༢༠༡༡ ཟླ་ ༤ ཚེས་ ༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༤ ཉིན་རྡ་ས་གངས་སྐྱིད་སྤྱི་ཐབ་ཡང་སྟེང་ཚོགས་ཁང་དུ་བོད་མིའི་ཚོང་ལས་བདེ་ཚོགས་ཀྱི་སྐབས་ལྔ་པའི་ལོ་འཁོར་ཚོགས་ཆེན་ཚོགས་ཡོད།  དེ་ཉིན་སྔ་དྲོ་ཆུ་ཚོད་ ༡༠ ཐོག་བཙན་བྱོལ་བོད་གཞུང་གི་བཀའ་ཁྲི་ཟམ་གདོང་རིན་པོ་ཆེ་མཆོག་གིས་དབུས་དཔལ་འབྱོར་དང་ཕྱི་དྲིལ་བཀའ་བློན་རྣམ་གཉིས་དང་། ཕྱི་དྲིལ་དང་ནང་སྲིད་དྲུང་ཆེ་རྣམ་གཉིས། དེ་བཞིན་ཧིན་བོད་མཛའ་འབྲེལ་ཚོགས་པའི་ཚོགས་གཙོ། བོད་མིའི་ཚོང་ལས་བདེ་ཚོགས་ཀྱི་ཚོགས་གཙོ་བསོད་ནམས་སྟོབས་རྒྱལ་ལགས་ཀྱིས་གཙོས་ཚོགས་བཅར་རྣམ་པ། གཞུང་འབྲེལ་མིན་པའི་ཚོགས་པའི་སྐུ་ཚབ། གསར་འགོད་བཅས་མི་གྲངས་ ༧༠ བརྒལ་བ་ལྷན་འཛོམས་ཐོག་བཀའ་ཁྲི་མཆོག་གིས་སྣང་གསལ་ཞལ་ཕྱེ་དང། དེ་རྗེས་བོད་མིའི་ཚོང་ལས་བདེ་ཚོགས་ཀྱི་ཚོགས་གཙོས་ངོ་སྤྲོད་གསུང་བཤད་གནང་གྲུབ་མཚམས་ཚོང་ལས་བདེ་ཚོགས་ཀྱི་དཔལ་འབྱོར་དོ་དམ་པ་ཚེ་རིང་རྡོ་རྗེ་ལགས་ཀྱིས་རྩིས་ཁྲ་སྒྲོགས་སྦྱང་གནང་།
དེ་ནས་སྐུ་མགྲོན་གཙོ་བོ་བཀའ་ཁྲི་མཆོག་གིས་ལམ་སྟོན་གསུང་བཤད་གནང་དོན། བོད་མིའི་ཚོང་ལས་བདེ་དོན་ལྷན་ཚོགས་ཀྱི་མཛད་གཙོ་རྣམ་པ་དང། ཕྱག་སྦྲེལ་བཀའ་བློན་རྣམ་པ། དྲུང་ཆེ་རྣམ་པ། གཞན་ཡང་སྐུ་མགྲོན་རྣམ་པ། དེ་རིང་ཁྱེད་རང་ཚོ་ཚོང་ལས་ལྷན་ཚོགས་ཀྱི་ཚོགས་ཆེན་ཐེངས་ལྔ་པའི་ཐོག་མགྲོན་འབོད་གནང་བ་བཞིན་བཅར་རྒྱུ་བྱུང་བར་དགའ་བོ་བྱུང། སྔོན་ལ་ཚོང་པའི་ལྷན་ཚོགས་ནང་ཡོད་མཁན་ཚོང་པ་ཚང་མར་བཀའ་ཤག་དང་ང་རང་སྒེར་གྱི་ངོས་ནས་འཚམས་འདྲི་དང་བཀྲ་ཤིས་བདེ་ལེགས་ཞུ་གི་ཡིན། བོད་པའི་ཚོང་ལས་བདེ་ཚོགས་སྐྱབས་བཅོལ་བའི་སྤྱི་ཚོགས་ནང་འཛུགས་ཐུབ་རྒྱུར་སྐུ་ངལ་ཡོད་ཀྱང་ཚོང་ལས་ཙམ་མིན་པར། སྤྱི་ཚོགས་དང་ཆབ་སྲིད་ཀྱི་ཐོག་ནས་གལ་ཆེན་པོ་ཞིག་ཡིན་པ་སྔ་མོ་ནས་མཐོང་གི་ཡོད། དེ་ཚོའི་རིགས་ཞི་བའི་སྤྱི་ཚོགས་ཀྱི་རང་མོས་ཐོག་ནས་གནང་དགོས་རྒྱུའི་ཕྱག་ལས་ཤིག་ཡིན་དུས་གཞུང་གི་ཐེ་བྱུས་དང་སྣེ་འཁྲིད་བྱས་ཏེ་འཛུགས་རྒྱུ་མེད། འོན་ཀྱང་སྤྱི་ཚོགས་ནང་ལྷག་པར་དུ་ཚོང་ལས་གནང་མཁན་ཚོའི་ཁྲོད་དུ་བཙན་བྱོལ་གཞུང་ངོས་ནས་རེ་སྐུལ་ཞུས་པ་བཞིན་ཚོགས་པ་འདི་བཙུགས་ཐུབ་པ་ནས་ཐོག་མར་དཀའ་ངལ་བྱུང་ཡོད་ཀྱང་བར་ལམ་ནས་ཧ་ཅང་ཡག་ཏུ་ཕྱིན་ཡོད། སོ་སོ་རང་གི་རྐང་པའི་ཐོག་ལངས་ཐུབ་པ་དང། འཚོ་བ་རྒྱུན་གནས་ཐུབ་པའི་གནས་སྟངས་ཤིག་ཆགས་པ་དེ་ཞེ་དྲག་ཡག་པོ་རེད། དེར་བརྟེན་ཁྱེད་རང་ཚོ་ཚོགས་པའི་ནང་བཞུགས་མཁན་ཚོང་པ་རྣམ་པ་དང་རྒྱུན་ལས་ཕྱག་ལས་གནང་མཁན་ཚང་མར་སྙིང་ཐག་པ་ནས་རྗེས་སུ་ཡི་རང་དང་ལེགས་གསོལ་བསྔགས་བརྗོད་ཞུ་རྒྱུ་དང། མ་འོངས་པར་ཇི་སྲིད་ང་ཚོ་བཙན་བྱོལ་གྱི་གནས་བབས་ལ་གནས་པའི་རིང་ཚོགས་པ་འདི་རིགས་བརྟན་པོར་གནས་ཐུབ་དགོས་རྒྱུ་ཧ་ཅང་གལ་ཆེན་པོ་རེད། ད་ལྟ་འདིར་དཔལ་འབྱོར་དོ་དམ་པས་གསུངས་པ་བཞིན་རེད། རྒྱུན་ལས་ཡག་པོ་ཞིག་འདེམས་དགོས་པ་དང། འདེམས་ཐོན་བྱུང་བའི་རྒྱུན་ལས་ཚོས་ཕྲན་བུ་སོ་སོའི་ཚོང་དང་རང་དོན་འཐུས་ཤོར་དུ་འགྲོ་གི་ཡོད་ཀྱང་སྤྱི་དོན་ལ་ལྷག་བསམ་གནང་གི་རེད་ལ་གནང་དགོས་རྒྱུ་གལ་ཆེན་པོ་རེད། ད་ལྟའི་འཇིག་རྟེན་འདི་མང་ཆེ་བ་ཚོང་པའི་འཇིག་རྟེན་ཞིག་ཆགས་ཡོད། དཔལ་འབྱོར་དང་ཚོང་གི་ལས་དོན་དེ་ཆབ་སྲིད་དང་སྤྱི་ཚོགས་ཀྱི་འགྱུར་བ་གཏོང་མཁན་གྱི་རྒྱུ་རྐྱེན་ལྟ་བུ་ཆགས་ཡོད། དཔེར་ན། ང་རང་ལྟ་བུ་ཡིན་ན་ཚོང་པ་ལྷན་ཚོགས་ཀྱི་ནང་ཆ་ཤས་ལེན་རྒྱུ་དང་འོས་བབ་ཡོད་མཁན་གྱི་མི་ཞིག་མིན། གང་ཡིན་ཞེ་ན། ང་རང་སྒེར་གྱི་ལྟ་གྲུབ་ཐོག་ནས་བལྟས་ན་དེང་རབས་དངུལ་གྱི་མ་རྩའི་ཐོག་ནས་ཚོང་རྒྱག་མཁན་ཚོར་ངོ་རྒོལ་བྱེད་མཁན་གྱི་ལྟ་སྒྲུབ་འཁྱེར་མཁན་ཞིག་ཡིན། འཇིག་རྟེན་འདི་ཆུད་ཟོས་གཏོང་མཁན་ཐོག་མ་དངུལ་དང་རྗེས་མ་དངུལ་ལ་བརྟེན་པའི་ཚོང་།
