༢༠༡༡ ཟླ་ ༤ ཚེས་ ༢༠ རེས་གཟའ་ལྷག་པ།
ཁྲོམ་གཞུང་དུ་ཟླ་ ༣ ཚེས་ ༡༦ ཉིན་རྒྱ་མིའི་དམག་དཔུང་། photo-free Tibet/london
༄༅། །འདི་གར་བཞུགས་སྒར་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ་ཕྱི་ལོ་ ༢༠༡༡ ཟླ་ ༤ ཚེས་ ༡༩ ཉིན་འབྱོར་བའི་བོད་ཨ་མདོ་རྔ་བའི་གནས་ཚུལ་ཁག་ཅིག་དང་། ཕྱི་ཚེས་ ༡༨ ཉིན་ཡང་ཉིན་ཤས་སྔོན་དང་འདྲ་བར་རྔ་བ་རྫོང་དང་མཛོད་དགེ་རྫོང་གི་ལས་བྱེད་པ་ཧ་ཅང་མང་པོ་ཞིག་རྔ་བ་ཀིརྟི་དགོན་པའི་ནང་ལ་ཡོང་ནས་དགེ་འདུན་པ་རྣམས་ལ་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་ལས་འགུལ་མུ་མཐུད་སྤེལ་ཡོད། ཕྱི་ཚེས་ ༡༩ ཉིན་གྱི་ཕྱི་དྲོ་གྲྭ་ཤག་རེ་རེ་བཞིན་དུ་དྲག་ཆས་ཉེན་རྟོག་པ་དང་དམག་མི་ལས་བྱེད་པ་བཅས་མི་བཅུ་སྐོར་བཅུ་སྐོར་བྱས་ནས་ཉུལ་སྟེ་གྲྭ་པ་རྣམས་ལ་སྐད་ཆ་འདྲི་བ་དང་བསམ་ཚུལ་ཤོད་བཅུག་པ་སོགས་ཀྱི་གནས་ཚུལ་བྱུང་འདུག་ལ་སྐབས་དེར་དྲག་རྩུབ་ཀྱི་རྣམ་པ་ཤུགས་ཆེན་པོ་བསྟན་པ་དང་བསམ་ཚུལ་དང་ལན་འདེབས་གནང་བ་རྣམས་རྒྱའི་ལས་བྱེད་པ་ཚོའི་འདོད་པ་དང་མི་མཐུན་པ་བྱུང་སྐབས་གཅར་རྡུང་གཏོང་བ་སོགས་ཀྱང་བྱས་ཡོད་འདུག
དེང་སྐབས་ཀིརྟི་དགོན་པ་མ་ཡིན་པའི་རྔ་པའི་དགོན་པ་གཞན་རྣམས་ཀྱི་དགེ་འདུན་པ་དག་ཀྱང་རྔ་པ་རྫོང་ཐོག་གི་ཁྲོམ་གཞུང་སོགས་ལ་གཏན་ནས་ཡོང་འཇུག་གི་མེད་པར། དགོན་པ་སོ་སོའི་ནང་དངོས་ཤུགས་བརྒྱུད་གསུམ་ནས་དམ་བསྒྲགས་བཀག་སྡོམ་བྱེད་མུས་ཡིན་འདུག ཕྱི་ཚེས་ ༡༢ ཉིན་ནས་ད་བར་རྔ་བ་མི་མང་ ༢༠༠ ལྷག་གིས་རྒྱུན་དུ་རྔ་པ་ཀིརྟི་དགོན་གྱི་དགེ་འདུན་པ་རྣམས་རྒྱ་ནག་གཞུང་གིས་ལྐོག་ལ་བཙོན་ཁང་དུ་འཁྲིད་སྲིད་པའི་དོགས་ཟོན་བྱེད་མུས་ཀྱིས་དགོན་པའི་གླིང་མདོའི་སྒོ་ཆེན་དང་ཐག་ཉེ་བའི་ལམ་ཆེན་འགྲམ་དུ་ཉིན་མཚན་གཉིས་ཀར་སྲུང་བྱ་བྱས་ནས་བསྡད་ཡོད་འདུག་ལ་ཐེངས་མང་པོར་ཉེན་རྟོག་དམག་མི་ཚོས་མི་མང་རྣམས་དེར་སྡོད་མི་ཆོག་ཚུལ་བརྗོད་དེ་འཇམ་རྩུབ་གཉིས་ཀས་ཐབས་ཤེས་འདྲ་མིན་བྱས་ཀྱང་གཏན་ནས་ཕྱིར་ལོག་མ་བྱས་པར་བསྡད་ཡོད་འདུག
