༢༠༡༡ ཟླ་ ༤ ཚེས་ ༡༤ རེས་གཟའ་ཕུར་བུ།
༄༅། །འདི་གར་བཞུགས་སྒར་དུ་རྟེན་གཞི་བྱས་པའི་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་དགེ་འདུན་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་ཀྱིས་ཁུངས་ལྡན་གནས་ཚུལ་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༤ ཚེས་ ༡༢ ཉིན་ཤས་སྔོན་ནས་རྒྱ་གཞུང་གིས་བོད་ཨ་མདོ་རྔ་པའི་ནང་དགེ་འདུན་པ་རང་ལོ་ ༡༨ ནས་ ༤༠ བར་ཚང་མ་ས་གནས་གཞན་ཞིག་ལ་སློབ་སྦྱོང་གི་མིང་ཐོག་ནས་འགྲོ་དགོས་ཚུལ་བཤད་དེ་ཕྱི་ཚེས་ ༡༢ ཉིན་ནས་ལག་བསྟར་བྱེད་རྒྱུ་ཡིན་པའི་གནས་ཚུལ་ཐོན་ཡོད།
ཕྱི་ཚེས་ ༡༡ དགོང་མོ་ནས་གནས་ཚུལ་དེ་ཡོངས་ཁྱབ་ཆགས་རྐྱེན་མི་མང་གིས་དགོན་པའི་མཐའ་གཡས་གཡོན་ནས་དོགས་ཟོན་བྱས་ཏེ་སྡོད་སྐབས་བོད་ནང་གི་ཉིན་དགུང་ཆུ་ཚོད་ ༡༢ ཙམ་ལ་གློ་བུར་དུ་རྒྱ་དམག་འབོར་ཆེན་ཞིག་བསླེབས་ཏེ་རྔ་པ་ཀིརྟི་དགོན་པའི་ནང་འགྲོ་རྩིས་བྱེད་སྐབས་མི་མང་གིས་དམག་མིའི་མདུན་བཀག་ནས་དགོན་པའི་ནང་གཏན་ནས་འགྲོར་མ་བཅུག་པར་བརྟེན། དྲག་ཆས་ཉེན་རྟོག་པ་དང་དྲག་ཆས་དམག་དཔུང་གིས་མི་མང་ལ་གཅར་རྡུང་དྲག་པོ་བཏང་ཡོད་པ་མ་ཟད། སྦྱོང་བརྡར་སྤྲད་པའི་ཁྱི་མང་པོ་མི་མང་ནང་ལ་གློད་དེ་མི་མང་པོར་ཁྱིས་སོ་བརྒྱབ་པ་སོགས་ཀྱིས་རྨས་སྐྱོན་ཚབས་ཆེན་བཏང་བ་མང་པོ་བྱུང་ཡང་། ད་དུང་མི་མང་གིས་རྩ་བ་ནས་ཕྱིར་འཐེན་མ་བྱས་སྟབས་སྐབས་དེར་རྒྱ་གཞུང་གི་དམག་མི་དགོན་པའི་ནང་ལ་འགྲོ་ཐུབ་མེད།
