༢༠༡༡ ཟླ་ ༥ ཚེས་ ༢༡ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༧ ཉིན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་སྤ་ཀོར་བརྒྱུད་ལྡི་ལིར་ཕེབས་ཐོན་གྱིས་ཕྱི་ཚེས་ ༨ ཉིན་མཁའ་ཐོག་ཨ་སམ་གྷོ་ཧ་ཊི་དང་། དེ་ནས་ས་ཐོག་བརྒྱུད་ཕེབས་ཐོན་གྱིས་འབུམ་ལར་ཕེབས་སྐབས་ས་གནས་འགོ་འཛིན་ལས་ཁུངས་ནས་སྣེ་ལེན་ཞུས། དེ་ཉིན་དགོང་དྲོ་མོན་རྟ་དབང་དུ་འབྱོར་ཏེ་མངའ་སྡེའི་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་དམ་པའི་སྐུ་ཟླ་གཉིས་པའི་ནང་སྟ་གོན་ལྟར་བཞུགས་ཞག་གནང་། ཕྱི་ཚེས་ ༡༠ སྔ་དྲོ་ཆུ་ཚོད་ ༦ ཐོག་བཀའ་བློན་མཆོག་དང་ཕྱག་རོགས་ས་གནས་འགོ་འཛིན། ས་གནས་རང་བདེན་ཚོགས་གཙོ་བཅས་ནས་དམ་པ་དེའི་སྐུ་ཟླ་དང་པོའི་བཞུགས་ཡུལ་གྱི་ཚོགས་ཁང་དུ་འདས་པོ་ཁོང་གི་སྐུ་གདུང་ལ་མྱ་ངན་རྗེས་དྲན་དང་གཞུང་འབྲེལ་མཇལ་དར་ཕུལ་བ་དང་ཆབས་ཅིག་སྐུ་ཟླའི་ནང་མི་ཡོངས་ལ་ཐུགས་གསོའི་འབྲེལ་མོལ་གནང། དེ་རྗེས་དམ་པ་ཁོང་གི་སྐུ་ཟླ་དང་པོའི་བུ་རྒན་པ་པདྨ་མཁའ་འགྲོ་༼ས་གནས་ཀོང་རེ་སིའི་ཚོགས་གཙོ་དང་ཉེ་ཆར་འདས་པོའི་སྐུ་ཚབ་ཏུ་མངའ་སྡེའི་གྲོས་འཐུས༽དང་སྐུ་མཆེད་གཞན་རྣམས་ལ་དམ་པ་ཁོང་གི་ཆེད་བཙན་བྱོལ་བོད་གཞུང་དང་མང་ཚོགས་བཅས་ནས་གདུང་སེམས་མཉམ་སྐྱེ་དང་རྣམ་དཀར་བྱ་བ་བསྒྲུབས་པ་སོགས་གསལ་བཤད། དེ་བཞིན་བཀའ་ཤག་དང་ཆོས་རིག བདེ་སྲུང་སོགས་ནས་ཐུགས་གསོའི་མཆོད་མེའི་ཞལ་འདེབས་དང་ཐུགས་གསོའི་མཇལ་དར་བཅས་ཕུལ་ཏེ་སྐུ་གདུང་ཞུགས་འབུལ་བྱེད་ཡུལ་རི་སྐེད་དུ་ཕེབས། ཕྱོགས་མཚུངས་བཀའ་བློན་མཆོག་གིས་མངའ་སྡེའི་སྤྱི་ཁྱབ་བློན་ཆེན་གསར་པར་མཇལ་དར་དང་མཇལ་མོལ་གནང་ཡོད། ཕྱི་ཚེས་ ༢༢ ཉིན་གྱི་སྔ་དྲོ་འདས་པོ་དམ་པ་དེའི་སྐུ་ཟླ་ཁག་དང་ཐུག་འཕྲད་ཀྱིས་རིམ་བཞིན་རྟ་དབང་དགོན་པའི་སློབ་དཔོན་ས་གནས་རང་བདེན་ཚོགས་གཙོ། སེར་དགོན་ཡན་ལག་ཕྱག་ཟུར་བཅས་ནས་ཕེབས་སྐྱེལ་ཞུས་ཡོད། དེ་ནས་རིམ་བཞིན་ཕེབས་ཐོན་གྱིས་ཕྱི་ཚེས་ ༡༥ ཉིན་གྱི་སྔ་དྲོ་སྤ་ཀོར་བརྒྱུད་རྡ་སར་ཕེབས་འབྱོར་གནང་ཡོད་པ་བཅས།