༄༅། །ཕྱི་ལོ་ ༢༠༡༡ ཟླ་ ༥ ཚེས་ ༣༠ དང་ ༣༡ བཅས་ཉིན་གྲངས་གཉིས་རིང་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་རྟེན་གཞི་བྱས་པའི་ཡེ་ཤུའི་གཙུག་ལག་སློབ་གཉེར་ཁང་(Christ University)དུ་ཉིན་གྲངས་གཉིས་རིང་(Human Excellence Through Holistic Education)ཞེས་པའི་བརྗོད་གཞིའི་ཐོག་རྒྱལ་ཡོངས་ཚོགས་ཆེན་ཚོགས་པའི་ཐོག་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་གི་སྤྱི་ཁྱབ་ལྷོ་སྤྱི་བཀྲིས་ཕུན་ཚོགས་ལགས་ཀྱིས་གསུང་བཤད་གནང་འདུག
དེ་ཡང་ལྷན་ཚོགས་དབུ་འབྱེད་ཀྱི་མཛད་སྒོར་གཙུག་ལག་སློབ་གཉེར་ཁང་དེའི་ཉེ་བའི་རིགས་བདག་མཁས་དབང་ཐོ་མ་སེ་མེ་ཐིའུ་སི་(Thomas Mathews)མཆོག་གིས་ཤེས་ཡོན་གྱི་ལམ་ལུགས་ནང་བཟང་སྤྱོད་ཀྱི་ཤེས་ཡོན་སློབ་གསོ་དགོས་གལ་ཆེན་པོ་ཡིན་པ་དང། དེ་བཞིན་ཁོང་གིས་གནད་དོན་འདི་གལ་འགངས་ཆེན་པོར་ཚང་མས་ངོས་འཛིན་ཐུབ་པ་དང༌། བཟང་སྤྱོད་ཀྱི་ཤེས་ཡོན་སློབ་ཚན་གྱི་ཁོངས་སུ་འཇུག་རྒྱུར་ལོ་དགུ་ཙམ་འགོར་ཡོད་སྐོར་འགྲེལ་བརྗོད་གནང་ཡོད། སྐབས་དེར་ལྷོ་སྤྱིས་མཐོ་རིམ་སློབ་གྲྭ་འདིས་བཟང་སྤྱོད་ཀྱི་ཤེས་ཡོན་རྒྱུན་ལྡན་སློབ་ཚན་གྱི་ཁོངས་སུ་འཇུག་རྒྱུར་ཐུགས་འགན་བཞེས་པར་བསྔགས་བརྗོད་ཞུས་པ་དང་ཆབས་ཅིག་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེང་དུས་ཤེས་ཡོན་ལམ་ལུགས་ནང༌། གཞི་རྩའི་འགྲོ་བ་མིའི་རིན་ཐང་ངམ་རང་བཞིན་གྱི་མིའི་བཟང་པོའི་ཡོན་ཏན་གསོ་སྐྱོང་དགོས་གལ་ཆེ་བའི་རླབས་ཆེན་གྱི་དགོངས་པ་ཇི་ཡིན་འགྲེལ་བརྗོད་གནང་ཡོད། དེ་བཞིན་ཁོང་གིས་༸གོང་ས་མཆོག་གི་བཞེད་དགོངས་རླབས་ཆེན་དེ་ནི་ཆོས་ལུགས་དང་མ་འབྲེལ་བའི་མིའི་རིན་ཐང་སྟེ། བྱམས་པ་དང་བརྩེ་བ། སྙིང་རྗེ་དང་བཟོད་པ། འགྱོད་བཤགས་དང་ལེན་སོགས་གསོ་སྐྱོང་དར་སྤེལ་བྱེད་དགོས་པ་བཅས་ལ་དགོངས་ཀྱི་ཡོད་པ་སོགས་ཀྱི་གསུང་བཤད་གནང་ཡོད། ཐེངས་འདིའི་ལྷན་ཚོགས་ཐོག་གཙུག་ལག་སློབ་དཔོན་གྲངས་ ༥༤ དང་། རྒྱ་གར་རྒྱལ་ཡོངས་ཀྱི་མཐོ་སློབ་དང་གཙུག་ལག་སློབ་ཁང་ཁག་བཅུ་གཉིས་ནས་སློབ་དགེ་ཡང་མཉམ་ཞུགས་གནང་ཡོད་པ་བཅས།།