༢༠༡༡ ཟླ་ ༤ ཚེས་ ༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༧ ཉིན་ཨ་རིའི་ཤར་ཨེ་ཤི་ཡ་དང་ཞི་བདེ་རྒྱ་མཚོའི་ལས་དོན་ཚོགས་ཆུང་གི་ལས་དྲུང་སྐུ་ཞབས་ཀུཊ་ཀེམ་བྷེལ་མཆོག་ (Kurt Cambell) རྒྱ་ནག་ཏུ་རྒྱལ་དོན་འཚམས་གཟིགས་སུ་ཕེབས་འདུག  དེ་ཡང་རྒྱལ་སྤྱིའི་བོད་དོན་ལས་འགུལ་ཚོགས་པས་ (ICT) ལས་དྲུང་མཆོག་རྒྱ་ནག་ཏུ་རྒྱལ་དོན་འཚམས་གཟིགས་དེའི་སྐབས་རྒྱ་ནག་དང་བོད་ནང་འགྲོ་བ་མིའི་ཐོབ་ཐང་གི་གནས་སྟངས་སྐོར་ངེས་པར་དུ་འབྲེལ་ཡོད་རྒྱ་ནག་གི་གཞུང་འབྲེལ་དཔོན་རིགས་ཚོ་དང་ལྷན་གྲོས་མོལ་གནང་དགོས་པའི་རེ་འདུན་ཤུགས་ཆེ་བཏོན་ཡོད། རྒྱལ་སྤྱིའི་བོད་དོན་ལས་འགུལ་ཚོགས་པའི་ཚོགས་གཙོ་ལྕམ་སྐུ་མེ་རི་བྷེ་ཐི་མར་ཀེ་ (Mary Beth Markey) མཆོག་གི་རེ་འདུན་གྱི་ཞུ་ཡིག་དེའི་ནང་ཉེ་ལམ་རྒྱ་ནག་དང་བོད་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པའི་གནས་སྟངས་སྐོར་རྒྱ་ནག་གི་དཔོན་རིགས་ཚོར་གསལ་བཤད་ནན་པོ་བྱེད་དགོས་སྐོར་འཁོད་ཡོད་པ་མ་ཟད། བོད་ནང་ཕྱི་ཟླ་ ༣ ནང་ཨ་མདོ་རྔ་པའི་དགེ་འདུན་པ་ཞིག་གིས་རྒྱ་ནག་གི་སྲིད་བྱུས་ལ་ངོ་རྒོལ་ཆེད་རང་སྲོག་གཅོད་དགོས་པའི་གནས་སྟངས་ཆགས་པ་སོགས་དང་། ཕྱོགས་མཚུངས་བོད་ནང་དགེ་འདུན་པ་གཉིས་རྒྱ་མིའི་ཉེན་རྟོག་མི་སྣས་བཀག་ཉར་འོག་མནར་གཅོད་བཏང་སྟེ་མཐར་ཁོང་གཉིས་པོ་འདས་གྲོངས་སུ་གྱུར་བའི་གནས་སྟངས་རྣམས་ཞིབ་ཕྲ་འཁོད་ཡོད།
དེ་ཡང་གནད་དོན་འདི་དང་འབྲེལ་ནས་རྒྱལ་སྤྱིའི་བོད་དོན་ལས་འགུལ་ཚོགས་པའི་གཞུ་ཡིག་ནང་ཨ་རིའི་ཤར་ཨེ་ཤི་ཡའི་སྐུ་ཚབ་མཆོག་ལ་དམིགས་སྐར་གྱི་གསལ་བཤད་གནང་དོན།  ཐེངས་འདིའི་ཨ་རི་དང་རྒྱ་ནག་དབར་ཚོང་དོན་ལྷན་ཚོགས་སྐབས་ཨ་རིའི་སྲིད་གཞུང་གི་འགྲོ་བ་མིའི་ཐོབ་ཐང་ཐོག་ལངས་ཕྱོགས་ཇི་འདྲ་ཡིན་པའི་རྣམ་པ་བཏོན་རྒྱུ་དེ་ཧ་ཅང་གལ་ཆེན་པོ་ཆགས་ཡོད། དེ་ལྟར་མ་ཐུབ་ཚེ་རྒྱ་ནག་དང་བོད་ནང་འགྲོ་བ་མིའི་གཞི་རྩའི་རང་དབང་ཆེད་འཐབ་རྩོད་བྱེད་མཁན་ཚོར་བརྡ་ལན་ལོག་པ་ཞིག་གཏོང་རྒྱུ་མ་ཟད། ཨ་རིའི་སྲིད་འཛིན་མཆོག་གིས་ཕྱི་ཟླ་ ༡ ནང་རྒྱ་ནག་གི་སྲིད་འཛིན་ཧུ་ཅིན་ཐའོ་ལ་འགྲོ་བ་མིའི་ཐོབ་ཐང་ཡར་རྒྱས་གཏོང་དགོས་པའི་གཏམ་བཤད་དེ་ནུས་པ་མེད་པ་ཞིག་ཏུ་འགྲོ་ངེས་ཡིན་ཞེས་སོགས་འཁོད་ཡོད་པ་བཅས།།