༢༠༡༡ ཟླ་ ༥ ཚེས་ ༢༧ རེས་གཟའ་པ་སངས།
༄༅། །བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ ༢༠༡༡ ཟླ་ ༥ ཚེས་ ༢༥ ཉིན་བཏང་གནས་ནང་འཁོད་དོན།   ཕ་ཡུལ་རྔ་པ་རྫོང་ཕྱུགས་ལས་འགབ་མའི་དགའ་ཚེ་ཚང་ནས་ཡིན་པ་ཀིརྟི་དགོན་གྱི་གྲྭ་བློ་བཟང་ཆོས་འཕེལ། རང་ལོ་ ༢༧ ཙམ་དང།  ཕ་མིང་ལ་དགའ་ཚེ་ཡིན་པ་ཁོང་འདི་ཟླའི་ཚེས་ ༡༩ ཉིན་རྒྱ་ནག་གཞུང་གིས་དགོན་པའི་ནང་ནས་འཛིན་བཟུང་བྱས་ཡོད། ཁོང་འཛིན་བཟུང་བྱེད་དགོས་པའི་རྒྱུ་མཚན་ནི་དེང་སྐབས་རྒྱ་ནག་གཞུང་ནས་དགོན་པའི་ནང་ཉིན་ལྟར་སློབ་གསོ་ཟེར་བའི་ལས་འགུལ་སྤེལ་སྐབས་ཁོང་གིས་རྒྱ་གཞུང་གི་འདོད་པ་དང་མ་མཐུན་པའི་ལན་འདེབས་བྱས་ཤིང་རྣམ་འགྱུར་བསྟན་པས་ཡིན་ཞིང་། ད་ལྟ་ཁོང་ས་གནས་གང་དུ་བཀག་ཉར་བྱས་ཡོད་མེད་འབྲེལ་ཡོད་དགོན་གྲོང་ཚོས་ཤེས་རྟོགས་མེད་པར་གྱུར་ཡོད།
ཡང་ཁོང་དང་འདྲ་བར་རྒྱ་གཞུང་གི་འདོད་པ་དང་མི་མཐུན་པའི་ལན་འདེབས་བྱས་པ་དང་། རྣམ་འགྱུར་བསྟན་པས་གྲྭ་པ་མང་པོ་ཞིག་འཛིན་བཟུང་བཀག་ཉར་བྱས་དང་བྱེད་མུས་ཡིན་འདུག་ལ། རྔ་པ་རྫོང་ཕྱུགས་ལས་འགབ་མ་ནས་ཡིན་པའི་ཀིརྟི་དགོན་གྱི་གྲྭ་བློ་བཟང་སྦྱིན་པ་ ༼སྦྱིན་ནག༽། དང་བློ་བཟང་རྡོ་རྗེ་སོགས་ཁག་གཅིག་ཉིན་བཅུ་སྐོར་རེར་བཀག་ཉར་བྱས་ནས་གློད་བཀྲོལ་བཏང་ཡོད་ཀྱང་། དེ་མིན་ཁག་གཅིག་གློད་བཀྲོལ་མ་བྱས་པར་མུ་མཐུད་བཀག་ཉར་བྱེད་མུས་སུ་ཡོད་པ་སོགས་ཧ་ཅང་མང་བའི་གནས་ཚུལ་རྒྱུན་དུ་ཡོང་གི་འདུག་ནའང་རེ་རེ་བཞིན་ཤེས་རྟོགས་དཀའ་བའི་གནས་སུ་གྱུར།
དེ་བཞིན་ཕྱི་ཟླ་ ༥ ཚེས་ཤར་ལ་གྲྭ་པ་རྣམས་རེ་རེ་བཞིན་དཔར་བརྒྱབ་ཡོད་པ་དང་། སྐབས་དེར་རྒྱུ་རྐྱེན་སྣ་ཚོགས་དབང་གིས་དཔར་རྒྱག་མ་ཐུབ་པའི་གྲྭ་པ་རྣམས་དེང་སྐབས་དགོན་པའི་ནང་ཡོང་མི་ཆོག་པའི་བཀག་སྡོམ་བྱས་ཏེ་ཕྱོགས་མང་པོ་ནས་དཀའ་ངལ་བཟོ་བཞིན་ཡོད་འདུག ཕྱོགས་མཚུངས་དམག་དཔུང་དང་ཉེན་རྟོག་པ། དམིགས་བསལ་ཉེན་རྟོག་པ་བཅས་ཀྱིས་དམ་བསྒྲགས་ཤུགས་ཆེའི་འོག་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་མུ་མཐུད་སྤེལ་བཞིན་ཡོད་འདུག དེ་སྔོན་ཕྱི་ཟླ་ ༤ ཚེས་ ༢༢ ཉིན་གྱི་སྔ་དྲོ་ཀིརྟི་དགོན་པའི་ནང་ནས་གྲྭ་པ་ ༣༠༠ ལྷག་བཙན་ཁྲིད་བྱས་པའི་ཁོངས་མཚོ་སྔོན་ཞིང་ཆེན་གྱི་ཁོངས་གཏོགས་མགོ་ལོགས་གཅིག་སྒྲིལ་རྫོང་ཁང་གསར་མ་དང་སྨིན་ཐང་ནས་ཡིན་པའི་གྲྭ་པ་སྐོར་ཞིག་སོ་སོའི་ཕ་ཡུལ་དུ་བཏང་ཡོད་ཚུལ་འདུག་ནའང་དངོས་ཡོད་ཡིན་མིན་དང། ཞིབ་ཕྲའི་གནས་ཚུལ་ཤེས་རྟོགས་མེད་པའི་གནས་སུ་རྒྱུར་ཡོད་པ་བཅས།།