དེ་ཡང་མཐའ་མ་དངུལ་གྱི་ཚོང་དེ་བསམ་བློའི་ནང་རྣམ་རྟོག་གི་སྤྲུལ་པ་ཞིག་གི་ཐོག་ནས་བརྒྱབ་པ་མ་གཏོགས་དངོས་སུ་སོ་སོའི་ཁུག་མའི་ནང་དུ་མ་རྩ་མེད་ཀྱང་ཚོང་ལས་བྱེད་ཐུབ་རྒྱུའི་མ་རྐང་ཉོ་ཐུབ་རྒྱུའི་ཚོང་དེ་སྤྱི་ཚོགས་འཕྲོ་བརླག་གཏོང་རྒྱུ་དང། སྤྱི་ཚོགས་ནང་དབུལ་ཕྱུག་ཆ་མ་སྙོམས་པ་ཡོང་རྒྱུའི་གཞི་རྩ་ཞིག་ལ་མཐོང་གི་ཡོད། དེང་སང་ཉུང་ཤས་མ་གཏོགས་ལྷག་མེད། འོན་ཀྱང་ཉུང་ཤས་ལྷག་པ་དེ་ཚོས་ད་དུང་ཡང་ཇི་སྲིད་བར་དུ་འཇིག་རྟེན་འདིའི་ནང་དངུལ་གྱི་བེད་སྤྱོད་བཏང་བའི་ཚོང་དང། རྣམ་རྟོག་གི་སྒྲོ་བཏགས་ཀྱི་ཐོག་ནས་མ་རྐང་ཉོ་ཚོང་བྱེད་རྒྱུའི་ཚོང་དེ་འཇིག་རྟེན་གོ་ལ་གཅིག་གྱུར་གྱི་ལུགས་སྲོལ་བཞིན་འགྲོ་གི་ཡོད།
དེ་ལ་མཇུག་བསྡོམས་སམ་བཀག་མ་ཐུབ་ན་འཇིག་རྟེན་གྱི་སྐྱེ་འགྲོ་དེ་ཚོ་འཚོ་ཐུབ་ཀྱི་མ་རེད་བསམ་དྲན་མཁན་གྱི་གྲས་རེད། གྷན་དྷི་དང་ཝི་ནོ་ཝ་ལ་སོགས་པའི་ཁོང་ཚོའི་བསམ་ཚུལ་དང་སྤྱིར་འཇིག་རྟེན་གྱི་ནང་སྔ་མོའི་སྤྱི་ཚོགས་རིང་ལུགས་པ་(Socialist) ལྷག་མ་རེ་ཟུང་ཡོད་པ་དེ་ཚོའི་བསམ་ཚུལ་རེད། འོན་ཀྱང་དེའི་གནས་སྟངས་དེ་ད་ལྟ་ཧ་ལམ་ཕྱིར་ལོག་རྒྱག་རྒྱུ་མེད་པ་ལྟ་བུ་ཆགས་ཡོད།  ནམ་ཞིག་ཁོང་རང་རང་བཞིན་གྱི་ལྗིད་ཁོག་གི་འོག་ནས་མེད་པ་མ་ཆགས་བར་དུ་ཕྱི་ལོག་མིས་ཐབས་ཤེས་བྱས་ཏེ་བཟོ་རྒྱུ་མེད་པ་དེ་དངོས་ཡོད་གནས་ཚུལ་རེད། ང་ཚོའི་ངོས་ནས་ཚོང་པའི་སྤྱི་ཚོགས་བཙུགས་དགོས་ཀྱི་འདུག་ཞུ་རྒྱུ་དེ་སྤྱིར་བོད་པ་དང་། ལྷག་པར་བཙན་བྱོལ་བོད་མིའི་སྤྱི་ཚོགས་དེ་ཚོང་པས་དབང་བསྒྱུར་བྱས་པའི་འཇིག་རྟེན་འདིའི་ནང་འཚོ་དགོས་ཀྱི་ཡོད་ན། ཁོང་ཚོ་ལྟར་གྱི་ལས་ཀ་ཞིག་མ་བྱས་ན་མི་གྲལ་དུ་མི་ཚུད་པ་ཆགས་འགྲོ་རྒྱུ་ཞིག་ཡིན། སྤྱིར་བཏང་ང་ཚོའི་གནས་བབས་འདི་འདྲ་འབྱུང་རྒྱུ་དང་རྒྱ་ནག་གནས་བབ་འདི་འདྲ་འབྱུང་རྒྱུ་དེ་གསལ་པོ་མཁྱེན་གྱི་རེད། དཔལ་འབྱོར་རང་གི་ལམ་གྱི་ཐོག་ནས་བྱུང་བ་ཞིག་ཡིན་པ་གསལ་པོ་རེད། ཅེས་སོགས་ཀྱི་གསུང་བཤད་གནང་རྗེས་བོད་མིའི་ཚོང་ལས་བདེ་ཚོགས་ཀྱི་དྲུང་ཆེ་ཟླ་བ་རིན་ཆེན་ལགས་ཀྱིས་ཐུགས་རྗེ་ཆེ་ཞུས་ཏེ་གྲོལ། དེ་རྗེས་མུ་མཐུད་ཚོགས་པ་ཚགས་ཚུད་སླད་ཕན་ཚུན་གྲོས་བསྡུར་དང་གྲོས་གཞི་གྲོས་ཆོད་བསྐྱར་ཞིབ་ད་ལྟ་དང་མ་འོངས་པའི་བྱེད་ཕྱོགས་དང་རྒྱུན་ལས་འཕོ་འགྱུར་སོགས་གནང་རྒྱུ་ཡིན་འདུག།