༢༠༡༡ ཟླ་ ༥ ཚེས་ ༡༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡༦ ཉིན་རྡ་ས་པདྨ་ཐང་མགྲོན་ཁང་གི་དཔེ་མཛོད་ཁང་དུ་བོད་གཞུང་འཕྲོད་བསྟེན་ལས་ཁུངས་ཀྱིས་གོ་སྒྲིག་ཐོག་(The Dukar Project Training)ཞེས་པའི་སེམས་ཁམས་འཕྲོད་བསྟེན་དང་འབྲེལ་བའི་ཟབ་སྦྱོང་དབུ་འཛུགས་གནང་ཡོད། དེ་ཉིན་གྱི་སྔ་དྲོ་ཆུ་ཚོད་ ༩ ཙམ་ལ་འཕྲོད་བསྟེན་ལས་ཁུངས་ཀྱི་ལས་བྱེད་སྐལ་བཟང་ལྷ་མོ་ལགས་ཀྱིས་ངོ་སྤྲོད་གསུང་བཤད་གནང་གྲུབ་བསྟུན།  འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག་གིས་ཟབ་སྦྱོང་དང་འབྲེལ་བའི་གསུང་བཤད་གནང། ཕྱི་ཚེས་ ༡༦ ནས་ ༡༩ བར་ཉིན་གྲངས་བཞི་རིང་འཚོགས་རྒྱུའི་ཟབ་སྦྱོང་དེར་བོད་གཞུང་འཕྲོད་བསྟེན་ཁྱབ་ཁོངས་སྨན་ཁང་ཁག་གི་སྨན་པ་དང། མངོན་དགའ་སློབ་གྲྭའི་སྨན་པ། དབུས་བུད་མེད་ལྷན་ཚོགས་ཀྱི་སྐུ་ཚབ་ཁག་གཅིག་བཅས་ཁྱོན་མི་གྲངས་ ༢༠ བརྒལ་བས་མཉམ་ཞུགས་གནང་ཡོད། ཟབ་ཁྲིད་པའི་ཁོངས་སུ་རྒྱལ་སྤྱིའི་སེམས་ཁམས་འཕྲོད་བསྟེན་དང་འགྲོ་བ་མིའི་ཐོབ་ཐང་བསྟི་གནས་ཁང་(The International centre for Mental Health and Human rights) གི་འཛིན་སྐྱོང་འགན་འཛིན་ལྕམ་སྐུ་ལོ་གྷན་(Ms.Gaea Logan) ལགས་ཀྱིས་གཙོས་ཝག་དྷེ་ཝི་མིའུ་ནི་ཡར་ (Dr.Vagdevi Meunier) ལགས་དང། སི་དྷར་ཏ་ཨ་ཤི་ཝིན་ཤ་ཧ་(Dr. Siddharth Ashvin Shah) ལགས། དེ་བཞིན་བོད་གཞུང་སྨན་རྩིས་ཁང་གི་སྨན་པ་སོགས་ཡོད་འདུག་པ་བཅས།།