༄༅། །བཙན་བྱོལ་བོད་གཞུང་ཕྱི་དྲིལ་ཁོར་ཡུག་ཚན་པའི་ཉམས་ཞིབ་པ་ཆོས་སྐྱིད་ལགས་དང་འཇིགས་མེད་ནོར་བུ་ལགས་གཉིས་ཀྱིས་ཕྱི་ཟླ་ ༤ ཚེས་ ༢༦ ཉིན་རྒྱ་གར་བྱང་ཤར་རྡོ་རྗེ་གླིང་དང་སོ་ན་ཌ་དབུས་བོད་སློབ་ཀྱི་སློབ་མ་རྣམས་ལ་བོད་ཀྱི་ཁོར་ཡུག་གནས་སྟངས་སྐོར་གོ་རྟོགས་རྒྱ་ཆེ་སྤེལ་རྒྱུའི་ལས་གཞི་འགོ་བཙུགས་གནང་ཡོད། ཐེངས་འདིའི་ཕྱི་དྲིལ་ཁོར་ཡུག་ཚན་པའི་རྒྱ་གར་དུ་བོད་མི་གནས་ཡུལ་གྱི་ས་གནས་འདྲ་མིན་ནང་བོད་ཀྱི་ཁོར་ཡུག་གོ་རྟོགས་སྤེལ་རྒྱུའི་སྐོར་བསྐྱོད་ཐེངས་གསུམ་པ་ཆགས་ཡོད། དེ་ཡང་ཐེངས་འདིའི་སྐོར་བསྐྱོད་སྐབས་འབྲེལ་ཡོད་ཉམས་ཞིབ་པ་གཉིས་ཀྱིས་གཙོ་བོ་བོད་ཀྱི་ཁོར་ཡུག་དང་འབྲེལ་བའི་འཁྱགས་རོམ་བཞུར་ཚད་དང་དེའི་རྗེས་འབྲས།
རྒྱ་ནག་གཞུང་གིས་བཙན་འོག་ཏུ་བོད་ཀྱི་འབྲོག་པ་རྣམས་ལོ་ངོ་སྟོང་ནས་དར་བའི་འབྲོག་པའི་སྐྱས་སྤོའི་ལམ་ལུགས་ལག་བསྟར་མ་བཅུག་པར་ས་གནས་གཅིག་ཏུ་བརྟན་འཇགས་བཞག་པས་མ་འོངས་པར་བོད་ཀྱི་ཁོར་ཡུག་ལ་རྗེས་འབྲས་ཇི་བྱུང་སྐོར་དང་། བོད་ཀྱི་ཆུ་ཆེན་ཁག་ལ་རྒྱ་མིས་ཆུ་རགས་བརྒྱབ་སྟེ་བོད་ཙམ་མ་ཟད། བོད་ཀྱི་ས་འབྲེལ་རྒྱ་གར་གཙོ་བོར་གྱུར་བའི་ཡུལ་གྲུ་དུ་མའི་ནང་མི་འབོར་ས་ཡ་མང་པོ་དཀའ་ངལ་འོག་ཚུད་ངེས་ཡིན་སྐོར་དང་། ཕྱོགས་མཚུངས་བོད་ཀྱི་སྟོང་ལ་ཉེ་བའི་གཅན་གཟན་དང་རི་དྭགས་རྣམས་ལ་སྲུང་སྐྱོབ་ཇི་འདྲ་དགོས་མིན་སོགས་ཀྱི་གནད་དོན་ཐོག་པར་རིགས་དང་འགྲེལ་བཤད། གློག་བརྙན་བཅས་ཀྱི་ལམ་ནས་གསལ་བཤད་གནང་བཞིན་ཡོད་པ་མ་ཟད། སློབ་མ་ཚོའི་དོགས་འདྲི་ལ་གསལ་བཤད་དང་ལན་འདེབས་གནང་བར་སློབ་མ་དང་དགེ་ལས་ཚང་མས་འདོད་བློ་ཚིམས་པ་བྱུང་འདུག ཕྱི་དྲིལ་ཁོར་ཡུག་ཚན་པའི་སྐོར་སྐྱོད་ཀྱི་ལས་གཞི་དེ་བཞིན་༸གོང་ས་མཆོག་དགུང་གྲངས་ ༧༥ ལ་ཕེབས་པའི་སྐུའི་འཁྲུངས་སྐར་ལོ་འཁོར་མོ་གཅིག་སྲུང་བརྩི་ཞུ་རྒྱུའི་ལས་གཞིའི་ཆ་ཤས་ཤིག་ཡིན་པ་བཅས། །
