༢༠༡༡ ཟླ་ ༤ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༡ ཉིན་རྡ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་༸རྒྱལ་མཆོག་སྐུ་ཕྲེང་ལྔ་པ་ཆེན་པོ་མཆོག་དང་༸རྒྱལ་མཆོག་སྐུ་ཕྲེང་བཅུ་གསུམ་ཆེན་པོ་མཆོག དེ་བཞིན་༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་བཅས་ཀྱིས་བོད་མི་རིགས་ཐོག་རླབས་ཆེན་གྱི་མཛད་ཁུར་བསྐྱངས་པར་བཀའ་དྲིན་རྗེས་དྲན་མཚོན་ཆེད་ཆབ་སྲིད་བཙོན་ཟུར་དགའ་ལྡན་བག་གྲོ་ལགས་ཀྱིས་རྩོམ་སྒྲིག་བྱས་པའི་དཀའ་ཚེགས་ཆེ་བའི་ལམ་བུ་ཞེས་པའི་དཔེ་དེབ་ཆོས་རིག་བཀའ་བློན་མཆོག་གིས་དབུ་འབྱེད་གནང་བ།
དེ་ཉིན་སྔ་དྲོ་ཆུ་ཚོད་ ༩ ཐོག་སྐུ་མགྲོན་གཙོ་བོ་བཙན་བྱོལ་བོད་གཞུང་ཆོས་རིག་ལས་ཁུངས་ཀྱི་བཀའ་བློན་ཚེ་རིང་ཕུན་ཚོགས་མཆོག་དང་། ཕྱི་དྲིལ་དྲུང་ཆེ་རྣམ་གཉིས། སྤྱི་འཐུས་རྒྱུན་ལས་ཀྱི་སྐུ་ཚབ། གཞུང་འབྲེལ་མིན་པའི་ཚོགས་སྐྱིད་ཁག་གི་འགན་འཛིན་རྣམ་པ། གསར་འགོད་པ་བཅས་ཁྱོན་མི་གྲངས་ ༣༠ བརྒལ་བ་ལྷན་འཛོམས་ཐོག་བོད་ཀྱི་བང་ཆེན་གསར་ཁང་གི་གསར་འགོད་པ་འཇམ་དབྱངས་བཟོད་པ་ལགས་ནས་མཛད་རིམ་ངོ་སྤྲོད་དང་འབྲེལ་རྩོམ་པ་པོ་དགའ་ལྡན་གྲྭ་བག་གྲོ་ལགས་ཀྱིས་དཔེ་དེབ་འདི་རྩོམ་སྒྲིག་བྱེད་དགོས་དོན་སྐོར་ལ་གསུང་བཤད་གནང་དོན།
དེ་རིང་འདི་གར་ཕེབས་པའི་དཔལ་ལྡན་ཆོས་རིག་བཀའ་བློན་མཆོག་གིས་དབུས་སྤྱི་འཐུས་རྣམ་པ། དྲུང་ཆེ་རྣམ་པ། གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་འགན་འཛིན་རྣམ་པ། དེ་བཞིན་གསར་འགོད་པ་རྣམ་པ། འདི་གར་ཕེབས་པའི་རྣམ་པ་ལྷན་རྒྱས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། བོད་ནང་གི་ཆབ་བཙོན་རྣམས་ནས་གུས་པར་རྒྱ་མིའི་སྒོར་མོ་ ༡༥༠༠ བསྐུར་ནས་ཕྲན་རང་རྒྱ་གར་རྡ་སར་སྐུ་བཞུགས་མཛད་ཡོད་པའི་༸གོང་ས་༸སྐྱབས་མགོན་ཆེན་པོ་མཆོག་དང་རྒྱལ་སྤྱིའི་ནང་བོད་དོན་ལ་རྒྱབ་སྐྱོར་གནང་མཁན་གྱི་ཚོགས་པ་ཁག་དང་།
