༢༠༡༡ ཟླ་ ༥ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༥ ཉིན་དབྱིན་ཡུལ་བོད་གཞུང་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་ཀྱིས་འཛམ་གླིང་ནང་སྙན་གྲགས་ཆེ་བའི་དབྱིན་ཇིའི་ཨོ་སོ་ཕོཌ་གཙུག་ལག་སློབ་གྲྭ་ནས་རྒྱང་ཐག་མེ་ལི་ ༢༥ ཙམ་གྱི་སར་རྟེན་གཞི་བྱས་པའི་ཏུ་ཌོར་བུད་མེད་སློབ་གྲྭའི་ (Tudor Hall ) སློབ་ཕྲུག་རྣམས་ལ་བོད་དོན་ངོ་སྤྲོད་གནང་ཡོད།
དེ་ཡང་སློབ་གྲྭ་དེའི་དགེ་ཆེ་ཟུར་པ་བོད་དོན་རྒྱབ་སྐྱོར་བ་ཚེ་འདས་ལྕམ་ན་ནེ་ཏི་གྷོ་ཕི་རེ་ (Nanette Godfrey) ལགས་ཀྱི་རྗེས་དྲན་སྲུང་བརྩི་ཞུ་རྒྱུའི་ཉིན་མོ་དང་སྟབས་བསྟུན།  ཏུ་ཌོར་སློབ་གྲྭའི་བུད་མེད་སློབ་དགེ་ཌེའི་ན་ཧུ་ཇེ་སི་ (Daina Huges) ལགས་ཀྱིས་མགྲོན་འབོད་ལྟར་བོད་གཞུང་སྐུ་ཚབ་དོན་གཅོད་ཀྱིས་ཏུ་ཌོར་བུད་མེད་སློབ་གྲྭའི་སློབ་མ་རྣམས་དང་གཞན་ཡང་ཉེ་འཁོར་སློབ་གྲྭ་ཁག་གཅིག་གི་སློབ་ཕྲུག་ཚོར་ད་ལྟའི་བོད་ཀྱི་གནད་དོན་སྐོར་དང་བཙན་བྱོལ་བོད་མིའི་གནས་སྟངས།  ༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་འོག་བོད་མི་ཚོར་མིང་དོན་མཚུངས་པའི་རང་སྐྱོང་ཡོང་ཐབས་མཛད་བཞིན་པ་དེ་ནི་དངོས་ཡོད་གནས་ཚུལ་དང་ཡོངས་སུ་འཚམས་པ་ཞིག་ཡིན་སྐོར་དང་། མགོན་པོ་གང་ཉིད་མཆོག་གིས་འཚེ་མེད་ཞི་བའི་ལྟ་གྲུབ་དེར་བོད་པའི་མི་རབས་གཞོན་སྐྱེས་ཚོས་ཆོད་སེམས་གཏན་པོ་བཅང་དགོས་པ་དང་དབུ་མའི་ལམ་ལ་རེ་བ་དོར་རྒྱུ་མེད་སྐོར།  དེ་བཞིན་རྒྱ་ནག་ནང་བོད་ཀྱི་གནད་དོན་ལ་དོ་སྣང་བྱེད་མཁན་ཇེ་མང་འགྲོ་བཞིན་ཡོད་པར་བརྟེན།  ་རིམ་བཞིན་བོད་མི་ཚོར་འགྲོ་བ་མིའི་ཐོབ་ཐང་ལ་ངོས་འཛིན་ཐོབ་རྒྱུའི་རེ་བ་ཡོད་སྐོར་སོགས་ཀྱི་ངོ་སྤྲོད་གསུང་བཤད་་གནང་གྲུབ་བསྟུན་འཇིགས་བྲལ་ཞེས་པའི་དངོས་བྱུང་གློག་བརྙན་བསྟན་ཡོད།
དེ་རྗེས་སློབ་མ་རྣམས་ཀྱི་དྲི་བར་སྐུ་ཚབ་དོན་གཅོད་ཀྱིས་ལན་འདེབས་གནང་གྲུབ་མཚམས། དབྱིན་ཡུལ་བོད་རིགས་ཚོགས་པའི་དྲུང་ཆེ་བསྟན་འཛིན་རང་གྲོལ་ལགས་ཀྱིས་བདེན་ཚིག་སྨོན་ལམ་དབྱངས་སུ་ལེན་ཡོད།  མཐར་ཏུ་ཌོར་སློབ་གྲྭའི་བུད་མེད་སློབ་དགེ་ཌའི་ན་ཧུ་ཇེ་སི་ལགས་ཀྱིས་སྐུ་ཚབ་དོན་གཅོད་དང་བསྟན་འཛིན་རང་གྲོལ་ལགས་རྣམ་གཉིས་ལ་ཐུགས་རྗེ་ཆེ་ཞུས་པ་དང་སྦྲགས་མ་འོངས་པར་གཞོན་སྐྱེས་ཚོས་བོད་མི་ཚོར་རྒྱབ་སྐྱོར་གནང་རྒྱུའི་རེ་བ་ཡོད་སྐོར་གསུངས་པ་དང་སྦྲགས་ལྷན་ཚོགས་གྲོལ།
བོད་དོན་རྒྱབ་སྐྱོར་བ་ཚེ་འདས་ལྕམ་ན་ནེ་ཏི་གྷོ་ཕི་རེ་ (Nanette Godfrey) ལགས་ནི་ཕྱི་ལོ་ ༡༩༨༤ ནས་ ༢༠༠༣ བར་ཏུ་ཌོར་བུད་མེད་སློབ་གྲྭའི་དགེ་ཆེ་གནང་ཡོད་པ་དང་། ཚེ་འདས་དེ་ཉིད་བོད་དོན་ཐོག་ལྷག་བསམ་རྣམ་དག་གི་རྒྱབ་སྐྱོར་གནང་མཁན་ཞིག་ཡིན་འདུག  ཏུ་ཌོར་སློབ་གྲྭའི་བུད་མེད་སློབ་དགེ་ཌའི་ན་ཧུ་ཇེ་སི་ལགས་ནི་ཕྱི་ལོ་ ༡༩༤༠ ལོར་དབྱིན་ཇིའི་ཚོགས་སྡེ་ལྷ་སར་བསླེབས་པའི་ནང་སྨན་པ་ཧེ་རི་སི་ཊན་ཊོན་ (Harry Staunton) ལགས་ཀྱི་སྲས་མོ་ཡིན་པ་དང་། ཧེ་རི་སི་ཊན་ཊོན་ལགས་བོད་དུ་ཡོད་སྐབས་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གསེར་ཁྲི་མངའ་གསོལ་གྱི་མཛད་སྒོ་དངོས་སུ་གཟིགས་ཐུབ་ཡོད།  སློབ་དགེ་ཌའི་ན་ཧུ་ཇེ་སི་ལགས་རང་གི་ཕ་དམ་པ་བརྒྱུད་བོད་ཀྱི་གནད་དོན་ཤེས་ཏེ་བོད་དོན་ལ་རྒྱབ་སྐྱོར་གནང་མཁན་ཞིག་ཆགས་ཡོད་པ་བཅས།།