༢༠༡༡ ཟླ་ ༤ ཚེས་ ༢༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༡༨ ཉིན་འདི་གར་བོད་གཞུང་ཐེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན།
བོད་གཞུང་ཐེ་ཝན་སྐུ་ཚབ་དོན་ཁང་གི་ལམ་སྟོན་འོག་སྔ་ལོ་ཐེ་ཝན་གཞུང་ལ་དེབ་སྐྱེལ་གསར་འཛུགས་གནང་བའི་གངས་ལྗོངས་དཔེ་སྐྲུན་ཁང་ནས་ཉེ་ཆར་གསར་དུ་འདོན་སྤེལ་ཞུས་པའི་བོད་དོན་སྐོར་གྱི་རྒྱ་ཡིག་དཔེ་དེབ་གྲངས་བཞི་དབུ་འབྱེད་ཀྱི་མཛད་སྒོ་ཞིག་གནང་བ་རེད། ཕྱི་ཟླ་ ༤ ཚེས་ ༡༩ ཉིན། དཔལ་ལྡན་སྐུ་སྒེར་ཡིག་ཚང་གི་དྲུང་ཆེ་རྔ་བ་ཚེ་རྒྱམ་མཆོག་ཐེ་ཝན་དུ་ཕེབས་ཞོར་དང་བསྟུན་ནས་གངས་ལྗོངས་དེབ་ཕྲེང་ཞེས་པའི་རྒྱ་ཡིག་གི་དཔེ་དེབ་བཞི་དབུ་འབྱེད་གནང་ཞིང་། དོན་གཅོད་ཟླ་བ་ཚེ་རིང་ལགས་ནས་དཔེ་དེབ་རེ་རེ་བཞིན་ངོ་སྤྲོད་མདོར་བསྡུས་གནང་ཡོད། ཉེ་ཆར་ཕྱི་ཟླ་གསུམ་པ་དང་བཞི་པ་ནང་གསར་དུ་འདོན་སྤེལ་གནང་བའི་དཔེ་དེབ་ཁག་བཞི་ནི། ༡༽ བོད་མདོ་སྨད་ཁུལ་དུ་འཁྲུངས་པའི་ནགས་ཚང་ནུས་བློས་བྲིས་པའི་རང་གི་མི་ཚེའི་ལོ་རྒྱུས་ནགས་ཚང་ཞི་ལུའི་སྐྱིད་སྡུག་ཅེས་པ་དང་། ༢༽ རྒྱལ་སྤྱིའི་ཁྲིམས་དོན་མཁས་པས་རྩོམ་བྲིས་གནང་བའི་བོད་ཀྱི་གནས་བབ་ཅེས་པ་རྒྱ་ཡིག་དཔར་ཐེངས་གཉིས་པ། ༣༽ བོད་གཞུང་ཐེ་ཝན་སྐུ་ཚབ་དོན་ཁང་ནས་ཕྱོགས་སྒྲིག་ཞུས་པའི་ལོ་ལྔ་བཅུ་བཙན་བྱོལ་དུ་འདས་པའི་བོད་མིའི་སྐྱིད་སྡུག་དྲན་གསོའི་འགྲེམས་སྟོན་དཔར་རིགས་བརྙན་དེབ། ༤༽ ཉི་ཧོང་གི་རྩོམ་པ་པོ་སྐུ་ཞབས་ (Tetsu Saiwai) ཡིས་༸གོང་ས་ཏཱ་ལའི་བླ་མ་མཆོག་གི་མཛད་རྣམ་རི་མོའི་བརྙན་དེབ་ (Cartoon) ་བཅས་ཡིན་པ་རེད། གངས་ལྗོངས་དཔེ་སྐྲུན་ཁང་སྔ་ལོ་གསར་་དུ་བཙུགས་རྗེས་མདོ་སྨད་དོལ་རྒྱལ་ཞིབ་འཇུག་ཚོགས་ཆུང་ནས་རྩོམ་སྒྲིག་གནང་བའི་དོལ་རྒྱལ་གྱི་བྱུང་རིམ་དང་རྙོག་གླེང་ལ་དཔྱད་པ་གཡའ་སེལ་མེ་ལོང་ཞེས་པ་དང་།
ཐེ་ཝན་གྱི་དགེ་རྒན་ལུའུ་ཧུད་ཅོན་ལགས་བཙན་བྱོལ་སྤྱི་ཚོགས་ཀྱི་སློབ་གྲ་ཁག་ནང་བསྐྱོད་ནས་དགེ་སློབ་རྣམས་ལ་བཅར་འདྲི་ཞུས་ཏེ་འབྲི་རྩོམ་གནང་བ་བཙན་བྱོལ་བོད་ཀྱི་ཤེས་ཡོན་གླེང་བ་ཞེས་པའི་གངས་ལྗོངས་དེབ་ཕྲེང་དང་པོ་དང་གཉིས་པ་འགྲེམས་སྤེལ་གནང་ཟིན་ཡོད། གངས་ལྗོངས་དཔེ་སྐྲུན་ཁང་ནས་དཔར་སྐྲུན་ཞུས་པའི་རྒྱ་ཡིག་དེབ་རིགས་ཁག་དེང་སྐབས་ཐེ་ཝན་རྒྱལ་ཡོངས་ཀྱི་དེབ་ཚོང་ཁང་ཆེ་ཁག་ནང་ཚོང་འགྲེམས་བྱེད་མུས་ཐོག ནུབ་ཕྱོགས་དང་ཧོང་ཀོང་སོགས་ཡུལ་གྲུ་ཁག་གི་རྒྱ་ཡིག་དེབ་ཚོང་ཁང་དུ་ཡོངས་ཁྱབ་འགྲེམས་སྤེལ་བྱ་རྒྱུའི་ལས་རིམ་འགྲོ་བཞིན་ཡོད་པ་བཅས།།
