༢༠༡༡ ཟླ་ ༥ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༦ ཉིན་རྒྱལ་སྤྱིའི་ཡུ་གུར་ཚོགས་པའི་ཚོགས་གཙོ་ལྕམ་སྐུ་རེ་བྷི་ཡ་ཀ་ཌིར་(Rebiya Kadeer)ལགས་ཀྱིས་ཡུ་གུར་མི་རིགས་ཡོངས་ཀྱི་ཚབ་ཞུས་ཏེ་བོད་མི་རྣམས་ནས་མང་གཙོའི་ལམ་ནས་ཐད་ཀར་འོས་འདེམས་བྱུང་བའི་སྐབས་གསུམ་པའི་བཙན་བྱོལ་བོད་གཞུང་གི་བཀའ་བློན་ཁྲི་པ་མཁས་དབང་བློ་བཟང་སེང་གེ་མཆོག་ལ་འཚམས་འཕྲིན་གནང་བའི་ནང་འཁོད་དོན། སྐུ་ཞབས་བློ་བཟང་སེང་གེ་མཆོག་ཁྱེད་ནི་ཤེས་འཇོན་གཉིས་ལྡན་ཡིན་པའི་ཆ་ནས་བཀའ་ཁྲི་ཐུགས་འགན་ཙམ་དུ་མ་ཟད། བོད་ཕྱི་ནང་གི་བོད་མི་ཡོངས་ལ་རླབས་ཆེན་གྱིས་ཕན་ཐོགས་སྒྲུབ་ངེས་ཡིན་པར་དོགས་པ་དང་རྣམ་རྟོག་སྤུ་ཙམ་མེད། སྐུ་ཉིད་ནས་བོད་མིའི་དབུ་ཁྲིད་༸སྐྱབས་མགོན་ཏཱ་ལའི་བླ་མ་མཆོག་གི་འཚེ་མེད་ཞི་བའི་ཐབས་ལམ་དང་གཉིས་སྨན་དབུ་མའི་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་རྒྱུའི་སྲིད་བྱུས་ཁག་མུ་མཐུད་རྒྱུན་འཁྱོངས་གནང་རྒྱུའི་ཐག་གཅོད་གནང་བ་དེས་ཁྱེད་ཀྱིས་མང་གཙོ་དང་འཚེ་མེད་ཞི་བའི་ཐབས་ལམ་ཐོག་ཤར་སྐྱོད་གནང་རྒྱུའི་གདེང་སྤོབས་མཐོང་ཐུབ། དེ་བཞིན་བོད་དང་ཡུ་གུར་མི་རིགས་གཉིས་ནི་ལོ་བཅུ་ཕྲག་མང་པོའི་རིང་རྒྱ་ནག་གཞུང་གི་བཙན་འོག་ཏུ་ཚུད་ཡོད་པ་མ་ཟད། རྒྱ་ནག་གཞུང་ཕྱོགས་ནས་ང་ཚོ་མི་རིགས་གཉིས་ཀྱི་ཆོས་དང་རིག་གཞུང་རྩ་མེད་དུ་བཏང་དང་གཏོང་བཞིན་ཡིན་པ་གཅིག་མཚུངས་ཡིན་པའི་གནས་སྟངས་ཆགས་ཡོད། རྒྱ་ནག་མི་མང་སྤྱི་མཐུན་རྒྱལ་ཁབ་ནས་བོད་དང་ཡུ་གུར་མི་རིགས་གཉིས་ལ་དྲག་གནོན་ཚབས་ཆེན་བྱེད་བཞིན་ཡོད་སྟབས། རྒྱ་ནག་གི་ཆབ་སྲིད་དང་སྤྱི་ཚོགས་ཐ་ན་གྲངས་ཉུང་མི་རིགས་དབར་ཞི་འཇམ་བརྟན་ལྷིང་ཞིག་ཡོང་གི་མེད། དེར་བརྟེན་བོད་དང་ཡུ་གུར་མི་རིགས་དབར་ཆིག་སྒྲིལ་དགོས་རྒྱུ་ནི་གལ་ཆེན་ཞིག་ཡིན། ལྷག་པར་རྒྱལ་སྤྱིའི་ཡུ་གུར་སྒྲིག་འཛུགས་ངོས་ནས་མང་གཙོའི་ལམ་བཟང་ཐོག་སྐྱོད་བཞིན་པའི་ཕྱི་གསལ་གནང་གསལ་གྱི་བཙན་བྱོལ་བོད་གཞུང་གི་བཞེངས་ཕྱོགས་ལ་དུས་རྟག་ཏུ་གུས་བཀུར་ཞུ་བཞིན་ཡོད་ཅེས་ཁོང་གི་འཚམས་འཕྲིན་ནང་འཁོད་ཡོད་པ་བཅས། །
