༢༠༡༡ ཟླ་ ༤ ཚེས་ ༢༩ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གྷོ་ཀོ་ཇི་དགོན་པར་ (Gokokuji Temple) ཆིབས་སྒྱུར་མ་བསྐྱང་གོང་ཉི་ཧོང་དང་ཕྱི་རྒྱལ་གྱི་གསར་འགོད་པ་དང་ལྷན་མཇལ་མོལ་མཛད་སྐབས་༸གོང་ས་མཆོག་གིས་བཀའ་་སློབ་སྩལ་དོན།
ངོས་རང་ཉི་ཧོང་ནང་འབྱུང་བའི་གནོད་འཚེ་གཅིག་རྗེས་གཉིས་མཐུད་དང་། དེ་བཞིན་རྡུལ་ཕྲན་འོད་རླངས་ (Nuclear radiation) ཀྱི་ཉེན་ཁ་སོགས་བྱུང་བར་སེམས་འཚབ་ཧ་ཅང་ཆེན་པོ་བྱུང་།

འོན་ཀྱང་ངོས་རང་ཉི་ཧོང་མི་མང་ཚོར་གདུང་སེམས་མཉམ་སྐྱེ་ཞུ་པའི་ཐོག་གོད་ཆག་འོག་རྐྱེན་འདས་སུ་ཕྱིན་པ་རྣམས་ལ་མཆོད་འབུལ་སྨོན་ལམ་བྱེད་རྒྱུའི་གོ་སྐབས་ཐོབ་པར་ཧ་ཅང་དགའ་བོ་བྱུང་།

རྐྱེན་ངན་ནི་བྱུང་ཚར་བ་རེད། དེར་སྡུག་བསྔལ་བྱས་པ་དེས་ཕན་ཐོགས་གང་ཡང་མེད། ཉི་ཧོང་གི་མི་མང་ཚོས་དམག་ཆེན་གཉིས་པའི་དཀའ་སྡུག་ལས་བཟོད་སྒོམ་གྱིས་རྒྱལ་ཐུབ་པ་བཞིན་ཐེངས་འདིའི་སྡུག་བསྔལ་ལས་རྒྱལ་ཐུབ་པའི་ངོས་ལ་ཡིད་ཆེས་གཙང་མ་ཡོད། ཁྱེད་རང་ཚོ་སེམས་ཤུགས་མ་ཆག་པའི་ཐོག་ནས་དངོས་ཡོད་གནས་ཚུལ་དེར་གདོང་ལེན་བྱེད་དགོས་ཞེས་བཀའ་ཕེབས་ཡོད།
དེ་རྗེས་གསར་འགོད་པ་ཞིག་གིས་ད་ལྟའི་བོད་ཀྱི་གནས་སྟངས་དང། མགོན་པོ་གང་ཉིད་མཆོག་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་ནས་འོས་འདེམས་བྱས་པའི་མི་སྣར་རྩིས་སྤྲོད་བྱེད་རྒྱུའི་ཐུགས་ཐག་བཅད་གནང་མཛད་པའི་སྐོར་གྱི་དྲི་བར་བཀའ་ལན་སྩལ་དོན། ངོས་ལ་བོད་མིའི་མང་གཙོ་དང་རང་དབང་ཐོག་འགན་ཡོད།
ད་ལྟའི་བོད་ནང་ཆབ་སྲིད་ཀྱི་མཚོ་རླབས་ (Political tsunami) འཕྱུར་བཞིན་ཡོད།
ད་ཆ་བོད་ནང་བོད་མིའི་ཆོས་དང་རིག་གཞུང་རྩ་བརླག་ཏུ་འགྲོ་རྒྱུའི་ཉེན་ཁར་བསླེབས་ཡོད། རྒྱ་ནག་སྲིད་གཞུང་གིས་བསམ་བཞིན་དུ་བྱེད་མིན་ལ་མ་ལྟོས་པར་བོད་ནང་བོད་མིའི་ཆོས་དང་རིག་གཞུང་རྩ་གཏོར་འགྲོ་བཞིན་ཡོད།  གསར་འགོད་པ་ཚོས་ངེས་པར་དུ་བོད་ནང་ཕེབས་ཏེ་དངོས་ཡོད་གནས་སྟངས་ཇི་ཡིན་རྟོག་ཞིབ་གནང་རོགས་ཞེས་བཀའ་ལན་སྩ་ལ་སྩལ་ཡོད།
དེ་བཞིན་གསར་འགོད་པ་གཞན་ཞིག་གིས་མགོན་པོ་གང་ཉིད་མཆོག་གིས་ཆབ་སྲིད་ཀྱི་སྐུ་དབང་མང་གཙོའི་ལམ་ནས་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་མཛད་རྒྱུའི་སྐོར་གྱི་དྲི་བར་བཀའ་ལན་སྩལ་དོན། འཛམ་གླིང་འདི་བཞིན་འགྲོ་བ་མིའི་རིགས་སྤྱི་ལ་བདག་དབང་ཡོད་པ་ལས་དེ་ནི་ཆོས་ཕྱོགས་ཀྱི་དབུ་ཁྲིད་འགའ་ཤས་ཤིག་དང་སྲིད་གཞུང་འགར་བདག་པ་ཞིག་རྩ་བ་ནས་མིན།  ཉི་ཧོང་ནི་ཉི་ཧོང་མི་མང་ཚོར་བདག་ཡོད། དེ་བཞིན་རྒྱ་ནག་ཀྱང་རྒྱ་ནག་མི་མང་དུང་ཕྱུར་ ༡༣ ཡོད་རྣམས་ལ་བདག་པ་རེད་མ་གཏོགས་དམར་ཤོག་ཚོགས་པར་བདག་པ་གང་ཡང་མིན་ཞེས་སོགས་འཀའ་ལན་སྩལ་ཡོད་པ་བཅས།།