དེ་རྗེས་དགོན་པའི་ཆོས་ལུགས་དོ་དམ་ཁང་གི་འགན་འཛིན་གྱིས་མི་མང་ལ་སྐད་ཆ་ནན་པོ་བཤད་པར་བརྟེན་མི་མང་རྣམས་ནས་ཅུང་ཙམ་ཕྱིར་འཐེན་བྱས་འདུག་ཀྱང་། བོད་ནང་གི་ཕྱེད་ཡོལ་ཆུ་ཚོད་ ༣།༣༠ ཙམ་ལ་ད་དུང་མི་མང་དང་དམག་དཔུང་གདོང་ཐུག་རྒྱག་བཞིན་པའི་གནས་སྟངས་ཧ་ཅང་ཛ་དྲག་གི་གནས་སུ་གྱུར་བའི་སྐབས་དེར་དགོན་པའི་ནང་ནས་དགེ་འདུན་པ་མང་པོ་ཞིག་གིས་མི་མང་དང་དཔུང་པ་མཉམ་གཤིབ་ཆེད་ཕྱི་ལ་ཐོན་རྩིས་གནང་འདུག་ཀྱང་དགོན་པའི་མཐའ་འཁོར་ཡོངས་རྫོགས་ལྕགས་ཚེར་གྱི་རྭ་བ་དང་། རྩིག་པ་བརྒྱབ་ཡོད་པར་མ་ཟད། སྒོ་ཆེན་ཁག་དམག་མིས་བཙན་སྲུང་བྱས་ཡོད་པར་བརྟེན། དགེ་འདུན་གཅིག་ཀྱང་ཕྱི་ལ་ཐོན་ཐུབ་མེད། བོད་མི་རྣམས་ཀྱིས་གནས་ཚུལ་གོ་ཐོས་བྱུང་བར་གཞིགས་ན། རྒྱ་གཞུང་གི་འཆར་གཞི་ནི་མི་མང་གིས་མ་ཤེས་པའི་ཐབས་ཤེས་འོག་སློབ་སྦྱོང་ལ་ཁ་གཡར་ནས་ས་གནས་གཞན་གྱི་བཙོན་ཁང་ཞིག་གི་ནང་དགེ་འདུན་པ་བཅུ་རེར་མཉམ་དུ་རླངས་འཁོར་ནང་བཙན་ཁྲིད་བྱས་ཏེ་འཇུག་རྒྱུ་ཡིན་འདུག་ཅིང་། གནས་ཚུལ་དེ་ཉིན་ཤས་སྔོན་ནས་མི་མང་གིས་ཤེས་རྟོགས་བྱུང་བར་བརྟེན་རྒྱུན་དུ་དོགས་ཟོན་བྱེད་མུས་དང། དེ་ཉིན་དངོས་སུ་རྒྱ་དམག་རྣམས་ཐོན་སྐབས་ངོས་འཛིན་དེ་ལྟར་བྱས་ནས་མི་མང་གིས་རང་སྲོག་ལ་མ་འཛེམས་པར་དམག་དཔུང་གི་མདུན་བཀག་པ་ཞིག་ཡིན་འདུག
གོང་ཞུས་ལྟར་ཕྱེད་ཡོལ་ཆུ་ཚོད་ ༣།༣༠ ཙམ་ལ་མི་མང་འབོར་ཆེན་ཞིག་རྔ་པ་ཀིརྟི་དགོན་པར་འགྲོ་སའི་ལམ་ཆེན་གྱི་བཞི་མདོ་ཁག་གཉིས་ལ་མཉམ་འཛོམས་ཐོག་རྔ་པ་རྫོང་གི་འགྲིམ་འགྲུལ་ཡོངས་རྫོགས་བཀག་སྡོམ་བྱས་ཡོད་པ་མ་ཟད། རྔ་པ་ཀིརྟིའི་དགོན་གྱི་ཉེ་འཁྲིས་སུ་ཡོད་པའི་གྲོང་སྡེ་ཁག་གི་ཕྲུ་གུ་རྣམས་རྫོང་ལ་སློབ་གྲྭར་འགྲོ་གི་ཡོད་པ་བཞིན་ཉིན་ཤས་གོང་ནས་ནང་ལ་ཡོང་མི་ཆོག་པར་བཟོས་འདུག་ལ། དེའི་རྒྱུ་མཚན་ནི་དགོན་པ་གཏོར་བཅོམ་བྱེད་རྒྱུ་ཡིན་སྟབས་སློབ་མ་རྣམས་ལ་སྲུང་སྐྱོབ་བྱས་པ་ཡིན་པའི་བསམ་ཚུལ་ཡོང་གི་ཡོད་འདུག་པ་བཅས།།
