༢༠༡༡ ཟླ་ ༥ ཚེས་ ༡༠ རེས་གཟའ་མིག་དམར།
༄༅། །འདི་གར་ཐེ་ཝན་བོད་གཞུང་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བོད་གཞུང་ཐེ་ཝན་སྐུ་ཚབ་དོན་གཅོད་ཁང་དང་། ཐེ་ཝན་བོད་རྒྱ་མཐུན་ཚོགས་མཉམ་འབྲེལ་ཐོག་ཐེ་ཝན་དབུས་ཀྱི་གྲོང་ཁྱེར་ཀྲང་ཧཱ་རིག་གཞུང་ལྷན་ཁང་དུ་ཕྱི་ལོ་ ༢༠༡༡ ཟླ་ ༥ ཚེས་ ༩ ནས་ཚེས་ ༢༢  བར་བོད་ཀྱི་ཆོས་དང་རིག་གཞུང་གི་འགྲེམས་སྟོན་ཞིག་གོ་སྒྲིག་ཞུས་ཡོད། འགྲེམས་སྟོན་གྱི་ནང་དོན་གཙོ་བོ་དཔར་རིགས་འདྲ་མིན་སུམ་བརྒྱ་ལྷག་ལ་རྒྱ་ཡིག་གི་ངོ་སྤྲོད་མཉམ་སྦྱར་ཡོད་ཅིང་། སྡེ་ཚན་གཙོ་བོ་བོད་ཀྱི་རྒྱལ་རབས་ལོ་རྒྱུས། དེ་བཞིན་༸གོང་ས་མཆོག་གི་མཛད་འཕྲིན། བོད་ཀྱི་ཆོས་དང་རིག་གཞུང་། ལོ་ལྔ་བཅུ་རིང་བོད་ཕྱི་ནང་གི་སྤྱི་ཚོགས་གནས་སྟངས། བཙན་བྱོལ་བོད་མིའི་མང་གཙོའི་ལམ་ལུགས་དང་བཙན་བྱོལ་བོད་གཞུང་ངོ་སྤྲོད་སོགས་དང་། རིག་དངོས་ཁོངས་སུ་བོད་ཀྱི་དངུལ་ཊམ་དང་། ཟངས་དངུལ། ཤོག་སྒོར། སྦྲག་རྟགས། བོད་ས་མ་ཤོར་གོང་གི་བོད་མིའི་ཕྱི་བསྐྱོད་ལག་འཁྱེར་གྱི་འདྲ་བཤུས། བཙན་བྱོལ་བོད་མིའི་ལག་དེབ་སོགས་ལ་རྒྱ་ཡིག་གི་འགྲེལ་བཤད་མཉམ་སྦྱར་གྱིས་འགྲེམས་སྟོན་བཤམས་ཡོད། བོད་མི་རྣམས་བཙན་བྱོལ་དུ་མི་ལོ་ལྔ་བཅུ་འདས་པའི་དྲན་གསོའི་སྐབས་ཐོག་མར་ཐེ་ཝན་རྒྱལ་ས་ཐེ་པེ་གྲོང་ཁྱེར་དུ་བོད་དོན་ངོ་སྤྲོད་ཀྱི་འགྲེམས་སྟོན་གོ་སྒྲིག་ཞུས་པ་དང་། དེ་རྗེས་གྲོང་ཁྱེར་གཞན་ཁག་ནང་ལ་ཡང་གོ་སྒྲིག་གིས་ཐེངས་འདིའི་འགྲེམས་སྟོན་ནི་ཐེ་ཝན་ས་གནས་འདྲ་མིན་ནང་བོད་དོན་ངོ་སྤྲོད་ཀྱི་ལས་རིམ་ཐེངས་དགུ་པ་དེ་ཆགས་ཀྱི་ཡོད་པ་བཅས།།