༢༠༡༡  ཟླ་ ༥ ཚེས་ ༣ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༢ ཉིན་ཀིརྟི་བྱེས་པ་གྲྭ་ཚང་གི་དགེ་འདུན་པ་དང་ལྡི་ལིར་གནས་སྡོད་བྱེད་བཞིན་པའི་བོད་མི་སོགས་ཁྱོན་མི་གྲངས་ ༥༠༠ ཙམ་ནས་རྒྱལ་ས་ལྡི་ལིའི་ར་ཇེ་བྷར་ (Rajgarh) ཞེས་པའི་ས་གནས་ནས་ (Jantar Mantar) ཇན་ཊར་མན་ཊར་བར་བོད་ནང་གི་རྔ་པ་ཀིརྟི་དགོན་པ་ཛ་དྲག་གི་གནས་སྟངས་ལས་གྲོལ་ཆེད་ཞི་བའི་གོམ་འགྲོས་གནང་རྗེས་དེར་གསུང་བཤད་ཀྱི་ལས་རིམ་ཞིག་གོ་སྒྲིག་ཞུས་ཡོད་པར་ལྟར། བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་གིས་གཙོས་སྤྱྲི་འཐུས་ཁག་གཅིག་དང་། ས་མ་ཇེ་ཝ་ཌི་ཚོགས་པའི་ (Samajwadi Party) ས་གནས་ཀྱི་ཚོགས་གཙོ་ལྕམ་སྐུ་ (Usha Yadav) ཨུ་ཤ་ཡཱ་ཌེབ་མཆོག་དང་ (BJP) བི་ཇེ་པི་ས་གནས་ཀྱི་ཚོགས་གཙོ་སྐུ་ཞབས་(Mahesh Chadda)མ་ཧེ་ཤ་ཅ་ཌ་མཆོག དེ་བཞིན་གནད་ཡོད་མི་སྣ་སོགས་གདན་ཞུས་ལྟར་ཕེབས་ཆེད་གནང་ཡོད།
དེ་ཡང་ལྕམ་སྐུ་ཨུ་ཤ་ཡཱ་ཌོ་མཆོག་གིས་གསུང་བཤད་གནང་དོན། ང་ཚོའི་ཚོགས་པའི་ངོས་ནས་བོད་དོན་ཐོག་རྒྱབ་སྐྱོར་ཆ་ཚང་ཡོད་ཞུས་མུས་ཡིན་པ་མ་ཟད། ལྷག་པར་ད་ལྟ་རྔ་པ་ཁུལ་གྱི་ཛ་དྲག་གནས་སྟངས་ཐོག་ཡོད་པར་གདུང་སེམས་མཉམ་སྐྱེ་ཞུ་རྒྱུ་དང་ལྷན་ང་ཚོའི་ཚོགས་པའི་ངོས་ནས་དཔུང་པ་མཉམ་གཤིབ་ཀྱིས་འཐབ་རྩོད་བྱེད་རྒྱུ་ཡིན་ཞེས་གསུང་ཡོད།
དེ་ནས་བི་ཇེ་པི་ས་གནས་ཀྱི་ཚོགས་གཙོ་མ་ཧེ་ཤ་ཅ་ཌ་མཆོག་གིས་གསུང་བཤད་གནང་དོན། ངས་ཁྱེད་རྣམ་པས་སྤེལ་བའི་ལས་འགུལ་ལ་ཡི་རང་བསྔགས་བརྗོད་ཞུ་རྒྱུ་དང་ཆབས་ཅིག་རྒྱ་ནག་གཞུང་ནས་བོད་མི་རིགས་ཀྱི་གོམས་སྲོལ་བཟང་པོ་དང་ཐུན་མོང་མ་ཡིན་པའི་ནང་པ་སངས་རྒྱས་ཀྱི་ཆོས་རྩ་མེད་བཟོ་བཞིན་ཡོད་པ་དེ་ནི་འབུ་བས་ཆེ་ཆུང་ཟོས་ཀྱི་གནས་སྟངས་ཤིག་ཆགས་ཡོད། ངས་རྒྱ་ནག་གཞུང་གི་བྱེད་སྟངས་དེ་རིགས་ལ་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན། དེ་བཞིན་ང་ཚོའི་ཚོགས་པའི་ངོས་ནས་ད་བར་བོད་དོན་ཐོག་ལོ་བཅུ་གཉིས་ལྷག་ཙམ་རྒྱབ་སྐྱོར་མུ་མཐུད་བྱས་པ་མ་ཟད། དངོས་སུ་བོད་དོན་དང་འབྲེལ་བའི་ལས་འགུལ་དུ་མ་ཞིག་སྤེལ་ཡོད། བོད་མིའི་རང་དབང་འཐབ་རྩོད་ལ་ང་ཚོའི་ཚོགས་པའི་ངོས་ནས་ད་དུང་ཡང་རྒྱབ་སྐྱོར་མུ་མཐུད་བྱེད་རྒྱུ་ཡིན། སོགས་ཀྱི་གསུང་བཤད་གནང་།
དེ་ནས་བོད་མི་མང་སྤྱི་འཐུས་ཚོགས་གཞོན་མཆོག་གིས་ཧིན་རྡི་དང་དབྱིན་སྐད་ཐོག་ནས་ད་ལྟ་རྔ་པ་ཀིརྟི་དགོན་པར་འཕྲད་བཞིན་པའི་ཛ་དྲག་དཀའ་ངལ་ཁག་དེར་བསྡུས་རྒྱ་གར་མི་མང་ལ་གསལ་བཤད་གནང་བ་མ་ཟད། རང་དབང་དང་འགྲོ་བ་མིའི་ཐོབ་ཐང་སོགས་ལ་གུས་བརྩི་དང་རྒྱབ་སྐྱོར་བྱེད་མཁན་རྒྱ་གར་གྱི་མང་ཚོགས་ངོས་ནས་བོད་ནང་གི་ཛ་དྲག་གནས་སྟངས་ལ་དོ་སྣང་དང་སེམས་ཁུར་གནང་དགོས་པའི་འབོད་སྐུལ་ཞུས་པ་དང་ལྷན་གོམ་འགྲོས་ལ་མཉམ་ཞུགས་གནང་མཁན་གྱི་བོད་མི་རྣམས་ལ་གསུང་བཤད་གནང་དོན། ད་ལྟའི་གནས་སྐབས་ལ་བོད་ནང་གི་རྔ་པ་ཀིརྟི་དགོན་པའི་གནས་སྟངས་སྤྱི་དང་། བྱེ་བྲག་ས་གནས་མི་མང་རྣམས་ཀྱིས་མྱོང་བཞིན་པའི་དཀའ་སྡུག་དེ་དག་ལས་ཆེ་བ་ཞིག་ང་ཚོ་རྒྱ་གར་ནང་ཡོད་པའི་བོད་མི་རྣམས་ནས་མྱོང་གི་མེད། འོན་ཀྱང་ང་ཚོ་ཚང་མས་བོད་ནང་གི་གནས་སྟངས་དེའི་ཐོག་རྡོག་རྩ་ཆིག་སྒྲིལ་གྱི་སྒོ་ནས་ལས་ཀ་བྱས་དང་བྱེད་བཞིན་ཡོད་ལ་ད་དུང་ཡང་མུ་མཐུད་གནང་རྒྱུ་གལ་ཆེན་མཐོང་གི་ཡོད་ཅེས། སོགས་ཀྱི་གསུང་བཤད་གནང་ཡོད་པ་བཅས། །