༢༠༡༡ ཟླ་ ༥ ཚེས་ ༡༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ནིའུ་ཇར་སིའི་མངའ་སྡེའི་གྲོང་ཁྱེར་ནེ་ཝརཀ་(Newark)ནང་དུ་དབུ་འཛུགས་གནང་བའི་ལྷན་ཚོགས་ཀྱི་ཚོགས་མགོན་དུ་ཆིབས་སྒྱུར་བསྐྱངས་ཡོད།
དེ་བཞིན་མགོན་པོ་གང་ཉིད་མཆོག་ནེ་ཝརཀ་གྲོང་ཁྱེར་གྱི་རིག་གཞུང་འཁྲབ་སྟོན་ཁང་དུ་གོ་སྒྲིག་ཞུས་པའི་(Newark Peace Education Summit)ཞི་བདེའི་སློབ་གསོའི་ལྷན་ཚོགས་ཀྱི་ཁྱབ་ཁོངས་ནང་སེམས་ཀྱི་ཞི་བདེ་དང་། རང་ཁྱིམ་དུ་ཞི་བདེ་ཞེས་པའི་བགྲོ་གླེང་ཚོགས་ཁག་གཉིས་ཀྱི་ཐོག་དབུ་བཞུགས་མཛད་ཡོད།
དེ་ཡང་སྔ་དྲོའི་བགྲོ་གླེང་གི་ལྷན་ཚོགས་ཐོག་མགོན་པོ་གང་ཉིད་མཆོག་དང་ལྷན་ནོ་བེའི་ཞི་བདེའི་གཟེངས་རྟགས་བཞེས་མྱོང་ཡོད་མཁན་ས་འོག་འབར་རྫས་བཀག་འགོག་གི་ལས་འགུལ་བ་ལྕམ་སྐུ་(Jody Williams)ཇོ་ཌེ་ཝེ་ལེམ་སེ་མཆོག་དང་། ཨི་རན་གྱི་རང་དབང་རྩོད་ལེན་པ་ལྕམ་སྐུ་(Shirin Ebadi )ཤི་རི་ནི་ཨེ་བ་ཌེ་མཆོག རྩོམ་པ་པོ་གྲགས་ཅན་(Dr. Deepak Chopra)ཌེ་ཡཀ་ཆོབ་ར་ལགས་ཀྱིས་དབུས་མཁས་དབང་དང་ལས་འགུལ་བ་ཁག་གཅིག་ནས་མཉམ་ཞུགས་ཀྱིས་ནང་སེམས་ཀྱི་ཞི་བདེ་དང་སྤྱི་ཚོགས་ཁྲོད་ཞི་བདེ་བསྐྲུན་རྒྱུ། སྤྱི་ཚོགས་རང་ཉིད་ཀྱི་ལས་འགན་ཇི་ཡིན་སྐོར་ལ་བཀའ་བསྡུར་ལྷུག་པོ་གནང་ཡོད།
སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། འཛམ་གླིང་ནང་བཟང་སྤྱོད་ཐོག་འགྱུར་ལྡོག་འགྲོ་བར་ཐོག་མར་ནང་སེམས་ཀྱི་ཞི་བདེ་བསྐྲུན་དགོས་རྒྱུ་གལ་ཆེན་པོ་ཡིན། ནང་སེམས་ཀྱི་ཞི་བདེ་ནི་ཁྲོམ་ནས་ཉོ་རྒྱུ་མེད་པར་བརྟེན། གང་ཟག་སྒེར་གྱི་ངོས་ནས་འབད་བརྩོན་བྱས་ཏེ་དོན་དམ་ལག་ལེན་བསྟར་བའི་སྒོ་ནས་བསྐྲུན་དགོས་པ་ཞིག་ཡིན། དེ་བཞིན་ཚན་རིག་པའི་རྟོགས་ཞིབ་ནང