ཟླ་ ༣ ཚེས་ ༡༩ ཉིན་ཀིརྟི་དགོན་པའི་དགེ་འདུན་རྒྱལ་གཅེས་པ་ཕུན་ཚོགས་ལགས་ཀྱི་སྐུ་ཕུང་ཞུགས་འབུལ་སྐབས། photo-free Tibet/London
དེ་ཡང་སྐབས་དེར་ཉེན་སྲུང་བྱས་ནས་སྡོད་མཁན་མི་མང་ཆེ་བ་ལོ་ན་ ༦༠ ནས་ ༧༠ ཅན་ཡིན་འདུག་པས་ད་བར་འཛིན་བཟུང་བཀག་ཉར་བྱས་པ་སོགས་ཀྱི་གནས་ཚུལ་བྱུང་མེད། ཕྱི་ཚེས་ ༡༧ ཙམ་ནས་རྔ་པ་རྫོང་རྨེའུ་རུ་མ་འབྲོག་སྡེ་དང་། རྭ་རུ་བ་འབྲོག་སྡེ། གཅའ་ཞང་སོགས་སུ་དམག་མི་འབོར་ཆེན་བསླེབས་ནས་ཡུན་རིང་སྡོད་བརྩིས་ཀྱིས་གུར་བརྒྱབ་སྟེ་བསྡད་ཡོད་འདུག ཕྱི་ཚེས་ ༡༨ ཉིན་རྔ་པ་རྫོང་ཇེ་ལེབ་སྡེ་བ་ཡོངས་རྫོགས་རྒྱ་དམག་དང་ཉེན་རྟོག་མི་སྣ། ལས་བྱེད་པ་བཅས་ཀྱིས་སྔོག་བཤེར་བྱས་ཡོད་པ་མ་ཟད། ཕྱི་ཚེས་ ༨ ཉིན་ཕ་ཡུལ་རྨེའུ་རུ་མའི་རུ་ཆེན་དང་པོ་ནས་ཡིན་པའི་རྔ་པ་ཀིརྟི་དགོན་གྱི་དགེ་འདུན་པ་བློ་བཟང་དགེ་ལེགས་རང་ལོ་ ༢༧ ཙམ་ཡིན་པ་ཁོང་དགོན་པའི་ནང་ནས་འཛིན་བཟུང་གིས་བཀག་ཉར་བྱས་ཡོད་པ་ད་ལྟ་གང་དུ་ཡོད་མེད་སོགས་ཀྱི་གནས་ཚུལ་ཤེས་རྟོགས་མེད་པའི་གནས་སུ་ལྷུང་། གཞན་ཡང་གསལ་འདེབས་ཞུ་རྒྱུར། ཤིས་ཧཱ་གསར་ཁང་གིས་བཤད་དོན་དགོན་པའི་དགེ་འདུན་པ་རྣམས་ལ་ཞལ་ལག་གི་དཀའ་ངལ་མེད་པའི་རྒྱུ་མཚན་དུ་དགོན་པ་གཞུང་གིས་རྩམ་པ་དང་ཕྱེ་འབྲས་སོགས་མང་པོ་ཁྲོམ་ནས་ཉོས་ཡོད་ཚུལ་བརྗོད་ཡོད་ནའང། དེ་ནི་ཏག་ཏག་དགེ་འདུན་པ་རྣམས་ལ་ཞལ་ལག་གི་དཀའ་ངལ་ཆེན་པོ་ཡོད་པའི་གནས་སྟངས་གསལ་བཤད་དུ་གྱུར་ཡོད།
