན་ཡུ་རོབ་སྤྱི་མཐུན་ལྷན་ཚོགས་ནས་བློ་འཚབ་ཡོད་པའི་གནད་དོན་མང་པོ་ཞིག་ཐོག་གླེང་སློང་བྱེད་བཞིན་ཡོད། ཕྱོགས་མཚུངས་རྒྱ་ནག་ནང་དུ་མང་གཙོ་ཤུགས་ཆེ་རུ་གཏོང་རྒྱུའི་ལས་འགུལ་སྤེལ་མཁན་གྱི་རྒྱ་རིགས་མང་པོ་ཡོད་པ་དེ་ཚོའི་ཐོག་ཡིན་ཡང་དོ་སྣང་དང་རྒྱབ་སྐྱོར་བྱེད་རྒྱུའི་གནས་ཚུལ་དེ་དག་ཧ་ཅང་ཤུགས་ཆེ་རུ་ཕྱིན་ཡོད། དེར་བརྟེན་ངས་ལོ་མང་པོ་ཞིག་ཡུ་རོབ་སྤྱི་མཐུན་ལྷན་ཚོགས་ཕྱི་འབྲེལ་སྡེ་ཚན་གྱི་གནད་ཡོད་ལས་བྱེད་མང་དག་ཅིག་དང་འབྲེལ་བ་བྱས་པའི་ཉམས་མྱོང་ཐོག་ནས་ཞུས་ན། བོད་ཀྱི་གནད་དོན་ཐོག་ཡུ་རོབ་སྤྱི་མཐུན་ལྷན་ཚོགས་ནས་དོ་སྣང་གནང་རྒྱུ་དེ་ཤུགས་ཆེ་རུ་ཕྱིན་མེད་ནའང་ཆུང་རུ་རྩ་བ་ནས་ཕྱིན་མི་འདུག ཅེས་གསུངས་ཡོད།