༢༠༡༡ ཟླ་ ༥ ཚེས་ ༡༦ རེས་གཟའ་ཟླ་བ།
པར་ལེན་པ་བསོད་ནམས་རྫོགས་བཟང་།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡༤ ཉིན་༸གོང་ས་མཆོག་གིས་ཐོག་མར་ཨ་རིའི་ནིའུ་ཇར་སིའི་མངའ་སྡེའི་ནང་རྟེན་གཞི་བྱས་པའི་ནེ་ཝཀ་གྲོང་ཁྱེར་དུ་ཤེས་ཡོན་ལམ་ལུགས་ནང་བཟང་སྤྱོད་ཀྱི་བསླབ་བྱ་ (Newark Peace Education Summit) ཞེས་པའི་བརྗོད་གཞིའི་ཐོག་སྔ་དྲོ་བཀའ་སློབ་སྩལ། ཉིན་རྒྱབ་མགོན་པོ་གང་ཉིད་མཆོག་
གིས་སྤྱི་ཚོགས་ནང་ཞི་བདེ་སྐྲུན་ཐབས་སྐོར་བཀའ་སློབ་སྩལ་དོན། དཀའ་ངལ་མང་པོ་ཡོད་ནའང་ང་ཚོས་ཕྱོགས་ཡོངས་ཀྱི་གནས་ཚུལ་ཤེས་པའི་ཐོག་ནས་ལྟ་ཐུབ་ཚེ་སེམས་ཤུགས་ཆག་རྒྱུ་དང་སྤོབས་པ་ཞུམ་དགོས་རྒྱུ་གང་ཡང་མེད། གལ་ཏེ་ང་ཚོས་དུས་རབས་ ༢༠ པར་གཞིགས་ཚེ་དུས་རབས་ ༢༠ པའི་འགོ་སྟོད་ལས་དུས་མཇུག་བཟང་བ་དང་བཟང་ཕྱོགས་ཀྱི་རེ་བ་ཞིག་རྒྱག་རྒྱུ་ཡོད་པ་གསལ་པོ་རེད། དུས་རབས་ ༢༠ འགོ་སྟོད་ནང་དམག་འཐབ་དང་ཁྲུག་རྩོད་བྱུང་ཡོད་ཀྱང་དུས་རབས་ ༢༠ མཇུག་ཙམ་ལ་ཕན་ཚུན་འཆམ་མཐུན་ངང་མཉམ་གནས་ཡོང་རྒྱུར་འབད་བརྩོན་བྱས་ཡོད། དེ་བཞིན་ཁོར་ཡུག་ལྟ་བུར་མཚོན་ནའང་དུས་རབས་་༢༠ པའི་འགོ་སྟོད་ཙམ་ལ་ཁོར་ཡུག་སྐོར་དོ་སྣང་ཧ་ཅང་བྱས་མེད་ཀྱང་ད་ཆ་ཁོར་ཡུག་གནད་དོན་ཐོག་སེམས་འཚབ་བྱེད་རྒྱུ་དེ་འཇིག་རྟེན་སྤྱི་ཡོངས་ལ་ཁྲིད་པའི་འགན་ལྟ་བུ་རྩི་བཞིན་ཡོད། དེ་བཞིན་དེ་སྔ་ཆོས་དང་ཚན་རིག་དབར་གྱི་འབྲེལ་ལམ་ཐོག་ལྟ་ཚུལ་དེ་ཕན་ཚུན་འབྲེལ་མེད་ཐ་དད་ཡིན་པའི་ལྟ་ཚུལ་ཡོད་ཀྱང་། དེང་སྐབས་ཚན་རིག་དང་ཆོས་གཉིས་འབྲེལ་ལམ་ཉེ་པོ་ཆགས་ཡོད། ངོས་རང་ལ་ཆ་བཞག་ནའང་འདས་པའི་ལོ་ ༣༠ ལྷག་ཙམ་གྱི་རིང་ཚན་རིག་པ་ཚོ་དང་བགྲོ་གླེང་བྱས་ཡོད་ཅེས་བཀའ་སློབ་སྩལ་ཡོད་པ་མ་ཟད། ཕྱོགས་མཚུངས་མགོན་པོ་གང་ཉིད་མཆོག་དེ་སྔ་ཕྱི་ལོ་ ༡༩༩༦ ལོར་དབྱིན་ཡུལ་གྱི་བཙུན་མོ་ཨེ་ལི་ཛེ་བྷེ་ཐིའི་ཡུམ་དང་ལྷན་བགྲོ་གླེང་ཞིག་གི་སྐབས། ༸གོང་ས་མཆོག་གིས་འཛམ་གླིང་གི་འགྱུར་འགྲོས་དེ་བཟང་ངན་ཇི་འདྲ་ཞིག་གི་ཕྱོགས་སུ་བསྐྱོད་བཞིན་ཡོད་མེད་ཀྱི་དྲི་བ་ཕུལ་བར་ཡུམ་ཆེན་གྱིས་སྐབས་དེར་ཐེ་ཚོམ་སྤུ་ཙམ་མེད་པར་ད་ཆ་སྔ་མོ་ཡུམ་ཆེན་གཞོན་ནུའི་དུས་སྐབས་སུ་མ་གྲགས་པའི་རང་ཐག་ར
པར་ལེན་པ་བསོད་ནམས་རྫོགས་བཟང་།
ང་གཅོད་དང་འགྲོ་བ་མིའི་ཐོབ་ཐང་སོགས་ཡོངས་གྲགས་སུ་གཙིགས་ཆེར་འཛིན་བཞིན་ཡོད་
པའི་དཔེ་མཚོན་དང་སྦྲགས། འཛམ་གླིང་དེ་བཞིན་བཟང་ཕྱོགས་སུ་འགྱུར་བ་འགྲོ་བཞིན་ཡོད་སྐོར་གསུངས་ཡོད་པ་ཐུགས་དྲན་གསོ་མཛད། གཞན་ཡང་མགོན་པོ་གང་ཉིད་མཆོག་གིས་ཚོགས་བཅར་བ་གཞོན་སྐྱེས་ཚོར་འཆར་སྣང་གསལ་པོ་ཞིག་སེམས་ནང་བཅང་སྟེ་མ་འོངས་པར་དམག་འཐབ་སྤང་བའི་འཇིག་རྟེན་ཞིག་སྐྲུན་ཐབས་དང་། གོ་ལའི་རང་བྱུང་གཏེར་དངོས་ཆ་སྙོམས་སུ་དཔྱོད་ཐུབ་པ་དགོས་རྒྱུ་གལ་ཆེ་ཡིན་སྐོར་དང་། ཇི་སྲིད་འགྲོ་བ་མི་རྣམས་གནས་པ་དེ་སྲིད་དཀའ་ངལ་ཡོད་པའི་དངོས་ཡོད་གནས་ཚུལ་དེ་སེམས་ལ་བཅངས་ཏེ་དཀའ་ངལ་རྣམས་ཐུགས་མཐུན་ཁྲིམས་གཙང་གིས་ཐོག་ནས་སེལ་རྒྱུ་ལས་ཐབས་ལམ་གཞན་མེད་སོགས་ཀྱི་བཀའ་སློབ་སྩལ་གྲུབ་བསྟུན། ཚོགས་འདུ་གོ་སྒྲིག་གནང་མཁན་ཚོར་ཐུགས་རྗེ་ཆེ་ཞུ་གནང་མཛད་དེ་བཞུགས་གནས་མགྲོན་ཁང་དུ་ཆིབས་སྒྱུར་བསྐྱངས་ཡོད་པ་བཅས།།
