༢༠༡༡ ཟླ་ ༥ ཚེས་ ༡༣ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡༢ རེས་གཟའ་ཕུར་བུའི་ཉིན་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་མངའ་སྡེ་ཨར་ཀན་སིའི་ནང་གི་མཛད་འཕྲིན་རྣམས་ལེགས་པར་གྲུབ་སྟེ་ནིའུ་ཇར་སི་མངའ་སྡེའི་གྲོང་ཁྱེར་ནི་ཝཀ་ (Newark in New Jersey) ནང་ཆིབས་སྒྱུར་གྱིས་ས་གནས་དེར་༸ཞབས་སོར་འཁོད་མཚམས་གྲོང་ཁྱེར་ནི་ཝཀ་ནང་ཡོད་པའི་བོད་ཁང་གི་ (Tibet House) བོད་ཀྱི་ནང་ཆོས་ཀྱི་གཙུག་ལག་སློབ་དཔོན་ཆེན་མོ་སྐུ་ཞབས་རོ་བྷ་ཌ་ཐུར་མན་ (Prof. Robert Thurman) ལགས་ཀྱིས་ཕེབས་བསུ་གཟབ་རྒྱས་ཞུས། ཉིན་རྒྱབ་མགོན་པོ་གང་ཉིད་མཆོག་གིས་ཨ་རི་དང་ཉི་ཧོང་། མེཀ་སི་ཀོ། རྒྱ་གར། རྒྱ་ནག་ཤིང་ཧ་བཅས་གསར་འགྱུར་བརྒྱུད་ལམ་འདྲ་མིན་ནས་གསར་འགོད་པ་མི་གྲངས་ ༥༠ ཙམ་གྱི་དྲི་བར་བཀའ་ལན་མཛད། དེ་དང་གསར་འགོད་ལྷན་ཚོགས་སྐབས་ཐོག་མར་སྐུ་ཞབས་རོ་བྷ་ཊ་ཐུར་མན་ལགས་ཀྱིས་གསར་འགོད་པ་ཚོར་ངོ་སྤྲོད་ཀྱི་གསུང་བཤད་གནང་གྲུབ་བསྟུན། ༸གོང་ས་མཆོག་གིས་ཐོག་མར་འགྲོ་བ་མིའི་རིན་ཐང་གོང་འཕེལ་དང་ཆོས་ལུགས་མཐུན་སྒྲིལ་སྐོར་བཀའ་སློབ་སྩལ། དེ་རྗེས་གསར་འགོད་པས་རྒྱ་ནག་གཞུང་དང་གྲོས་མོལ་མཛད་རྒྱུ་དང་༸གོང་ས་མཆོག་གི་ཡང་སྲིད་འཚོལ་རྒྱུའི་གྲ་སྒྲིག་ཡོད་མེད་ཀྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་རྒྱ་ནག་གི་དབུ་ཁྲིད་ཚོ་དང་ལྷན་ཐོག་མར་ཕྱི་ལོ་ ༡༩༧༩ ནས་ཐད་ཀར་འབྲེལ་བ་བྱུང་རྗེས་ཕྱི་ལོ་ ༡༩༨༠ ནང་རེ་བ་ཆེན་པོ་བྱུང་ཡོད་ཀྱང་ཕྱི་ལོ་ ༡༩༩༠ ནང་འབྲེལ་ལམ་ཆད་ཚུལ། སླར་ཡང་ཕྱི་ལོ་ ༢༠༠༢ ལོར་འབྲེལ་ལམ་བསྐྱར་གསོ་བྱུང་སྟེ་ད་བར་འབྲེལ་མོལ་ཐེངས་དགུ་ཙམ་བྱུང་ཡོད་ཀྱང་བཟང་ཕྱོགས་སུ་གྲུབ་འབྲས་གང་ཡང་བྱུང་མེད་པ་དང་། རང་ཕྱོགས་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་འོག་བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབ་ཡོང་རྒྱུའི་བསམ་ཚུལ་བཏོན་པ་དེ་ཡང་མངོན་པར་མི་གསལ་བའི་རང་བཙན་རྩོད་ཀྱི་ཡོད་སྐོར་རྒྱ་ནག་གཞུང་གིས་བརྗོད་སྐོར་བཀའ་ལན་སྩལ།