དགོན་པ་ཚུགས་ནས་ད་བར་དགེ་འདུན་པ་རྣམས་ཀྱི་རྒྱུན་ལྡན་གྱི་ཉིན་རེའི་འཚོ་བ་དགོན་པ་གཞུང་གིས་བསྒྲུབ་སྲོལ་རྩ་བ་མེད་ནའང་། ད་ཆ་དགེ་འདུན་པ་རྣམས་ལ་ཉིན་རེའི་འཚོ་བའི་ཐོག་དཀའ་ངལ་ཆེན་པོ་འཕྲད་དེ་དགོན་པ་གཞུང་ངོས་ནས་མི་བསྒྲུབ་ཀ་མེད་ཆགས་སྟབས། རྩམ་པ་དང་ཕྱེ་འབྲས་སོགས་ཉོས་ཏེ་དགེ་འདུན་པ་རྣམས་ཀྱི་གནས་སྐབས་ཀྱི་ལྟོགས་སྐོམ་སེལ་ཐབས་བྱས་པ་འདིས།དགོན་པའི་ནང་སྔོན་ཆད་བྱུང་མ་མྱོང་བའི་མུ་གེའི་གནས་ཚུལ་ཞིག་བྱུང་གི་ཡོད་པ་གསལ་བཤད་བྱས་ཡོད།
རྒྱ་གཞུང་ལ་འདི་ལྟར་དྲི་བ་གཉིས་ཡོད་དེ།
༡༽དགེ་འདུན་པ་རྣམས་ཀྱི་རྒྱུན་ལྡན་གྱི་ཉིན་རེའི་འཚོ་བའི་བཟའ་བཅའ་རྩམ་པ་དང་ཕྱེ་འབྲས་སོགས་དགོན་པ་གཞུང་ངོས་ནས་ཉོ་སྲོལ་སྔ་མོ་ནས་ཡོད་དམ།
༢༽གལ་སྲིད་མེད་པ་ཡིན་ན་ད་ཐེངས་ཅིའི་ཕྱིར་དགོན་པ་གཞུང་ངོས་ནས་དེ་ལྟར་མཁོ་སྒྲུབ་བྱེད་དགོས་པར་གྱུར་པ་རེད། འདི་གཉིས་ཀྱིས་དགོན་པའི་ནང་གི་དགེ་འདུན་པ་ཚོའི་དེང་སྐབས་ཀྱི་རྒྱུན་ལྡན་འཚོ་བའི་གནས་སྟངས་ག་འདྲ་ཞིག་ཏུ་གྱུར་ཡོད་མེད་གསལ་བཤད་བྱས་ཡོད། ཡང་ཕྱི་ཚེས་ ༡༩ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཧོང་ལེས་ཟེར་བས་འཆར་ཅན་གྱི་གསར་འགོད་ལྷན་ཚོགས་ཤིག་གི་ཐོག་དེང་སྐབས་རྔ་པ་ཀིརྟི་དགོན་པའི་ནང་རྒྱུན་ལྡན་གྱི་ཆོས་ལུགས་བྱེད་སྒོ་ཁག་སྤེལ་མུས་ཡིན་པ་དང་། མི་མང་རྣམས་ཀྱང་རང་རང་གིས་འདོད་པ་ལྟར་ཕྱག་འཚལ་སྐོར་སྦྱོང་དང་། མཆོད་མཇལ་སོགས་ལ་ཕེབས་མུས་ཡིན་པ། གྲོང་པའི་ནང་དགེ་འདུན་པ་རྣམས་ཞབས་བརྟན་ལའང་འགྲོ་བཞིན་པ་ཡོད་པ་སོགས་བརྗོད་ནས་འཛམ་གླིང་གི་གསར་ལམ་ཁག་མོག་པོར་བཟོ་བརྩིས་རབས་དང་རིམ་པར་བྱས་མོད། དོན་དངོས་དེང་སྐབས་རྔ་པ་ཀིརྟི་དགོན་པ་དྲག་ཆས་དམག་མི་དང་། ཉེན་རྟོག་མི་སྣ་སོགས་ཀྱིས་ཕྱི་ནང་བྱས་ནས་ཉིན་མཚན་དུས་དྲུག་ཏུ་སྐོར་ཡོད་པར་མ་ཟད། ནང་ལོདུ་ཡོད་པའི་དགེ་འདུན་པ་སྤྱི་སྒེར་གཉིས་ཀར་རྒྱ་གཞུང་གི་ལས་བྱེད་པ་བརྒྱད་བརྒྱ་ལྷག་གིས་ཉི་མ་རེ་རེ་བཞིན་འཇིགས་སྐུལ་དྲག་ངོམ་སྣ་ཚོགས་ཀྱི་འོག་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་སྤེལ་བཞིན་པ་ཡོད་པ་བཅས།།
