༢༠༡༡ ཟླ་ ༥ ཚེས་ ༢༦ རེས་གཟའ་ཕུར་བུ།
༄༅། །བོད་མི་མང་སྤྱི་འཐུས་སྐབས་བཅུ་བཞི་པའི་གྲོས་ཚོགས་ཚོགས་དུས་ ༡༡ པའི་ཐོག་གྲོས་ཆོད་དགོངས་དོན་ལྟར་གྲོས་ཚོགས་ཚོགས་དུས་འཕར་མ་ཕྱི་ལོ་ ༢༠༡༡ ཟླ་ ༥ ཚེས་ ༢༦ ནས་ ༢༨ བར་ཉིན་གསུམ་རིང་བཙན་བྱོལ་བོད་གཞུང་བསྟི་གནས་གངས་ཅན་སྐྱིད་གཤོངས་ཀྱི་གྲོས་ཚོགས་ཁང་དུ་བོད་རྒྱལ་ཁབ་ཆེན་པོའི་རྒྱལ་གླུ་འབུལ་བཞིན་པ་དང་ལྷན་དབུ་འཛུགས་གནང་ཡོད།
དེ་ཡང་ཕྱི་ཚེས་ ༢༦ ་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། ཚོགས་གཞོན་རྒྱ་རི་སྒྲོལ་མ་མཆོག བཙན་བྱོལ་བོད་གཞུང་གི་དཔལ་ལྡན་བཀའ་བློན་ཁྲི་པས་དབུས་བཀའ་བློན་རྣམ་པ། ཆོལ་གསུམ་ཆོས་ལུགས་དང་བཅས་པའི་བོད་མི་མང་སྤྱི་འཐུས་རྣམ་པ། སྐབས་བཅོ་ལྔ་པར་འདེམས་ཐོན་བྱུང་བའི་སྤྱི་འཐུས་རྣམ་པ། ཟུར་ཉན་པ། ལྷན་ཁང་ཁག་གི་དྲུང་ཆེ་རྣམ་པ། གསར་འགོད་པ་དང། ཟུར་ཉན་གཞན་རྣམས་བཅས་ཚང་འཛོམས་ཀྱི་ཐོག་མར་རྟེན་འབྲེལ་གསོལ་ཇ་དང་།
ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་དམ་པ་མཆོག་ལ་མྱ་ངན་གུས་འདུད་ཞུ་བཞིན་པ།
འབྲས་སིལ་ཕུལ་གྲུབ་རྗེས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་དོན། ཚང་མས་མཁྱེན་གསལ་ལྟར་དེ་རིང་གྲོས་ཚོགས་འཕར་མ་འདི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་ ༡༡ པའི་ཐོག་གྲོས་ཆོད་བཞག་པའི་དགོངས་དོན་ལྟར་ཚོགས་ཀྱི་ཡོད། ཚོགས་འདུ་འཕར་མ་ཚོགས་དགོས་པའི་རྒྱུ་མཚན་མཁྱེན་གསལ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་བཅུ་བཞི་པའི་གྲོས་ཚོགས་ཚོགས་དུས་ ༡༡ པའི་ཐོག་གསུང་འཕྲིན་སྩལ་བ་གཞིར་བཟུང་གྲོས་ཚོགས་ནང་བགྲོ་གླེང་དང་ཐག་གཅོད་རིམ་པ་བྱུང་ཡོད་པ་གཞིར་བཟུང་ཕྱི་ཚེས་ ༢༡ ནས་ ༢༤ བར་ཉིན་གྲངས་བཞི་རིང་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ཚོགས་ཏེ།
