༢༠༡༡ ཟླ་ ༤ ཚེས་ ༡༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༡༣ ནས་འགོ་འཛུགས་ཀྱིས་ཚེས་ ༡༥ བར་ཉིན་གྲངས་གསུམ་རིང་རྒྱ་གར་ལྷོ་ཕྱོགས་སྦེལ་ཀོབ་ཏུ་རྟེན་གཞི་བྱས་པའི་དབུས་བོད་མིའི་སློབ་གྲྭ་དབུ་བརྙེས་ནས་དུས་དྲན་སློབ་གྲྭ་དེ་ནས་ཐོན་པའི་སློབ་ཕྲུག་ཟུར་པ་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག་གིས་གཙོས་ཕྱི་ནང་གི་སློབ་ཕྲུག་ཟུར་པ་རྣམས་ཀྱིས་འགན་ཁུར་ཐོག་སྲུང་བརྩི་ཞུ་འགོ་ཚུགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་མཛད་སྒོའི་སྐུ་མགྲོན་གཙོ་བོ་ཤེས་རིག་ལས་ཁུངས་ཀྱི་དྲུང་ཆེ་གཡུ་ཐོག་ཀརྨ་དགེ་ལེགས་ལགས་དང་ཤེས་ཡོན་འགན་འཛིན་ཚེ་རིང་བསམ་གྲུབ་ལགས། དེ་བཞིན་རྒྱ་གར་བོད་སློབ་འཛིན་ཚོགས་ཀྱི་ངེས་སྟོན་པ། ཤེས་ཡོན་འགན་འཛིན། སྦེལ་ཀོབ་གཞིས་ཆགས་གསར་རྙིང་གཉིས་ཀྱི་ས་གནས་འགོ་འཛིན། དགོན་སྡེ་གྲྭ་ཚང་ཁག་གི་སྐུ་ཚབ་སོགས་ཚང་འཛོམས་ཐོག་སྐུ་མགྲོན་གཙོ་བོས་སྣང་གསལ་ཞལ་ཕྱེ་གནང་གྲུབ་མཚམས་བོད་མི་མང་སྤྱི་འཐུས་ཚོགས་མཆོག་གིས་གསུང་བཤད་གནང་དོན། དེ་རིང་འདིར་ང་ཚོས་(CST)ཉིན་སློབ་དང་(CVP)དབུས་བོད་སློབ་གཉིས་མཉམ་དུ་ལོ་ལྔ་བཅུ་འཁོར་བའི་དུས་དྲན་སྲུང་བརྩི་ཞུ་གི་ཡོད། གཞིས་ཆགས་དང་སློབ་གྲྭ་གཉིས་ཚགས་ཚུད་ངང་ནས་གནས་ཐུབ་པ་དེ་ནི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྗེ་བཀའ་དྲིན་དང་ཡང་སྒོས་རྒྱ་གར་དབུས་གཞུང་དང་། ལྷག་པར་ཀར་ཎ་ཊ་ཀ་མངའ་སྡེའི་གཞུང་གི་བཀའ་དྲིན་ལ་བརྟེན་ནས་བྱུང་བ་ཞིག་རེད། དེ་རིང་གི་གོ་སྐབས་འདི་བརྒྱུད་ནས་རྒྱ་གར་དབུས་གཞུང་དང་མི་མང་། དེ་བཞིན་ཀར་ཎ་ཊ་ཀ་མངའ་སྡེ་གཞུང་དང་མི་མང་རྣམས་ལ་དམིགས་བསལ་ཐུགས་རྗེ་ཆེ་ཞུ་རྒྱུ་ཡིན། གཞིས་ཆགས་འདི་ཚགས་ཚུད་ཡོང་ཐུབ་རྒྱུའི་རྒྱུ་རྐྱེན་གཙོ་བོ་དེ་གཞིས་ཆགས་འདིའི་མི་རབས་རྒན་པ་རྣམས་ཀྱིས་སྐུ་ལས་ཚད་མེད་བསྐྱོན་ནས་བྱུང་བ་ཞིག་ཆགས་ཡོད། དེར་བརྟེན་གཞིས་ཆགས་གསར་རྙིང་གཉིས་ཀྱི་ནང་དུ་གནས་པའི་རྒན་རབས་པ་རྣམས་ཀྱི་བཀའ་དྲིན་ལ་ང་ཚོས་རྗེས་དྲན་ཞུ་དགོས་པ་ཡིན། ཕྱོགས་མཚུངས་ང་ཚོ་ལྟ་བུའི་སློབ་ཕྲུག་གཅིག་གིས་བཙན་བྱོལ་བོད་གཞུང་གི་འགན་འཁྱེར་ནས་གོ་གནས་ཤིག་ལ་བསླེབས་ཐུབ་ཀྱི་ཡོད་ན། ད་ལྟ་སློབ་སྦྱོང་བྱེད་བཞིན་པའི་སློབ་ཕྲུག་ཁྱེད་རང་ཚོར་དེ་བས་ཀྱང་གོ་སྐབས་དང་མཐུན་རྐྱེན་མང་བ་ཡོད་པར་བརྟེན། སློབ་གྲྭ་སྒྲིམ་བཞིན་པའི་སྐབས་ལ་སློབ་སྦྱོང་ཧུར་ཐག་འབད་ཐག་བྱེད་དགོས། སླད་ཕྱིན་བཙན་བྱོལ་བོད་གཞུང་གི་སྒྲོམ་གཞིའི་ནང་བསྡད་ནའང་འདྲ། བཙན་བྱོལ་བོད་གཞུང་གི་སྒྲོམ་གཞིའི་ཕྱི་ལོགས་སུ་བསྡད་རུང་བོད་སྤྱིའི་ལས་དོན་ཐོག་ཞབས་ཞུ་བསྒྲུབ་རྒྱུའི་འགན་ཆེ་ཙམ་ལེན་དགོས་པ་ཞིག་ཡིན་ཞེས་གསུང་བཤད་གནང་།
དེ་བཞིན་སྐུ་མགྲོན་གཙོ་བོ་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་ཀྱིས་གསུང་བཤད་གནང་བའི་ནང། རྒྱ་གར་དབུས་གཞུང་དང་ལྷག་པར་ཀར་ཎ་ཊ་ཀ་མངའ་སྡེ་གཞུང་གིས་ལོ་ངོ་ལྔ་བཅུའི་རིང་བོད་མི་རྣམས་ལ་ཤེས་ཡོན་གྱི་མཐུན་འགྱུར་དང་གོ་སྐབས་གནང་བར་ཐུགས་རྗེ་ཆེ་ཞུའི་གསུང་བཤད་གནང་ཡོད། དེ་ནས་རྒྱ་གར་གྱི་སྐུ་མགྲོན་རྣམས་ནས་གསུང་བཤད་རིམ་པས་གནང་རྗེས་སློབ་གྲྭ་དེར་ལོ་མང་ཞབས་འདེགས་སྒྲུབ་མཁན་གྱི་དགེ་རྒན་ཟུར་པ་དང་དགེ་རྒན་རྣམས་ལ་ཐུགས་རྗེ་ལེགས་སོའི་ཕྱག་རྟགས་གནང་། དེ་རྗེས་སློབ་གྲྭ་དེའི་ལོ་ངོ་ལྔ་བཅུའི་འཕེལ་རིམ་འདྲ་པར་གྱི་ལམ་ནས་འགྲེམས་སྟོན་དང་སློབ་ཕྲུག་རྣམས་ཀྱིས་གཞས་སྣ་འཁྲབ་སྟོན་གནང་སྟེ། སློབ་གྲྭ་དེ་བཙུགས་ནས་ལོ་ལྔ་བཅུ་འཁོར་བའི་དུས་ཆེན་སྲུང་བརྩི་གཟབ་རྒྱས་ངང་ཞུ་བཞིན་ཡོད་པ་བཅས། །