༢༠༡༡ ཟླ་ ༤ ཚེས་ ༢༨ རེས་གཟའ་ཕུར་བུ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༡ ཟླ་ ༤ ཚེས་ ༢༧ ཉིན་བཏང་གནས་ནང་འཁོད་དོན།  ད་ལྟའི་བོད་ཨ་མདོ་རྔ་པའི་གནས་ཚུལ་འདི་ལྟར་ཛ་དྲག་དང་ཉེན་ཁའི་གནས་སུ་གྱར་ཡོད་པས།  གནས་སྟངས་འདི་རྒྱལ་སྤྱིའི་ཁྱོན་ལ་ཁྱབ་བསྒྲགས་བྱས་ཏེ། མཉམ་འབྲེལ་རྒྱལ་འཚོགས་ཀྱིས་གཙོས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་པ་དང་། ཆོས་དད་རང་མོས་ཀྱི་གནས་སྟངས་རྟོག་ཞིབ་སྡེ་ཚན། གང་བྱུང་འཛིན་བཟུང་གི་གནས་ཚུལ་རྟོག་ཞིབ་སྡེ་ཚན། གར་སོང་ཆ་མེད་ཀྱི་གནས་སྟངས་རྟོག་ཞིབ་སྡེ་ཚན་སོགས་རང་དབང་དང་དྲང་བདེན་ལ་བདེན་པའི་རྒྱབ་ལངས་བྱེད་མཁན་ཡོངས་ཀྱིས་རྒྱ་གཞུང་གི་ད་ལྟའི་བྱེད་སྟངས་ལ་འགོག་རྒོལ་བྱས་ཏེ། འཕྲལ་དུ་རྔ་པ་ཀིརྟིའི་དགོན་པ་གཙོ་བོར་གྱུར་པའི་རྔ་པའི་མི་མང་ཚང་མ་དམ་བསྒྲགས་བཀག་སྡོམ་གྱི་གནས་སྟངས་འདི་ལས་གྲོལ་ཆེད་དང་། རྔ་པའི་ད་ལྟའི་དངོས་ཡོད་གནས་སྟངས་ལ་རྟོག་ཞིབ་ཆེད་རང་དབང་གི་གསར་འགོད་པ་དང་ཞིབ་འཇུག་པ་སོགས་བོད་ནང་འགྲོ་སྐྱོད་ཡོང་བ་སོགས་ཀྱི་དམིགས་འདུན་ཆེད་བཞུགས་སྒར་ཀིརྟིའི་བྱེས་པ་གྲྭ་ཚང་དང་རྡོར་གླིང་སུ་ཁེའི་ཀིརྟིའི་དགོན་དགེ་ལྡན་བཀྲ་ཤིས་ཆོས་གླིང་གཉིས་ཀྱིས་མཉམ་དུ་གོ་སྒྲིག་དང་། བཀུར་འོས་སྤྱི་འཐུས་ཟླ་བ་ཚེ་རིང་རྣམ་གཉིས་དང་། མདོ་སྨད་དབུས་རྒྱུན་རྣམས། འབྲེལ་ཡོད་སྐྱ་སེར་ཉི་ཤུ་ཙམ་གྱི་རོགས་སྐྱོར་འོག་དགེ་འདུན་པ་རྐྱང་བའི་སེར་སྦྲེངས་སྙན་སྐུལ་སྨོན་ལམ་ཞིག་རྡ་ས་ནས་ལྡི་ལི་བར་འགྲོ་མུས་ཡིན་པ་དེའི་ཉིན་གཉིས་པ་ཕྱི་ཚེས་ ༢༧ ཉིན་གྱི་ཞོགས་པའི་དུས་ཚོད་ ༨།༣༠ ཙམ་ལ་ཀང་ར་གྲོང་ཁྱེར་གྱི་ལྟགས་རྒྱབ་ཀྱི་རི་ཞོལ་ནས་འགོ་འཛུགས་ཀྱིས་གྲོང་དང་གྲོང་ཁྱེར་གང་ཡོད་སར། དགེ་འདུན་པ་རྣམས་ཀྱིས་སེར་སྦྲེངས་སྙན་སྐུལ་སྨོན་ལམ་གནང་བཞིན་ཕེབས་ཏེ་མི་ཚོགས་མང་ས་དང་གནད་འགག་གི་ས་གནས་གར་ཡོད་ནས་ཧིན་དྷི་དང་དབྱིན་ཇིའི་སྐད་གཉིས་ནང་ལ་ལས་འགུལ་གྱི་