༢༠༡༡ ཟླ་ ༥ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༧ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་མངའ་སྡེ་མིན་ནི་སོ་ཊའི་རྒྱལ་ས་མི་ནེ་པོ་ལི་སིའི་ནང་ཐོག་མར་གསར་འགོད་པ་ཚོར་མཇལ་ཁ་དང་ཁོང་ཚོའི་དྲི་བར་བཀའ་ལན་སྩལ། དེ་རྗེས་ས་གནས་བོད་རིགས་ཚོར་ལམ་སྟོན་བཀའ་སློབ་སྩལ་གྲུབ་བསྟུན། ཉིན་རྒྱབ་མགོན་པོ་གང་ཉིད་མཆོག་གིས་བཞུགས་གནས་མགྲོན་ཁང་དུ་དེང་སྐབས་ནང་ཆོས་ཀྱི་གནས་སྟངས། ཞེས་པའི་བགྲོ་གླེང་ཚོགས་འདུར་ཆིབས་སྒྱུར་བསྐྱངས་ཏེ་བཀའ་སློབ་སྩལ། དེ་ཡང་སྐབས་དེར་བགྲོ་གླེང་ནང་མཉམ་ཞུགས་གནང་མཁན་མིན་ནི་སོ་ཊ་གཙུག་ལག་སློབ་གྲྭའི་སྐུ་ཞབས་ཨན་ཝལ་ཊ་ནར་(Dr.Ann Waltner)ལགས་ཀྱིས་རྒྱ་ནག་གོང་མའི་སྐབས་ཀྱི་ནང་ཆོས་དང་།  རྩོམ་པ་པོ་སྐུ་ཞབས་ལི་ཅང་ལིན་(Li Jianglin)ལགས་ཀྱིས་རྒྱ་ནག་ཏུ་ནང་ཆོས་སླར་གསོ་དང་དེའི་ཕན་འབྲས་སྐོར་དང་།  སྐུ་ཞབས་ཟེན་ཝང་(Zhen Wang)ལགས་ཀྱིས་དེང་དུས་རྒྱ་ནག་ཏུ་ནང་ཆོས་ཀྱི་གནས་སྟངས་ཞེས་པའི་བརྗོད་གཞི་སོགས་ཀྱི་སྐོར་གཏམ་བཤད་གནང་རྗེས་༸གོང་ས་མཆོག་གིས་ཐོག་མར་འགྲོ་བ་མིའི་སྤྱི་ཚོགས་ཁྲོད་བཟང་སྤྱོད་གོང་འཕེལ་ཇི་ལྟར་འགྲོ་ཚུལ་དང་། དེ་བཞིན་མི་རྣམས་ཀྱིས་གདོད་མའི་སྐབས་རང་གི་མངོན་འདོད་རྣམས་ཆོས་ལ་དད་པ་དང་ཡིད་ཆེས་ཙམ་ཞིག་གིས་ཐོག་ནས་ཡོང་རྒྱུ་ཡིན་པའི་ཡིད་ཆེས་བྱས་ཡོད་པ་དང་།   དུས་རིམ་བཞིན་ཚན་རིག་ཡར་རྒྱས་ཕྱིན་ཏེ་སྐྱེས་བུའི་མངོན་འདོད་རྣམས་འཕྲུལ་ཆས་དང་ཚན་རིག་གི་ལམ་ནས་བསྒྲུབ་ཐུབ་པ་བྱུང་ཚུལ་སྐོར་བཀའ་སློབ་སྩལ་ཡོད་པ་དང་།  དེ་བཞིན་ད་ཆ་ཚན་རིག་དང་ཆོས་གཉིས་འགལ་བ་ཡིན་པ་ལྟ་བུའི་ལྟ་ཚུལ་དེར་འགྱུར་བ་ཕྱིན་ཡོད་སྐོར་དང་།   ཚན་རིག་པ་མང་པོ་ཞིག་གིས་ནང་ཆོས་ནས་གསུངས་པའི་ཚན་རིག་གི་རྣམ་གཞག་དེར་དོ་སྣང་ཆེན་པོ་བྱེད་བཞིན་ཡོད་པ་མ་ཟད།  ཚན་རིག་པའི་ཁྲོད་ནང་ཆོས་ནས་གསུངས་པའི་ཚན་རིག་ལ་དོ་སྣང་བྱེད་རྒྱུ་ཤུགས་ཆེ་རུ་འགྲོ་རྒྱུ་ཡིན་པའི་ཡིད་ཆེས་མཛད་བཞིན་ཡོད་སྐོར་དང་།  སྟོན་པ་བཅོམ་ལྡན་འདས་རང་ཉིད་ཀྱི་བཀའ་ལའང་སློབ་མ་རྣམས་ཀྱིས་དད་པ་ཙམ་ལ་མ་བརྟེན་པར་རིག་པའི་ལམ་ནས་དཔྱད་པ་མཐིལ་ཕྱིན་པ་བྱེད་དགོས་པའི་བཀའ་སྩལ་བ་དེ་སྤྱི་ཚོགས་ཀྱི་གནས་སྟངས་ཚང་མར་འབྲེལ་བ་ཆེན་པོ་ཡོད་པ་མ་ཟད།  ལྷག་པར་རྒྱ་ནག་ནང་དུའང་འབྲེལ་བ་ཆེན་པོ་ཆགས་ཡོད་སྐོར་བཀའ་སློབ་སྩལ།    དེ་རྗེས་དྲི་བ་དྲིས་ལན་སྐབས་མགོན་པོ་གང་ཉིད་མཆོག་གིས་དེང་རབས་ཅན་གྱི་རྒྱ་ནག་དེ་དུས་རབས་བཞིར་ཆ་བགོས་མཛད་བཞིན་ཡོད་པ་དང་། དང་པོ་མའོ་ཙེ་ཏུང་གི་དུས་རབས་སྐབས་གུང་བྲན་གྱི་ལྟ་གྲུབ་གཙོ་བཟུང་བྱས་ཡོད་པ་དང་། དེ་རྗེས་ཏིང་ཞའོ་ཕིང་སྐབས་དཔལ་འབྱོར་གཙོ་་བཟུང་བྱས་ཡོད། དེ་རྗེས་ཅང་ཅེ་མིན་དུས་སྐབས་སུ་གུང་ཁྲན་རིང་ལུགས་ཀྱིས་མཚོན་དོན་ལ་འགྱུར་བ་གཏོང་ཚུལ་དང་། མཐར་ཧུའུ་ཅིན་ཐའོ་དུས་སྐབས་འདིར་འཆམ་མཐུན་གྱི་སྤྱི་ཚོགས་བསྐྲུན་རྒྱུའི་འབོད་སྒྲ་སྒྲོག་བཞིན་ཡོད་སྐོར་སོགས་བཀའ་སློབ་སྩལ་ཡོད་པ་བཅས།།