་དྲང་བདེན་དང་བྱམས་བརྩེ་ལྡན་པའི་གང་ཟག་གཅིག་གིས་རང་ཁྱིམ་དུ་ཞི་བདེ་དང་ཁོར་ཡུག་གཅིག་བསྐྲུན་ཐུབ་ཀྱི་ཡོད་པ་ར་སྤྲོད་བྱུང་ཡོད། བྱམས་པ་དང་སྙིང་རྗེ་བརྒྱུད་ནས་ཕན་ཚུན་ཡིད་ཆེས་སླེབས་ཀྱི་ཡོད། ཡིད་ཆེས་བརྒྱུད་ནས་བདེ་སྐྱིད་ཡོང་གི་ཡོད། ཕྱོགས་མཚུངས་འགྲོ་བ་མི་ཡོངས་ལ་ལས་བཟང་ངན་གཉིས་ཀའི་ལས་དོན་སྤེལ་རྒྱུའི་ནུས་པ་ཡོད་པར་བརྟེན།
ང་ཚོས་ཤེས་བྱ་ཡོན་ཏན་བརྒྱུད་ནས་རང་ཉིད་ཀྱི་ལྷན་སྐྱེས་སུ་བཟང་ཕྱོགས་ཀྱི་བསམ་བློ་གོང་སྤེལ་གཏོང་དགོས་ཀྱི་ཡོད། ཤེས་ཡོན་དང་འབྲེལ་བའི་སྒྲིག་འཛུགས་ཁག་ནས་ནང་སེམས་ཀྱི་རིག་པའི་སྐོར་ལ་རྟོགས་ཞིབ་ལས་དོན་སྤེལ་འགོ་འཛུགས་དགོས་པ་མ་ཟད། སློབ་གྲྭའི་སློབ་གཞི་ཁག་ཏུ་ནང་སེམས་ཀྱི་རིན་ཐང་སློབ་ཚན་གསར་འཇུག་བྱེད་དགོས་ཞེས་སོགས་ཀྱི་ལམ་སྟོན་བཀའ་སློབ་སྩལ་ཡོད། ༸གོང་ས་མཆོག་གིས་ཞི་བདེའི་སློབ་གསོའི་ལྷན་ཚོགས་མཇུག་སྒྲིལ་བའི་རྗེས་ནེ་ཝརཀ་འགྲེམས་སྟོན་ཁང་དུ་ཆིབས་སྒྱུར་དང་འབྲེལ་འགྲེམས་སྟོན་ཁང་དེའི་ནང་ཕྱི་ལོ་ ༡༩༡༡ ལོ་ནས་ཡོད་པའི་བོད་ཀྱི་རིག་གཞུང་དང་བཅས་དངོས་རྫས་ཁག་གཅིག་ལ་གཟིགས་ཞིབ་མཛད་དེ་འགྲེམས་སྟོན་ཁང་དེའི་ནང་བཞེངས་སྐྲུན་ཞུས་པའི་སྤྱན་རས་གཟིགས་ཀྱི་རྡུལ་མཚོན་དཀྱིལ་འཁོར་ལ་ཐུགས་སྨོན་རབ་གནས་སྩལ་ཡོད། དེ་ནས་ནེ་ཝརཀ་གྲོང་སྡེའི་སྤྱི་ཁྱབ་པ་མཆོག་གིས་དབུས་གནད་ཡོད་མི་སྣ་ཁག་གཅིག་ལྷན་འཛོམས་ཀྱིས་ཉིན་དགུང་གསོལ་སྟོན་ཞིག་ཐོག་གྲོང་སྡེ་སྤྱི་ཁྱབ་པ་(Mayor Cory