ངོ་བོ་དང་དམིགས་ཡུལ་སོགས་ངོ་སྤྲོད་དང་འབྲེལ་གསར་འགོད་པའི་བཅར་འདྲི་དང་ལེན་བྱེད་བཞིན་ཕེབས་ཀྱིན་ཡོད་པ་ལྟར། ལྡེ་ར་གྲོང་རྡལ་གྱི་ཉེ་འདབས་ཙམ་ལ་སླེབས་སྐབས་དགེ་འདུན་པ་རྣམས་ཀྱིས་སེར་སྦྲེངས་བྱས་ཏེ་གཞུང་ལམ་བརྒྱུད་ནས་ཁྲོམ་ལ་སྐོར་བ་གཅིག་བརྒྱབ་སྟེ། སྔོན་གཤེགས་དཔའ་བོའི་རྗེས་དྲན་གྱི་རྡོ་སྐུ་ཡོད་སའི་ས་གནས་སུ་ཕེབས་སྟེ་དེ་ནས་ཧིན་དབྱིན་གཉིས་ཀའི་ནང་གསར་འགོད་གསར་བསྒྲགས་གནང་། ༼པ་དྷེ་ནས་རྒྱག་དྲན་དང་། ཨ་མར་ཨུ་ཇ་ལ༽གསར་ཁང་གཉིས་ཀྱི་གསར་འགོད་པའི་བཅར་འདྲི་དང་ལེན་གནང་ཡོད།  ཕྱེད་ཡོལ་ཙམ་གྱི་དུས་ཚོད་ ༡ ཐོག་ཨམ་བྷུས་ཞེས་པའི་གྲོང་རྡལ་ཞིག་ལ་འབྱོར་བ་དང་། གྲོང་རྡལ་དེའི་སྤྱི་སྤྱོད་རླངས་འཁོར་འབབ་ཚིགས་སུ་བོད་ནང་ནས་མཚོན་དང་མནར་གཅོད་འོག་འདས་གྲོངས་སུ་གྱུར་པའི་དཔའ་བོ་དཔའ་མོ་རྣམས་ཀྱི་སྐུ་པར་བཤམས་སྟོན་དང་འབྲེལ། ཧིན་བོད་རོགས་སྐྱོར་ཚོགས་པའི་དྲུང་ཆེ་སློབ་དཔོན་ཆེན་མོ་བས་བེ་ཀི་ཀོ་མར་དང་།  གོང་ཞུས་ཚོགས་པའི་ཚོགས་མི་སློབ་དཔོན་ཆེན་མོ་ཡ་ཤི་པལ་ཤར་མ་རྣམ་གཉིས་གདན་ཞུས་ལྟར་ཕེབས་ཏེ་གསུང་བཤད་གནང་དོན།
དེ་རིང་གི་ལས་འགུལ་འདི་ལ་རྒྱབ་སྐྱོར་དང་བོད་ནང་གི་གནས་སྟངས་ལ་གདུང་སེམས་མཉམ་སྐྱེ་དང་བཅས་ཏེ། འཛམ་གླིང་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་སོགས་རང་དབང་གི་རྣམ་དབྱེ་མང་པོ་ཞིག་དུས་རྒྱུན་གསུང་མཁན་ཤིན་ཏུ་མང་བ་ལས་ཀྱང་ལྷག་པའི་དངོས་ཡོད་ཐོག་རང་དབང་དེ་དག་རྩ་བ་ནས་འགག་པའི་མི་མང་དང་ལུང་པ་ཧ་ཅང་མང་པོ་ཞིག་ཡོད་པ་རེད།  དཔེར་མཚོན་གཅིག་ནི་བོད་ནང་གི་བོད་མི་ཚོ་དང་བོད་ཀྱི་ལུང་པ་ལྟ་བུ་རེད་ཅེས་སོགས་བོད་དོན་དང་འབྲེལ་བའི་གསུང་བཤད་གནང་ཡོད།  སྐབས་དེར་རྒྱ་གར་གྱི་ཁྲིམས་རྩོད་པ་གསུམ་དང་མི་མང་མང་པོ་ཞིག་ཀྱང་མཉམ་ཞུགས་གནང་ཡོད་པ་མ་ཟད།  བོད་དོན་སྤྱི་དང་བྱེ་བྲག་རྔ་པའི་ད་ལྟའི་གནས་སྟངས་སྐོར་ལ་ཟུར་དུ་གླེང་མོལ་ཡང་གང་མང་གནང་ཡོད།
