༢༠༡༡ ཟླ་ ༤ ཚེས་ ༡༡ རེས་གཟའ་ཟླ་བ།
༄༅། །རྒྱལ་སྤྱིའི་ཉེས་ཡངས་ཚོགས་པས་ལོ་སྟར་འགྲོ་བ་མིའི་ཐོབ་ཐང་གོ་རྟོགས་སྤེལ་རྒྱུ་དང་ལས་འགུལ་འདྲ་མིན་རྩོམ་བཞིན་ཡོད་པ་ལྟར་ཕྱི་ལོ་ ༢༠༡༡ ཟླ་ ༤ ཚེས་ ༨ རེས་གཟའ་པ་སངས་ཉིན་ཨ་རིའི་གྲོང་ཁྱེར་འདྲ་མིན་ནས་མེ་འཁོར་དང་སྣུམ་འཁོར་སོགས་བརྒྱུད་གྲོང་ཁྱེར་ནིའུ་ཡོཀ་ཏུ་ཁྱོན་མི་གྲངས་ ༡༢༠༠ ཙམ་འདུ་འཛོམས་ཀྱིས་གཞུང་ཚབ་ཁག་དང་འབྲེལ་ཡོད་ལས་ཁུངས་ཆེ་ཁག་སོགས་ཀྱི་མདུན་དུ་ཞི་བའི་རྔམ་སྟོན་ཐེངས་བཅུ་བདུན་པ་དེ་བྱས་ཡོད། ཐེངས་འདིའི་ལས་འགུལ་གྱི་མིང་དུ། འགྲོ་བ་མིའི་ཐོབ་ཐང་ཆེད་སྣུམ་འཁོར་ནང་བཞུགས་རོགས། (Get on the Bus for Human Rights) ཞེས་བཏགས་ཏེ་ལས་འགུལ་སྤེལ་བཞིན་ཡོད་པ་མ་ཟད། ལས་འགུལ་དེ་སྔར་ལས་རྒྱ་ཆེ་རུ་བཏང་སྟེ་ཕྱི་ཚེས་ ༡༥ ཉིན་སློབ་གྲྭ་ཆེ་བའི་སློབ་མ་རྣམས་དང་མཐོ་རིམ་སློབ་གྲྭའི་སློབ་ཕྲུག དེ་བཞིན་ས་གནས་རྒྱལ་སྤྱིའི་ཉེས་ཡངས་ཚོགས་པའི་འཐུས་མི་ཁག་གཅིག་བཅས་ཨ་རིའི་གྲོང་ཁྱེར་ཝ་ཤིང་ཊོན་དུ་འཛོམས་ཏེ་རྒྱ་ནག་དང་།  ཨིན་ཌོ་ནེ་ཤི་ཡ།  ཤི་རི་ལངྐ་། འབར་མ། ཆཱ་ཌ སོགས་ཀྱི་གཞུང་ཚབ་ཁག་དང་འབྲེལ་ཡོད་ལས་ཁུངས་ཆེ་ཁག་སོགས་ཀྱི་མདུན་དུ་འབྲེལ་ཡོད་རྒྱལ་ཁབ་དེ་དག་གི་ནང་འགྲོ་བ་མིའི་ཐོབ་ཐང་གི་གནས་སྟངས་ལ་རྒྱབ་སྐྱོར་ཞུ་ཆེད་ཞི་བའི་རྔམ་སྟོན་བྱེད་རྒྱུ་ཡིན་འདུག རྒྱ་ནག་གཞུང་གིས་ཕྱི་ལོ་ ༢༠༠༨ ཟླ་ ༣ ཚེས་ ༢༦ ཉིན་བོད་མི་སྐུ་ཞབས་དོན་གྲུབ་དབང་ཆེན་ལགས་ཀྱིས་འཇིག་བྲལ་ཞེས་པའི་གློག་བརྙན་བཟོ་སྐྲུན་བྱས་པར་སྙོན་འཛུགས་ཀྱིས་འཛིན་བཟུང་བྱས་ཡོད་པར་བརྟེན་ཁོང་ཆ་རྐྱེན་གང་ཡང་མེད་པའི་ཐོག་འཕྲལ་དུ་གློད་བཀྲོལ་དགོས་པའི་རེ་འདུན་ཤུགས་ཆེ་འདོན་རྒྱུ་ཡིན་འདུག་པ་བཅས།།