འཛམ་གླིང་མི་མང་ལ་ངེད་ཚོ་ཆབ་བཙོན་སྤྱིའི་དཀའ་སྡུག་དང་ཡང་སྒོས་གཞིས་ལུས་བོད་མི་རྣམས་རྒྱ་གཞུང་གི་གདུག་རྩུབ་ཅན་གྱི་སྲིད་བྱུས་འོག་དཀའ་ངལ་ཇི་འཕྲད་གནས་སྟངས་རྣམས་ཞུ་བར་བསྐྱོད་དགོས་པའི་མངགས་བཅོལ་གནང་བ་ལྟར་ཁོང་རྣམས་ཀྱིས་གནང་བའི་རྒྱ་སྒོར་དེ་དག་ངས་སྒོར་མོ་དུང་ཕྱུར་མང་པོ་ལས་ལྷག་པ་བརྩིས་ཏེ། ཁོང་ཚོའི་རེ་འདུན་བཞིན་ད་བར་བཙན་བྱོལ་སྤྱི་ཚོགས་ནང་བསྡད་དེ་རང་ནུས་ཡོད་དགུ་རྩལ་སྤྲུགས་ཀྱིས་བོད་དོན་དང་འབྲེལ་བའི་དེབ་ཕྲེང་འདི་བརྩིས་པའི་དཔེ་དེབ་བརྒྱད་རྩོམ་འབྲི་བྱས་པ་ཡིན། དེ་ཡང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བཙན་བྱོལ་བོད་གཞུང་གི་ཐུགས་རྗེ་བཀའ་དྲིན་སྤྱི་དང་བྱེ་བྲག་ཆབ་བཙོན་རྣམ་པའི་རེ་བ་དང་སེམས་ཤུགས་ལ་བརྟེན། གུས་པས་དཔེ་དེབ་དེ་དག་རྩོམ་འབྲི་བྱེད་ཐུབ་བྱུང་།
དེ་བཞིན་བཙན་བྱོལ་དུ་གནས་པའི་བོད་རིགས་རྣམས་ལ་ལྟོ་གོས་ཐོག་དཀའ་ངལ་མེད་ཁར་བོད་ཀྱི་ཆོས་དང་རིག་གཞུང་གསོན་གནས་ཐུབ་པ་དེ་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་རྟེན་ནས་བྱུང་བ་ཞིག་ཡིན། བཙན་བྱོལ་སྤྱི་ཚོགས་ནང་མགོན་པོ་གང་ཉིད་མཆོག་དང་བཙན་བྱོལ་བོད་གཞུང་གི་ཐུགས་རྗེ་བཀའ་དྲིན་འོག་ཤེས་ཡོན་ཅན་དང་རྩོམ་པ་པོ་མི་ཉུང་བ་ཞིག་ཐོན་ཡོད་པ་མ་ཟད། དེ་དག་གིས་རྒྱ་གཞུང་གི་འཁྱོག་བཤད་ལ་ལན་འདེབས་བྱེད་རྒྱུའི་མཐུན་རྐྱེན་ཡོངས་སུ་ཚང་ཡོད། འོན་ཀྱང་རྒྱ་གཞུང་ནས་༸གོང་ས་མཆོག་དང་བཙན་བྱོལ་བོད་གཞུང་ལ་གཞི་མེད་ཀྱི་སྐྱོན་འཛུགས་བྱེད་སྐབས་ལན་འདེབས་གནང་མཁན་བོད་ནང་གནས་པའི་ཤེས་ཡོན་ཅན་དང་རྩོམ་པ་པོ་རྣམས་རེད། དེར་བརྟེན་གུས་པས་དེ་རིང་གི་གོ་སྐབས་འདི་བརྒྱུད་ནས་ཁོང་རྣམས་ལ་ཐུགས་རྗེ་ཆེ་ཞུ་རྒྱུ་ཡིན། མཐར་ཆོས་རིག་བཀའ་བློན་མཆོག་ལ་ཕྲན་གྱིས་ཀུན་གཟིགས་པཎ་སྐུ་ཕྲེང་བཅུ་པ་མཆོག་གི་སྐུ་པར་བོད་ཀྱི་འགྲེམས་སྟོན་ཁང་དུ་འགྲེམས་འཇོག་གནང་རྒྱུའི་རེ་སྙན་ཕུལ་བ་བཞིན་ཁོང་གིས་འབྲེལ་ཡོད་ལས་ཁུངས་སུ་ཕྱག་བྲིས་གནང་བ་དེ་དག་ལ་དམིགས་བསལ་ཐུགས་རྗེ་ཆེ་ཞུ་རྒྱུ་ཡིན། ཞེས་གསུང་བཤད་གནང་ཡོད།