དེ་ནས་ཆུ་ཚོད་ ༢  པ་ཡོལ་ཙམ་ལ་སྔོན་བསྐྱོད་གོ་སྒྲིག་པ་ཚོས་གོ་སྒྲིག་ལྟར་ཨམ་བྷུས་ཞེས་པའི་གྲོང་གི་མཐའ་ཙམ་ལ་ཉིན་གུང་གི་ཞལ་ལག་མཆོད་རྗེས་ཕྱི་དྲོའི་དུས་ཚོད་ ༣།༣༠ ཡོལ་ཙམ་ལ་རླངས་འཁོར་ནང་བསྡད་དེ་འོས་ནཱ་ཞེས་པའི་ས་གནས་སུ་ཕེབས་པ་དང་། ས་གནས་དེ་གའི་ཚོགས་ཁང་ཞིག་ཏུ་གསར་འགོད་ལྷན་ཚོགས་ཤིག་གོ་སྒྲིག་གནང་སྟེ། ཧིན་དྷི་དང་དབྱིན་ཇི་གཉིས་ཀའི་ནང་དེང་སྐབས་ཀྱི་རྔ་པའི་གནས་སྟངས་ངོ་སྤྲོད་དང་འབྲེལ་དེ་ལས་མྱུར་སྐྱོབ་ཆེད་སེར་སྦྲེངས་སྙན་སྐུལ་སྨོན་ལམ་ཞིག་འགྲོ་མུས་ཡིན་པ་སོགས་ལས་འགུལ་འདིའི་སྐོར་ཡང་ངོ་སྤྲོད་དང་། མཐར་གསར་འགོད་པའི་བཅར་འདྲི་དང་ལེན་བྱས་ཏེ་དངོས་ཡོད་གནས་སྟངས་རྣམས་ཞིབ་གསལ་འགྲེལ་བརྗོད་གནང་ཡོད།  དེ་ནས་སྤྱི་ལེ་དྲུག་ཙམ་གྱི་ས་ན་ཡོད་པའི་དགེ་རྒན་འོས་སྦྱོང་གི་མཐོ་སློབ་ཁང་ཞིག་གིས་མགྲོན་འབོད་གནང་བ་ལྟར་ཕེབས་སྐབས་སློབ་གྲྭ་དེའི་དགེ་སློབ་ལས་བྱེད་ ༧༠ ཙམ་གྱིས་ཕེབས་བསུའི་མེ་ཏོག་གི་ཕྲེང་བ་ཕུལ་ཞིང་། སློབ་གྲྭ་དེའི་གཙོ་འཛིན་དང་སློབ་དཔོན་ཆེན་མོ་ནེ་མར་ཏྲ་ཀོར་མཆོག་ནས་ལས་འགུལ་དང་འབྲེལ་བའི་གསུང་བཤད་གནང་། ལས་འགུལ་སྣེ་འཁྲིད་པ་གསུམ་ལ་རས་གཟན་དཀར་པོ་དང་། མཐུན་འགྱུར་རོགས་རམ་གནང་མཁན་བཞི་ལ་ཧི་མ་ཅལ་གྱི་ཐུན་མོང་མ་ཡིན་པའི་ཞྭ་མོ་ལག་རྟགས་གནང་། དེ་བཞིན་དགེ་འདུན་པ་རྣམས་ཀྱིས་སྨོན་ལམ་གསུང་གནང་སྟེ་མཛད་སྒོ་མཇུག་བསྡུས།  སྤྱིར་སློབ་གྲྭ་དེ་ཉིན་དགོང་མོའི་བཞུགས་གནས་དང་། ཞལ་ལག་ཡོངས་རྫོགས་གྲ་སྒྲིག་ཆ་ཚང་གནང་ཡོད་ཀྱང་སྔ་ཉིན་ནས་ཧི་མ་ཅལ་འགྲིམ་འགྲུལ་བློན་ཆེན་ཟུར་པས་བཀོད་མངགས་ལྟར་སྐུ་ཞབས་མར་ཤར་ནས་མཆོག་གིས་འོས་ནཱ་ས་གནས་ཀྱི་གཟའ་སྤེན་པའི་ལྷ་ཁང་གི་ཁྲིས་སུ་སྡོད་གུར་དང་ཞལ་ལག་ཡོངས་རྫོགས་གྲ་སྒྲིག་གནང་ཟིན་པ་དེར་ཕྱིར་ཕེབས་ཏེ། བཞུགས་གནས་དེར་མར་མེ་ཁྲོམ་སྐོར་ཞིག་དང་(24×7) ཞེས་པའི་གསར་ཁང་གི་གསར་འགོད་པའི་བཅར་འདྲི་དང་ལེན་གནང་སྟེ་ཉིན་གཅིག་གི་ལས་འགུལ་ཡོངས་སུ་མཇུག་བསྡུས་ཡོད་པ་བཅས།།