༢༠༡༡ ཟླ་ ༤ ཚེས་ ༡ རེས་གཟའ་པ་སངས།
༄༅། །འདི་གར་བོན་པོའི་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་ཁུངས་ལྡན་གནས་ཚུལ་བཏང་བའི་ནང་འཁོད་དོན་ལྟར་ན། ཕྱི་ལོ་ ༢༠༡༡ ལོའི་གསུམ་བཅུའི་དུས་དྲན་ཉིན་ཁམས་འབའ་ཐང་རྫོང་གི་གྲོང་ཁྱེར་ནས་སློབ་ཕྲུག་གཉིས་ཀྱིས་བོད་ལ་རང་དབང་རང་བཙན་དགོས་པ་དང་། ༸རྒྱལ་དབང་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག་ཟེར་ནས་སྐད་འབོད་བྱེད་སྐབས་དུས་ཡུན་སྐར་མ་བཅུ་ཡས་མས་ཀྱི་མཚམས་སུ་ཉེན་རྟོག་མི་སྣས་འཛིན་བཟུང་བྱས་ཡོད་པ་མ་ཟད། དེ་མ་ཐག་དྲག་ཆས་གྱོན་པའི་དམག་མི་འབོར་ཆེན་བཀྲམས་ནས་ལམ་གྱི་སུམ་མདོ་ཡོད་ཚད་བཀག་སྡོམ་བྱས་ཡོད་འདུག དེ་བཞིན་བོད་ཟླ་དང་པོའི་ཚེས་བཅུ་བདུན་དང།  ཕྱི་ལོ་ ༢༠༡༡ ཟླ་ ༣ ཚེས་ ༢༡ ཉིན་འབའ་ཆོས་སྡེ་དགོན་གྱི་བྱམས་པ་གདན་འདྲེན་སྐབས་༸གོང་ས་མཆོག་གི་སྐུ་པར་ཆེན་པོ་ཞིག་གདུགས་འོག་ནས་དུང་རྒྱ་གླིང་གིས་སྔོན་བསུས་ཏེ་རྫོང་གྲོང་ཁྱེར་ནང་གདན་འདྲེན་ཞུས་ནས་བསྐྱོད་སྐབས་ཉེན་རྟོག་པས་བཀག་འགོག་བྱས་པར་བརྟེན་དགེ་འདུན་པ་དང་ཉེན་རྟོག་པ་བར་འཁྲུག་འཛིངས་ཀྱང་ཤོར་འདུག  ད་ལྟའི་ཆར་འབའ་ཐང་རྫོང་གྲོང་ཁྱེར་དང་འབའ་ཆོས་སྡེ་དགོན་པ་གཉིས་ལ་དྲག་ཆས་དམག་མིའི་ལྟ་སྲུང་འོག་གནས་ཡོད་འདུག་པ་མ་ཟད།  དུས་དེ་ནས་བཟུང་རྒྱ་གཞུང་གིས་འབའ་ཐང་ནང་དུ་ཕྱི་ཕྱོགས་ཀྱི་ཁ་པར་སོགས་བཀག་སྡོམ་བྱས་པར་བརྟེན།  གོང་གསལ་སྐད་འབོད་བྱེད་མཁན་སུ་ཡིན་མིན་དང་། དགེ་འདུན་པ་དང་ཉེན་རྟོག་པའི་དབར་འཁྲུག་འཛིངས་སྐབས་རྨས་སྐྱོན་ཤོར་ཡོད་མེད། དགེ་འདུན་པ་ཚོད་འཛིན་བཟུང་བྱས་ཡོད་མེད་ཀྱི་གནས་ཚུལ་གསལ་པོ་ཤེས་རྟོགས་མི་ཐུབ་པའི་གནས་སུ་ལྷུང་ཡོད་པ་བཅས།།