༢༠༡༡ ཟླ་ ༥ ཚེས་ ༣ རེས་གཟའ་མིག་དམར།
༄༅། །འདི་གར་འབྲེལ་ཡོད་ནས་གནས་ཚུལ་བཏང་གནས་ནང་འཁོད་དོན་ལྟར་ན། བོད་ཤར་ཕྱོགས་དཀར་མཛེས་ས་ཁུལ་བྲག་མགོ་རྫོང་གི་བཙུན་མ་བྱམས་པ་མཚོས་ཟླ་བ་ ༤ པའི་ཚེས་ ༡༦ ཉིན་སྡེ་དགེ་རྫོང་གི་ཟམ་ཆེན་དུ་ཞི་བའི་ངང་རྒྱ་ནག་གཞུང་ལ་ངོ་རྒོལ་སྐད་འབོད་བྱས་མ་ཐག རྒྱ་ནག་ཉེན་རྟོག་པས་རྡུང་རྡེག་དྲག་པོ་དང་སྦྲགས་འཛིན་བཟུང་བྱས་འདུག
གནས་ཚུལ་ཤེས་རྟོགས་ཡོད་པའི་འབྲེལ་ཡོད་མི་སྣས་ངོ་སྤྲོད་བྱས་དོན། བོད་དཀར་མཛེས་བྲག་མགོ་རྫོང་ཕུན་ཚོགས་ཆོས་གླིང་དགོན་གྱི་བཙུན་མ་བྱམས་པ་མཚོས་ཕྱི་ཟླ་ ༤ ཚེས་ ༡༦ ཉིན་རྒྱབ་ཆུ་ཚོད་ ༢ པའི་གཡས་གཡོན་ལ་སྡེ་དགེ་རྫོང་ཟམ་ཆེན་སར་སྐད་སངས་མཐོན་པོས་བོད་ལ་རང་དབང་དགོས། ༸གོང་ས་ཏཱ་ལའི་བླ་མ་བོད་དུ་ཕེབས་བཅུག་དགོས་ཞེས་ལན་མང་སྐད་འབོད་གནང་བ་མ་ཟད་མཉམ་དུ་སྦྱར་ཡིག་ཀྱང་བཀྲམས་ཡོད། དེའི་མོད་ལ་རྒྱ་ནག་ཉེན་རྟོག་པས་གཅར་རྡུང་དྲག་པོ་བཏང་སྟེ་འཛིན་བཟུང་བྱས་འདུག བཙུན་མ་བྱམས་པ་མཚོས་དེ་སྔོན་ཡི་གེ་ཞིག་བཞག་ཡོད་པའི་ནང་འཁོད་དོན། ངས་ལས་དོན་གལ་ཆེན་ཞིག་བསྒྲུབ་སླད་རེ་ཞིག་འདི་ནས་ཁ་མ་བྲལ་ཐབས་མེད་ཡིན་ཞེས་འཁོད་ཡོད། བཙུན་མ་བྱམས་པ་མཚོ་ད་ལྟ་རང་ལོ ༢༨ སོན་ཡོད་པ་དང་། དཀར་མཛེས་ས་ཁུལ་བྲག་མགོ་རྫོང་ཆུ་བ་གྲོང་ནས་ཡིན་འདུག ད་ལྟའི་ཆར་ཁོང་གི་ཞིབ་ཕྲའི་གནས་ཚུལ་གང་ཡང་ཤེས་རྟོགས་མེད་པའི་གནས་སུ་གྱར་ཡོད་པ་བཅས།།