དེ་བཞིན་༸གོང་ས་མཆོག་གིས་བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་ནའང་ང་ཚོའི་ཕྱོགས་ནས་རྒྱ་ནག་དང་སྐད་ཆ་ཤོད་རྒྱུ་རྒྱུན་དུ་གྲ་སྒྲིག་ཡོད་ཚུལ་དང་། བོད་ནང་དངོས་ཡོད་དཀའ་ངལ་ཡོད་པ་དེ་རྒྱ་གཞུང་གིས་ངོས་ལེན་བྱེད་ཀྱི་མེད་པ་དང་། དེར་བརྟེན་བོད་ནང་དངོས་ཡོད་དཀའ་ངལ་ཡོད་མེད་རྟོག་ཞིབ་སླད་གསར་འགོད་པ་ཚོས་བོད་ནང་དངོས་སུ་ཕྱིན་ཏེ་གནས་ཚུལ་ངོ་མ་ཇི་ཡིན་ཞིབ་འཇུག་བྱེད་དགོས་པ་དང་། སྔ་ཕྱི་མ་གཏོགས་བོད་ཀྱི་དཀའ་ངལ་སེལ་དགོས་པ་ཆགས་ཡོད་ཅེས་བཀའ་ལན་སྩལ་ཡོད་མ་ཟད། མགོན་པོ་གང་ཉིད་མཆོག་གི་ཡང་སྲིད་སྐོར་གྱི་དྲི་བར་བཀའ་ལན་སྩལ་དོན། བཙན་བྱོལ་དུ་ཡོད་པའི་བོད་ཀྱི་ཆོས་བརྒྱུད་ཆེན་པོའི་བླ་ཆེན་རྣམས་སྐབས་སྐབས་ལ་ལྷན་འཛོམས་ཀྱིས་༸རྒྱལ་བའི་ཡང་སྲིད་སྐོར་གོ་བསྡུར་གནང་གི་ཡོད་ཀྱང་ད་བར་གྲོས་ཆོད་གཏན་འབེབས་གང་ཡང་བྱུང་མེད། གཅིག་བྱས་ན་འདི་ལོ་སླར་ཡང་བླ་ཆེན་རྣམས་ལྷན་འཛོམས་གནང་རྒྱུའི་འཆར་གཞི་ཡོད་སྐོར་བཀའ་ལན་སྩལ་བ་མ་ཟད། གསར་འགོད་པ་ཚོར། ངོས་ཀྱི་ངོ་གདོང་ལ་བལྟས་ན་ཡང་སྲིད་འཚོལ་རྒྱུ་བྲེལ་བ་བྱ་དགོས་འདུག་གམ་ཞེས་ཞལ་ཤོབ་དང་སྦྲགས་བཀའ་ལན་སྩལ། དེ་བཞིན་གསར་འགོད་པ་གཅིག་གིས་རྒྱ་ནག་གཞུང་གིས་ཕྱི་ལོ་ ༢༠༡༣ ལོར་རྒྱ་གར་གྱི་གནས་སྐོར་བ་སྟོད་གངས་རིན་པོ་ཆེར་འགྲོ་རྒྱུར་དམ་བསྒྲགས་བྱེད་རྒྱུ་ཡིན་པའི་གནས་ཚུལ་སྐོར་གྱི་དྲི་བ་ཕུལ་བར་སྟོད་གངས་རིན་པོ་ཆེ་རྒྱ་གར་ཧིན་རྡུའི་ཆོས་པ་ཚོའི་གནས་རྩ་ཆེན་པོ་ཞིག་ཆགས་པར་བརྟེན་གནས་སྐོར་བ་ཚང་མ་འགྲོ་འཇུག་དགོས་ལུགས་བཀའ་ལན་སྩལ། སྐབས་དེར་རྒྱ་ནག་ཤིང་ཧ་གསར་འགོད་པས་༸གོང་ས་མཆོག་ལ་དྲི་བ་ཕུལ་མེད།།
