༢༠༡༡ ཟླ་ ༤ ཚེས་ ༡༦ རེས་གཟའ་སྤེན་པ།
༅༅། །ཕྱི་ལོ་ ༢༠༡༡ ཟླ་ ༤ ཚེས་ ༡༤ ཉིན་ཨོ་སི་ཊོ་ལི་ཡའི་ལྗང་ཁུ་ཚོགས་པའི་ (Australian Greens Leader)  འགན་འཛིན་ནམ་ཨོ་སི་ཊོ་ལི་ཡའི་གྲོས་ཚོགས་གོང་མའི་འཐུས་མི་སྐུ་ཞབས་བྷོབ་བྷ་རོན་(Bob Brown) མཆོག་གིས་ཨོ་སི་ཊོ་ལི་ཡའི་ཕྱི་སྲིད་བློན་ཆེན་ཀེ་ཝིན་རུ་ཌི་(Kevin Rudd) མཆོག་ལ་བོད་ནང་རྔ་པ་ཀིརྟི་དགོན་དུ་རྒྱ་ནག་གི་དམག་མིས་མཐའ་སྐོར་ཏེ་ཛ་དྲག་གི་གནས་སྟངས་དེར་རྒྱབ་སྐྱོར་ཡོང་བའི་འབོད་སྐུལ་ཞུ་ཡིག་ཕུལ་བའི་ནང་འཁོད་དོན།
ཕྱི་ལོ་ ༢༠༠༨ ལོར་བོད་ས་ཡོངས་སུ་ས་བྱི་ཞི་རྒོལ་ཆེན་མོ་བྱུང་སྟེ་ལོ་གསུམ་འཁོར་བའི་དྲན་རྟེན་དུ་ཟླ་བ་སྔོན་མར་དགོན་དེའི་དགེ་འདུན་པ་ཕུན་ཚོགས་ལགས་ཀྱིས་རང་ལུས་མེ་སྲེག་བཏང་སྟེ་ངོ་རྒོལ་གྱི་རྣམ་པ་བསྟན་པ་ནས་བཟུང་རྒྱ་དམག་གིས་ཀིརྟི་དགོན་དུ་དམ་བསྒྲགས་ཤུགས་ཆེ་བྱེད་བཞིན་ཡོད། རྔ་པ་ཁུལ་གྱི་བོད་མི་རྣམས་ཀྱིས་ཀིརྟི་དགོན་པའི་གནས་སྟངས་སྐོར་འཇིགས་སྣང་སྐྱེས་ཏེ་རྒྱ་དམག་གིས་དགོན་པའི་ནང་བཟའ་ཆས་རིགས་མཁོ་སྤྲོད་བྱེད་རྒྱུར་དམ་བསྒྲགས་བྱས་པ་མ་ཟད། དགོན་པའི་ནང་གི་དགེ་འདུན་པ་རྣམས་ཕྱིར་ཐོན་འཇུག་གི་མེད་སྐོར་འགྲེལ་བརྗོད་གནང་བཞིན་ཡོད། བོད་མི་ཁག་གཅིག་གིས་ཀིརྟི་དགོན་པའི་དགེ་འདུན་པ་དང་ཁོང་ཚོར་རྒྱབ་སྐྱོར་གནང་མཁན་ས་གནས་བོད་རིགས་ཚོ་རྒྱ་མིའི་དཔུང་དམག་གིས་འཛིན་བཟུང་བྱེད་རྒྱུ་དང་མཐའ་ན་ཁོང་ཚོའི་སྲོག་ལའང་ཉེན་ཁ་ཡོད་ཚུལ་གྱི་སེམས་འཚབ་བྱེད་བཞིན་འདུག་ཅེས་སོགས་འཁོད་འདུག

དེ་བཞིན་ཨོ་སི་ཊོ་ལི་ཡ་བོད་གཞུང་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་ཀྱིས་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ (International Tibet Network) ཚོགས་གཙོ་ལྕམ་སྐུ་ཨ་ལི་སོན་(Alison Reynold) ལགས་ལ་གྲོས་ཚོགས་གོང་མའི་འཐུས་མི་བྷོབ་བྷ་རོན་མཆོག་གི་མཁྱེན་རྟོག་སླད་དང་ཨོ་སི་ཊོ་ལི་ཡའི་སྲིད་བློན་དང་ཕྱི་སྲིད་བློན་ཆེན་མཆོག་རྣམ་གཉིས་ལ་རྔ་པ་ཀིརྟི་དགོན་དུ་དམ་བསྒྲགས་བྱེད་བཞིན་པ་དེ་མཚམས་འཇོག་ཡོང་བར་སྐུལ་མ་གནང་རོགས་ཞེས་འཁོད་པའི་ཞུ་ཡིག་ཀྱང་ཕུལ་ཡོད། ཕྱོགས་མཚུངས་ཨོ་སི་ཊོ་ལི་ཡ་བོད་གཞུང་སྐུ་ཚབ་དོན་གཅོད་ཀྱིས་ཨོ་སི་ཊོ་ལི་ཡའི་གྲོས་ཚོགས་གོང་མའི་འཐུས་མི་སྐུ་ཞབས་བྷོབ་བྷ་རོན་མཆོག་ལའང་རྒྱ་ནག་གཞུང་ཚབ་ལ་རྔ་པ་ཁུལ་གྱི་ཛ་དྲག་གནས་སྟངས་སྐོར་ཞུ་ཡིག་འབུལ་རོགས་ཞེས་འབོད་སྐུལ་ཡང་ཞུས་ཡོད་པ་མ་ཟད། ཡུ་རོབ་གྲོས་ཚོགས་ཀྱི་ཚོགས་མི་རྣམས་ཀྱིས་ཀྱང་རྔ་པ་ཀིརྟི་དགོན་གྱི་གནས་སྟངས་ཇེ་སྡུག་ཏུ་འགྲོ་བཞིན་པའི་སྐོར་སྦེལ་ཇམ་ (Belgian Foreign Ministry) ཕྱི་སྲིད་བློན་ཆེན་ལས་ཁུངས་སོགས་སུ་འབོད་སྐུལ་ཡང་ཞུས་ཡོད་པ་བཅས།།