༢༠༡༡ ཟླ་་༤ ཚེས་ ༢༨ རེས་གཟའ་ཕུར་བུ།
༄༅། །ཨ་རིའི་ནང་སྲིད་ལས་ཁུངས་ཀྱི་ཤེས་ཡོན་དང་ལེགས་བྱང་སྲུང་སྐྱོབ་ལྷན་ཁང་གིས་ལོ་ལྟར་གཙུག་ལག་སློབ་དཔོན་དང་གཙུག་ལག་སློབ་གྲྭའི་འཛིན་སྐྱོང་དང་འབྲེལ་བའི་འོས་ཆོས་ཚང་བའི་མི་སྣ་ ༨༠༠ ཙམ་ལ་རྒྱལ་ཁབ་འདྲ་མིན་ ༡༣༠ ཙམ་གྱི་ནང་ཤེས་ཡོན་དང་ལེགས་བྱང་གི་མཚོན་རིག་གནས་འདྲ་མིན་ཁག་ལ་ཉམས་ཞིབ་ཆེད་སློབ་ཡོན་གནང་རྒྱུའི་ལས་འཆར་ལག་བསྟར་བྱེད་བཞིན་ཡོད་པ་ལྟར། ཕྱི་ལོ་ ༢༠༡༡ དང་ ༢༠༡༢ ལོའི་ཉམས་ཞིབ་ཀྱི་སློབ་ཡོན་དེ་བཞིན་ཨ་རིའི་ཕུལ་ལར་ཊོན་ (Fullerton) གྲོང་ཁྱེར་ནང་རྟེན་གཞི་བྱས་པའི་ཁལ་ལི་ཕོར་ནི་ཡའི་མངའ་སྡེའི་མཐོ་སློབ་ (California State University) ཞེས་པའི་ནང་ཤེས་ཡོན་སྡེ་ཚན་ནང་ཕྱག་ལས་གནང་བཞིན་པ་གཙུག་ལག་སློབ་དཔོན་ལས་རོགས་བོད་མི་ངག་དབང་ཕུན་ཚོགས་ལགས་ལ་ཐོབ་ཡོད། གཙུག་ལག་སློབ་དཔོན་ཆེན་མོ་ངག་དབང་ཕུན་ཚོགས་ལགས་ལོ་གཅིག་རིང་ཉམས་ཞིབ་ཆེད་རྒྱ་གར་དུ་ཝཱ་ཎ་བོད་ཀྱི་གཙུག་ལག་སློབ་གྲྭའི་གཙོས་བཙན་བྱོལ་བོད་མིའི་སློབ་གྲྭ་འདྲ་མིན་ནང་ཆེད་ཕེབས་ཀྱིས་འཛིན་རིམ་ལྔ་པའི་བར་སློབ་ཚན་རྣམས་བོད་ཡིག་བརྒྱུད་ལམ་ཐོག་ནས་སློབ་ཁྲིད་གནང་བཞིན་ཡོད་པ་དང་། འཛིན་རིམ་དྲུག་པ་ནས་ཚན་རིག་དང་ཨང་རྩིས་ལ་སོགས་པའི་སློབ་ཚན་རྣམས་དབྱིན་ཡིག་དང་དབྱིན་སྐད་བརྒྱུད་ལམ་གཙོ་བཟུང་གིས་སློབ་ཁྲིད་བྱེད་བཞིན་པའི་ད་ལྟའི་ཤེས་ཡོན་སློབ་ཁྲིད་ཀྱི་ལམ་ལུགས་དེར་ཉམས་ཞིབ་གནང་རྒྱུ་ཡིན་འདུག་པ་བཅས།།