༢༠༡༡ ཟླ་ ༥ ཚེས་ ༢༨ རེས་གཟའ་སྤེན་པ།
༄༅། །འདི་གར་བོད་གཞུང་ཐེ་ཝན་སྐུ་ཚབ་དོན་ཁང་ནས་ཕྱི་ལོ་ ༢༠༡༡ ཟླ་ ༥ ཚེས་ ༢༧ ཉིན་བཏང་གནས་ནང་འཁོད་དོན། ཐེ་ཝན་རྒྱལ་གཉེར་ཀྲུང་ཤིན་གཙུག་ལག་སློབ་གྲྭ་ཆེན་མོའི་རྒྱལ་སྤྱིའི་སྲིད་དོན་ཞིབ་འཇུག་སྡེ་ཚན་ནས་ཟླ་རེའི་ནང་རྒྱལ་སྤྱིའི་སྲིད་དོན་འཕོ་འགྱུར་དང་འབྲེལ་བའི་ལེགས་སྦྱར་གོ་སྒྲིག་ཞུ་བཞིན་ཡོད་པ་ལྟར།  ཕྱི་ཟླ་ལྔ་པའི་ལས་རིམ་ཁོངས་རྒྱ་གར་ནི་ཧ་རུ་གཙུག་ལག་སློབ་གྲྭ་ཆེན་མོའི་དགེ་རྒན་དང་། དབྱིན་ལན་དུ་བཅའ་སྡོད་ཐེ་ཝན་གྱི་གཞུང་ཚབ། བོད་གཞུང་ཐེ་ཝན་སྐུ་ཚབ་དོན་གཅོད་སོགས་ཀྱི་ལེགས་སྦྱར་གོ་སྒྲིག་གནང་ཡོད།
དེ་ཡང་དེང་སྐབས་ཐེ་ཝན་གྱིས་གཙོས་རྒྱལ་སྤྱིའི་ཐོག་བཙན་བྱོལ་བོད་མིའི་འོས་བསྡུའི་སྐོར་ལ་དོ་སྣང་ཤུགས་ཆེ་བྱེད་བཞིན་ཡོད་པ་ལྟར། ཕྱི་ཟླ་ ༥ ཚེས་ ༢༦ ཉིན་བོད་གཞུང་ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་གདན་ཞུ་གནང་བ་དང་། ཁོང་གིས་སློབ་མ་རྣམས་ལ་བཙན་བྱོལ་བོད་ཀྱི་མང་གཙོའི་འཕེལ་རིམ་དང་དོན་སྙིང་ཞེས་པའི་བརྗོད་གཞིའི་ཐོག་ནས་གཙོ་བོ་དོན་ཚན་ཆེ་བ་གསུམ་སྟེ་བོད་ཀྱི་རྒྱལ་རབས་ལོ་རྒྱུས་ཐོག་ཁྲིམས་དང་ལམ་ལུགས་ཀྱི་འགྲོ་སྟངས་དང་། བཙན་བྱོལ་ནང་མང་གཙོའི་འཕེལ་རིམ། ཐེངས་འདིའི་བཙན་བྱོལ་བོད་མིའི་འོས་བསྡུའི་བརྒྱུད་རིམ་ཞིབ་ཕྲ་དུས་ཡུན་ཆུ་ཚོད་གསུམ་རིང་ངོ་སྤྲོད་གནང་ཞིང་། སློབ་ཕྲུག་ཚོས་དོ་སྣང་ཆེན་པོས་ཉན་པ་མ་ཟད། སློབ་མ་ཚོའི་འདྲི་བ་ཁག་ལ་ལན་འདེབས་བྱས་པ་བརྒྱུད་བཙན་བྱོལ་བོད་མིའི་མང་གཙོའི་སྐོར་ལ་སྔར་ལྷག་གི་ཤེས་རྟོགས་བྱུང་ཡོད་པ་བཅས།།