དེ་རྗེས་སྐུ་མགྲོན་གཙོ་བོ་མཆོག་གིས་དཔེ་དེབ་དབུ་འབྱེད་གནང་བ་ཆབས་ཅིག་གསུང་བཤད་གནང་དོན། དེ་རིང་དཔེ་དེབ་དབུ་འབྱེད་ཀྱི་མཛད་སྒོར་ཕེབས་པའི་རྣམ་པ་ཚོར་ཆོས་རིག་ལས་ཁུངས་དང་ང་རང་སྒེར་ངོས་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ངས་དཔེ་དེབ་འདིའི་དཀར་ཆག་ཀློག་པ་ཡིན། ནང་དོན་ཞིབ་ཕྲ་དུས་ཚོད་དབང་གི་ཀློག་ཐུབ་མ་སོང་། འོན་ཀྱང་ནང་དོན་སྙིང་བསྡུས་སྐུ་ཞབས་བག་གྲོ་ལགས་ཀྱིས་གསུངས་གནང་སོང། ཡོངས་གྲགས་སུ་དགའ་ལྡན་གྱི་གྲྭ་བག་གྲོ་ཟེར་དུས་བཙན་བྱོལ་སྤྱི་ཚོགས་ཧ་ལམ་མ་ཤེས་མཁན་མེད། ཁོང་གིས་བོད་དོན་དྲིལ་བསྒྲགས་གནང་བར་རྒྱལ་སྤྱིའི་རྒྱལ་ཁབ་ཕལ་ཆེར་ཉི་ཤུ་སུམ་ཅུ་བརྒལ་བ་ཞིག་གི་ནང་ཕེབས་ཡོད། བོད་ནང་དུའང་དགའ་ལྡན་དུ་བཞུགས་སྐབས་རྒྱ་གཞུང་ལ་ངོ་རྒོལ་དང་། རྒྱ་ནག་གི་བཙོན་ཁང་ནང་ལོ་གྲངས་གསུམ་ལྷག་ཙམ་དཀའ་སྡུག་མྱངས་ཡོད། ལྷ་སར་རྒྱ་གཞུང་གི་སྲིད་བྱུས་ལ་ཞི་རྒོལ་བྱས་ཏེ་རྒྱ་ནག་གཞུང་ནས་འཛིན་བཟུང་བྱས་རྗེས་བཙོན་ཁང་དུ་མནར་གཅོད་ཇི་མྱངས་སྐོར་ངས་བསྐྱར་ཟློས་བྱེད་མི་དགོས་པར་ཁོང་གིས་རྩོམ་འབྲི་བྱས་པའི་དབྱིན་བོད་གཉིས་ཀའི་ཐོག་ཡོད་པའི་ལོ་རྒྱུས་ཀྱི་དེབ་དེ་ཚོ་ཀློག་མྱོང་ཡོད་ན་ཤེས་གསལ་ཡིན། དེ་རིང་འདི་གར་ཕེབས་པའི་རྣམ་པ་ཚང་མ་གནད་དོན་དེ་ལྟ་བུའི་ཐོག་ཐུགས་སྣང་ཡོད་མཁན་ཤ་སྟག་རེད། དེ་བཞིན་ཁོང་བོད་ནས་བཙན་བྱོལ་དུ་འབྱོར་རྗེས་སུའང་སྔར་གྱི་དམ་བཅའ་རྒྱུན་སྐྱོང་སྒོ་ནས་མུ་མཐུད་དེ་བོད་དོན་ཐོག་ལས་འགུལ་སྤེལ་དང་སྤེལ་བཞིན་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་རྒྱུན་དུ་ནས་བོད་པ་མི་རེ་ངོ་རེས་བོད་པའི་སྤྱི་དོན་ལ་འགན་ཁུར་ལེན་དགོས་པའི་བཀའ་སྤྱི་ཕེབས་པ་ལྟར། སྐུ་ཞབས་བག་གྲོ་ལགས་ཀྱིས་བོད་ནང་རྒྱ་གཞུང་གི་སྲིད་བྱུས་ལ་ཞི་རྒོལ་བྱས་རྐྱེན་བཙོན་འཇུག་བྱས་པའི་དཀའ་སྡུག་རྣམས་དེབ་ཐོག་བཀོད་པ་དེ་ཡང་འགན་ཁུར་བའི་མཚོན་རྟགས་ལྟ་བུ་ཆགས་ཡོད། མཐར་ཁོང་བཙོན་འཇུག་གི་དུས་ཡུན་རྫོགས་རྗེས་བཙན་བྱོལ་སྤྱི་ཚོགས་ནང་འབྱོར་ནས་བོད་དོན་ཆེེད་ལས་འགུལ་མང་དག་ཅིག་སྤེལ་ཡོད་པ་ངས་གསལ་བཤད་བྱེད་མི་དགོས་པར་ཚང་མས་ཤེས་གསལ་ཡིན། གང་ལྟར་ཁོང་གིས་ལས་དོན་དེ་དག་བསྒྲུབས་ཡོད་པར་བརྟེན། དེར་ང་ཚོས་དོ་སྣང་སྤྲད་པ་དང་ཆབས་ཅིག་བསྔགས་བརྗོད་ཞུ་དགོས་པ་ཞིག་ཀྱང་ཡིན། ང་ཚོ་ཚང་མས་ཁོང་གི་ལས་དོན་བྱེད་ཕྱོགས་དང་རྩོམ་འབྲི་གནང་བའི་དཔེ་དེབ་ཀྱི་ནང་དོན་ལ་ཐུགས་སྣང་གནང་ན་ཕན་ཐོགས་ཆེན་པོ་ཡོད། ལྷག་པར་ཁོང་གིས་རྩོམ་སྒྲིག་བྱས་པའི་དཀའ་ཚེགས་ཆེ་བའི་ལམ་བུ་ཞེས་པའི་དཔེ་དེབ་འདིའི་བརྗོད་བྱ་ལྟ་བུ་མཚོན་ན་ཞེ་དྲག་གི་གནད་འགག་ཆེན་པོ་རེད། དེ་བཞིན་འཛམ་གླིང་འདིའི་སྟེང་རྒྱལ་ཁབ་མང་པོ་ཡོད་པའི་ནང་ནས་བོད་གངས་ཅན་ལྗོངས་འདི་འཕགས་པ་སྤྱན་རས་གཟིགས་ཀྱི་གདུལ་ཞིང་ཡིན་པ་མ་ཟད། ཆོས་རྒྱལ་རིམ་བྱོན་དང། ༸རྒྱལ་དབང་རིམ་བྱོན། དེའི་ནང་ནས་དམིགས་སུ་བཀར་ནས་བོད་བསྟན་སྲིད་གཉིས་ཀྱི་ཐོག་ཐུགས་འགན་བཞེས་མཁན་ནང་ནས་འབུར་དུ་ཐོན་མཁན་དཔེ་དེབ་འདིའི་ནང་བཀོད་པའི་༸རྒྱལ་དབང་སྐུ་ཕྲེང་ལྔ་པ་ཆེན་པོ་མཆོག་དང། བཅུ་གསུམ་པ་ཆེན་པོ་མཆོག ལྷག་པར་༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་བཅས་ཀྱི་མཛད་འཕྲིན་སྤྱི་དང་། བྱེ་བྲག་ཁོང་རང་ཉིད་ཀྱི་མི་ཚེའི་ནང་དཀའ་སྡུག་མྱངས་པའི་དངོས་ཡོད་ལོ་རྒྱུས་བྲིས་ཡོད་འདུག་པས་དེ་དག་ལ་ང་ཚོས་དོ་སྣང་བྱེད་རྒྱུ་གལ་ཆེན་པོ་ཡིན་ཞེས་སོགས་ཀྱི་གསུང་བཤད་གནང་ཡོད།
དེ་ནས་རྩོམ་པ་པོས་དཔེ་དེབ་ཐོག་དཔལ་འབྱོར་གྱི་མཐུན་འགྱུར་སྐྲུན་མཁན་སོགས་ལ་ཐུགས་རྗེ་ཆེ་ཞུས་ཡོད་པ་བཅས། །