ཁ་སང་ཚོགས་བཅར་བ་ཡོངས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་པ་དེ་དག་ཚང་མའི་ལས་རིམ་མཇུག་སྒྲིལ་ཟིན་པ་རེད། ད་ལྟའི་གནས་སྐབས་སུ་གསུང་འཕྲིན་དང་འབྲེལ་བའི་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་མཐུན་པ་བཅའ་ཁྲིམས་བསྐྱར་བཅོས་བྱེད་དགོས་པའི་ལས་རིམ་དེའི་སྟེང་བསླེབས་ཡོད། དེ་དང་མཐུན་པའི་བོད་མི་མང་སྤྱི་འཐུས་ལྷན་ཚོགས་སྐབས་ ༡༤ པར་འཁྲིས་བའི་ལས་འགན་ཁག་གཅིག་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ཚོགས་པའི་ཐོག་ནས་ལས་རིམ་ཚང་མ་འདོད་བློ་ཁེངས་པ་ཞིག་དང། དེ་ལྟ་བུའི་གཟི་བརྗིད་ལྡན་པ། ལོ་རྒྱུས་དང་ལྡན་པ་ཞིག་ཐོན་ཡོད་པ་ནི་ང་ཚོ་ཚང་མས་ཤེས་ཀྱི་ཡོད། དེ་ནི་བོད་མི་མང་སྤྱི་འཐུས་ལྷན་ཚོགས་ལ་བསྐུར་བའི་ལས་འགན་གྱི་ཆ་ཤས་ཤིག་བསྒྲུབས་ཟིན་པ་ཞིག་ལ་ངོས་འཛིན་བྱས་ན་འགྲིག་གི་ཡོད། ཚོགས་གཙོའི་ངོས་ནས་ཚོགས་བཅར་བ་དང། བཀའ་ཤག སྤྱི་འཐུས་རྣམ་པ། དེ་བཞིན་ལས་བྱེད་རྣམ་པར་གྲོས་ཚོགས་འདིའི་སྟེང་ནས་བསྐྱར་དུ་ཐུགས་རྗེ་ཆེ་ཞུ་འདོད་བྱུང། ད་ལྟའི་གྲོས་ཚོགས་སྐབས་བཅུ་བཞི་པའི་ལས་ཡུན་ཉིན་གྲངས་བཞི་ལས་ལྷག་མེད། ལས་ཡུན་དེའི་རིང་ལས་དོན་གང་སྒྲུབ་དགོས་ཀྱི་ཡོད་མེད་ཀྱི་གནས་སྟངས་དེ་རིང་ཕྱི་དྲོ་གསལ་པོ་ཆགས་ཀྱི་རེད། གལ་ཏེ་སྐབས་བཅུ་བཞི་པའི་གྲོས་ཚོགས་ཀྱིས་གཏན་འབེབས་བྱེད་དགོས་པའི་གནས་སྟངས་སུ་འགྱུར་ན་ང་ཚོ་ཚང་མས་མང་ཚོགས་ཀྱི་བསམ་ཚུལ་གང་བྱུང་བ་དེ་གཞུང་མང་རྒྱལ་ཡོངས་ཚོགས་ཆེན་དེའི་ཐོག་སྤུངས་ཡོད་པར་བརྟེན།
སྤྱིར་མང་ཚོགས་ཀྱི་མངོན་འདོད་དང་རེ་བ་གཞིར་བཟུང། ཡང་སྒོས་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་གཞིར་བཟུང་སྒྲུབ་ཐུབ་རྒྱུའི་རེ་བ་ཞུ་གི་ཡོད། གལ་ཏེ་སྐབས་བཅུ་བཞི་པའི་གྲོས་ཚོགས་སྟེང་གཏན་འབེབས་བྱེད་མི་དགོས་པའི་གནས་སྟངས་ཆགས་ཚེ་སྐབས་བཅོ་ལྔ་པའི་སྤྱི་འཐུས་རྣམ་པས་དེ་མཚུངས་ཀྱི་འགན་འཁྱེར་དགོས་པ་ཞིག་ཆགས་ཡོད། ཁ་སང་༸གོང་ས་མཆོག་གིས་བཀའ་སློབ་སྩོལ་སྐབས་ཚོགས་ཆེན་ནས་གྲོས་ཆོད་དང་པོ་བཞག་པ་དེར་མགོན་པོ་གང་ཉིད་མཆོག་རྒྱལ་ཁབ་ཀྱི་དབུ་ཁྲིད་ཀྱི་མཛད་འགན་མུ་མཐུད་བཞེས་དགོས་ཀྱི་འདུག་ཅེས་པའི་གྲོས་ཆོད་ཡོད་པ་བཞིན་གསེར་སྙན་སྒྲོན་འབུལ་ཞུ་སྐབས་དེར་ཞལ་བཞེས་རྩ་བ་ནས་མཛད་མེད། དེ་མིན་བཅའ་ཁྲིམས་ཀྱི་ནང་སྔོན་གླེང་གསར་འཇུག་དང། དེ་བཞིན་དོན་ཚན་དང་པོ་གསར་དུ་འཇུག་རྒྱུའི་ཐོག་བཀའ་བཞེས་ཟབ་མོ་ཐོབ་པར་ངོས་འཛིན་ཞུས་ན་འགྲིག་གི་ཡོད། ཐ་སྙད་བེད་སྤྱོད་གཏོང་སྟངས་ཐོག་༸གོང་ས་མཆོག་གིས་བཀའ་གསལ་ཕེབས་པ་དེ་དག་ང་ཚོས་ཐུགས་ལ་འཇགས་དགོས། དོན་ཚན་དང་པོའི་ནང་གསེས་དང་པོ་དང། གཉིས་པར་ཞལ་བཞེས་སྩལ་ཡོད། དོན་ཚན་དང་པོའི་ནང་གསེས་གསུམ་པའི་ཐོག་༸གོང་ས་མཆོག་གིས་འགྲེལ་བརྗོད་མཛད་ཡོད། བོད་སྤྱི་ཡོངས་ཀྱི་གནས་སྟངས་ཛ་དྲག་གི་ཐོག་གནས་ཡོད་པ་དང། ལྷག་པར་ཀིརྟི་དགོན་པའི་གནས་སྟངས་དེ་ཟླ་ཤས་ནས་ཛ་དྲག་གི་གནས་སུ་གྱར་ཡོད་པ་མ་ཟད། ད་དུང་ཡང་བཟང་ཕྱོགས་ཀྱི་རྣམ་པ་ཤུགས་ཆེ་མེད་པ་རང་མུས་སུ་གནས་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་གང་ཉིད་མཆོག་བོད་མི་ཞིག་ཡིན་པའི་ཆ་ནས་བོད་སྤྱི་པའི་འགན་མུ་མཐུད་བཞེས་ཀྱི་ཡིན་ཞེས་བཀའ་ཕེབས་ཡོད། དེར་བརྟེན་གཞིས་ལུས་རྒྱ་ཆེའི་མི་མང་གི་ངོས་ནས་ཐུགས་ཁྲལ་བྱེད་དགོས་མི་འདུག ཅེས་སོགས་ཀྱི་གསུང་བཤད་གནང་ཡོད།
དེ་རྗེས་ཚོགས་གཙོ་ལས་ཚབ་དང་ལས་རིམ་ཚོགས་ཆུང་གི་ཚོགས་མི་བསྐོ་གཞག་གནང་གྲུབ་བསྟུན། ཉེ་ཆར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་རྡོ་རྗེ་མཁའ་འགྲོ་མཆོག་ཕྱི་ལོ་ ༢༠༡༡ ཟླ་ ༤ ཚེས་ ༣༠ ཉིན་ཐད་འཕུར་གནམ་གྲུའི་ནང་ཕེབས་ཐོན་གནང་སྐབས་གནམ་གྲུ་བོར་བརླག་གིས་འདས་གྲོངས་སུ་གྱུར་བའི་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་འཆར་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་ཀྱིས་སྙན་སྒྲོན་ཞུས་ཡོད་པ་དང། གདུང་སེམས་མཉམ་སྐྱེ་དང་ཐུགས་གསོའི་གྲོས་ཆོད་ཀྱང་འཇོག་གནང་ཡོད་པ་བཅས།།
