༢༠༡༡ ཟླ་ ༥ ཚེས་ ༡༦ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་དང་ཨ་རིའི་གྲོང་ཁྱེར་ཆེ་ཁག་ལྔའི་ནང་རླབས་ཆེན་གྱི་མཛད་འཕྲིན་ཁག་ལེགས་པར་གྲུབ་སྟེ་ཕྱི་ལོོ་ ༢༠༡༡ ཟླ་ ༥ ཚེས་ ༡༦ ཉིན་རྒྱབ་ཆུ་ཚོད་ ༡།༡༥ ཙམ་ག་གྷལ་གནམ་ཐང་དུ་༸ཞབས་སོར་འཁོད་སྐབས་བཙན་བྱོལ་བོད་གཞུང་གི་བཀའ་ཁྲི་ཟམ་གདོང་རིན་པོ་ཆེ་མཆོག་གིས་དབུས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། གཞོན་ནུ་དང་བུད་མེད་ལྷན་ཚོགས་ཀྱི་སྐུ་ཚབ་བཅས་ནས་ཕེབས་བསུ་གཟབ་རྒྱས་ཞུས་ཡོད། དེ་ནས་མགོན་པོ་གང་ཉིད་མཆོག་ཕེབས་འགྲོའི་ཐོག་ཆིབས་སྒྱུར་གྱིས་ཐེག་ཆེན་ཆོས་གླིང་གཙུག་ལག་ཁང་གི་མདུན་དུ་༸ཞབས་སོར་འཁོད་སྐབས་ཆེས་མཐོའི་ཁྲིམས་ཞིབ་པ་མཆོག་དང། བོད་མི་མང་སྤྱི་འཐུས་ཚོགས་གཞོན་མཆོག ཆོས་རིག་བཀའ་བློན་མཆོག འཕྲོད་བསྟེན་བཀའ་བློན་མཆོག དེ་བཞིན་དད་ལྡན་སེར་སྐྱ་མི་མང་རྣམས་ནས་ལག་ཏུ་དཀར་གཙང་གི་མཇལ་དར་ཐོགས་ཏེ་དགའ་དད་སྤྲོ་གསུམ་སྒོ་ནས་ཕེབས་བསུ་གཟབ་རྒྱས་ཞུས་ཡོད་པ་བཅས།།