Booker)མར་ཡོར་ཁོ་རེ་སྦུ་གར་ལགས་ཀྱིས་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཁུལ་དེའི་ནང་གདན་འདྲེན་ཞུ་ཐུབ་པ་དེ་ནི་ང་རང་གྲོང་སྡེ་འདིའི་སྤྱི་ཁྱབ་བྱས་པའི་ལས་ཡུན་ཁྲོད་བྱས་རྗེས་གལ་ཆེ་ཤོས་ཤིག་ཡིན་ཞེས་གསུངས་ཡོད། དེ་བཞིན་ཁོང་གིས་རྗེས་སུ་གསར་འགོད་པར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནི་དྲང་བདེན་དང་ཞི་བདེའི་བང་ཆེན་ཞིག་ཡིན་པ་མ་ཟད། ད་རེས་༸གོང་ས་ཏཱ་ལའི་བླ་མ་མཆོག་ཁུལ་འདིར་ཆིབས་སྒྱུར་བསྐྱངས་པ་དེས་ས་གནས་ཀྱི་ཡུལ་མི་ཚོར་ཞལ་མཇལ་གོ་སྐབས་བཟང་པོ་ཐོབ་ཡོད་པའི་སྐོར་འགྲེལ་བརྗོད་གནང་ཡོད། དེ་རྗེས་༸གོང་ས་མཆོག་གིས་ལྷན་ཚོགས་དེའི་ཁྱབ་ཁོངས་རང་ཁྱིམ་དུ་ཞི་བདེ་ཞེས་པའི་བགྲོ་གླེང་གི་ཚོགས་འདུ་གཉིས་པ་ཞིག་གི་ཐོག་དབུ་བཞུགས་མཛད་ཡོད། སྐབས་དེར་མགོན་པོ་གང་ཉིད་མཆོག་དང་ལྷན་ལྕམ་སྐུ་ཇོ་ཌེ་ཝེ་ལེམ་སི་མཆོག་དང་། ཨི་རན་གྱི་རང་དབང་རྩོད་ལེན་པ་ལྕམ་སྐུ་ཤི་རི་ནི་ཨེ་བ་ཌེ་མཆོག་དེ་བཞིན་ཕྲུ་གུའི་སེམས་ཁམས་རིག་པའི་སྨན་པ་(Nancy Black) ལགས མྱོས་རྫས་ཀྱི་ལས་ངན་ནང་ལྷུང་པ་ཚོར་ལྟ་རྟོགས་དང་མྱུར་སྐྱོབ་ལས་འགུལ་སྤེལ་མཁན་ལྕམ་སྐུ་ཌ་ཝི་ཌེ་ (David Kerr)ལགས་སོགས་གནད་ཡོད་མི་སྣ་མང་དག་ཅིག་ལྷན་ཞུགས་གནང་ཡོད།
སྐབས་དེར་མགོན་པོ་གང་ཉིད་མཆོག་གིས་ཁྱིམ་ཚང་ནང་ཕན་ཚུན་བྱམས་པ་དང་བརྩེ་བའི་བློ་ཧ་ཅང་དགོས་གལ་ཆེ་བ་དང་། དེ་བཞིན་ཕན་ཚུན་འབྲེལ་བ་བྱེད་སྐབས་ནང་གི་མཛེས་སྡུག་དང་ཕྱིའི་མཛེེས་སྡུག་གཉིས་དབྱེ་བ་ཕྱེ་ཤེས་པ་དགོས་ཀྱི་ཡོད་སྐོར་ལམ་སྟོན་སྩལ་འདུག
རྩ་བའི་ནེ་ཝརཀ་གྲོང་ཁྱེར་ནང་ཚོགས་པའི་ཞི་བདེའི་སློབ་གསོའི་ལྷན་ཚོགས་དེའི་ཐོག་གསུང་བཤད་གནང་མཁན་མི་སྣ་བརྒྱ་ལྷག་ཙམ་གདན་ཞུ་གནང་ཡོད་པ་མ་ཟད། ཚོགས་བཅར་བའི་ཁོངས་སུ་ཞི་བདེའི་ལས་འགུལ་བ་དང་། ཤེས་ཡོན་དང་འབྲེལ་བའི་མི་སྣ། སྤྱི་ཚོགས་ཀྱི་དབུ་ཁྲིད་ཁག སློབ་ཕྲུག་སོགས་ཁྱོན་མི་སྣ་ཆིག་ཁྲི་བརྒལ་བས་ཆེད་བཅར་གནང་ཡོད་པ་བཅས། །
