༢༠༡༡ ཟླ་ ༤ ཚེས་ ༡༥ རེས་གཟའ་པ་སངས།
༄༅། །ཉེ་ལམ་བོད་མདོ་སྨད་རྔ་པ་ཀིརྟི་དགོན་པ་གཙོ་བོར་གྱུར་བའི་འབྲེལ་ཡོད་ས་གནས་ཡུལ་མི་རྣམས་ལ་རྒྱ་ནག་གཞུང་གིས་དམ་བསྒྲགས་ཤུགས་ཆེ་བྱེད་བཞིན་ཡོད་པར་བརྟེན། ཕྱི་ལོ་ ༢༠༡༡ ཟླ་ ༤ ཚེས་ ༡༤ ཉིན་བཙན་བྱོལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་རྒྱ་རི་སྒྲོལ་མ་མཆོག་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་བྷན་ཀི་མུན་མཆོག་ལ་ཕུལ་བའི་ཞུ་སྙན་ནང་འཁོད་དོན།
ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པ་དེར་ཐུགས་སྣང་ཡོང་བའི་འབོད་སྐུལ་ཞུ་བཞིན་ཡོད། ཕྱི་ལོ་ ༢༠༡༡ ཟླ་ ༣ ཚེས་ ༡༦ ཉིན་དགུང་གྲངས་ ༢༠ ལ་སོན་པའི་ཀིརྟི་དགོན་པའི་དགེ་འདུན་པ་ཕུན་ཚོགས་ལགས་ཀྱིས་རྒྱ་ནག་སྲིད་གཞུང་གི་དྲང་བདེན་མིན་པའི་སྲིད་བྱུས་ལག་བསྟར་བྱས་པར་ཆོལ་གསུམ་བོད་མི་རྣམས་ཀྱིས་ས་བྱ་ཞི་རྒོལ་ཆེན་མོའི་ཞི་བའི་སྒེར་ལངས་བྱས་ཏེ་ད་བར་ལོ་ངོ་གསུམ་ཁོར་བའི་དུས་ཚིགས་དང་སྟབས་བསྟུན། རང་ཉིད་ཀྱི་སྐུ་གཟུགས་ཞུགས་འབུལ་གནང་སྟེ་ཕྱི་ཉིན་འདས་གྲོངས་སུ་གྱུར་ཡོད།
དེར་བརྟེན་དགེ་འདུན་པ་གྲངས་ ༡༠༠༠ ཙམ་དང་ས་གནས་ཡུལ་མི་ཁག་གཅིག་བཅས་ཀྱིས་ཞི་བའི་ལམ་ནས་ཁོང་ལ་གདུང་སེམས་མཉམ་སྐྱེ་བྱས་པར་རྒྱ་ནག་གཞུང་གིས་དྲག་གནོན་བྱས་ཡོད། ད་བར་ང་ཚོར་ཁུངས་ལྡན་གནས་ཚུལ་འབྱོར་བར་གཞིགས་ན་ཀིརྟི་དགོན་པའི་མཐའ་འཁོར་དུ་ཟེ་མ་ར་སྒོ་བཙུགས་པ་མ་ཟད། དགོན་པའི་ཕྱི་རོལ་དུ་ལྕགས་རི་བསྐོར་ཏེ། ཕྱི་མི་ནང་དང་ནང་མི་ཕྱིར་མ་བཏང་བ་སོགས་མདོར་ན་དགོན་པ་དེ་བཞིན་བཙོན་ཁང་ལྟ་བུར་གྱུར་ཡོད། དགེ་འདུན་པ་ཚོར་ཉིན་རེའི་སློབ་པ་སློབ་གཉེར་དང་ཕྱག་མཆོད་འབུལ་བྱེད་རྒྱུ་ལྟ་ཞོག་མཐའ་ན་སངས་གསོལ་ཡང་གཏོང་མི་ཆོག་པའི་བཙན་བཀའ་བཏང་ཡོད། དགོན་པའི་ཕྱི་ནང་གཉིས་ནས་རྒྱ་མིའི་དམག་མིས་དམ་བསྒྲགས་ཆེན་པོས་སོ་མྱུལ་བྱེད་མུས་ཡིན། ཕྱི་ལོ་ ༢༠༡༡ ཟླ་ ༣ ཚེས་ ༢༢ ཉིན་དགེ་འདུན་པ་ཕུན་ཚོགས་ལགས་ཀྱི་གཅུང་པོ་ཀིརྟི་དགོན་པའི་དགེ་འདུན་པ་བློ་བཟང་ཚེ་བརྟན་དང་ཁོང་གི་ཨ་ཞང་གཉིས་རྒྱ་མིའི་དམག་མིས་འཛིན་བཟུང་བྱས་པ་རེ་ཞིག་གློད་བཀྲོལ་ཐོབ་ཡོད་ནའང་། ཕྱི་ལོ་ ༢༠༡༡ ཟླ་ ༤ ཚེས་ ༡༢ ཉིན་སླར་ཡང་འཛིན་ཟུང་བྱས་ཡོད། བཙན་དབང་གིས་ཡུལ་མི་གང་བྱུང་འཛིན་བཟུང་དང་དྲག་གནོན་མུ་མཐུད་བྱེད་བཞིན་ཡོད།
ང་ཚོས་གོ་ཐོས་ལ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་དྲག་པོའི་དཔུང་དམག་གིས་རང་ལོ་ ༡༨ ནས་ ༤༠ སོན་པའི་ཡུལ་མི་རྣམས་ཆ་རྒྱུས་མེད་པའི་ས་གནས་ཤིག་ཏུ་འཁྲིད་རྒྱུའི་བཀོད་ཁྱབ་བཏང་བའི་གནས་ཚུལ་གོ་ཐོས་བྱུང་བར་ཧ་ཅང་སེམས་འཚབ་ཆེན་པོ་བྱུང་། བོད་ནང་དགོན་པ་རྩ་ཆེ་ཤོས་གྲས་ཤིག་གི་དགེ་འདུན་ཞལ་གྲངས་ ༢༥༠༠ ཙམ་གྱི་བདེ་འཇགས་དང་། ཆེ་མཐོང་། འགྲོ་བ་མིའི་ཐོབ་ཐང་སོགས་ལ་ཉེན་ཚབས་ཧ་ཅང་འཕྲད་བཞིན་ཡོད། རྒྱ་མིའི་དམག་མིས་དྲག་གནོན་བྱེད་མིན་ལ་མ་ལྟོས་པར་ས་གནས་བོད་མི་ཚོས་དགེ་འདུན་པ་ཚོར་གདུང་སེམས་མཉམ་སྐྱེ་ངང་ནས་རྒྱབ་སྐྱོར་ཞུས་ཡོད། དེ་བཞིན་ཕྱི་ལོ་ ༢༠༡༡ ཟླ་ ༣ ཚེས་ ༢༢ ཉིན་དེར་རྡོ་དཀར་ལགས་ཀྱང་ཕྱི་ལོ་ ༢༠༠༩ ལོར་འབར་རྫས་གཡུགས་པ་དང་ཕྱི་ལོ་ ༢༠༠༨ ལོར་འཕྲེད་དར་ཐོགས་ཏེ་བོད་རང་བཙན་དགོས་པའི་སྐད་འབོད་བརྒྱབ་པའི་ཉེས་འཛུགས་འོག་འཛིན་བཟུང་བྱས་ཡོད།
ཕྱོགས་མཚུངས་ལྕགས་རྭ་དཔལ་འབར་ནས་ཡིན་པའི་བོད་མི་རྩོམ་པ་པོ་བསྟན་པ་བློ་གྲོས་ལགས་ཕྱི་ལོ་ ༢༠༡༠ ཟླ་ ༡༢ ཚེས་ ༢༩ ཉིན་རྒྱ་མིས་འཛིན་བཟུང་བྱས་ཏེ་ད་བར་ལྷ་སའི་བཙོན་ཁང་དུ་བཀག་ཉར་བྱས་པ་སོགས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དེར་འཕྲལ་མར་དོ་སྣང་སྤྲོད་དགོས་པ་ཞིག་ཆགས་ཡོད་པ་མ་ཟད། བོད་མི་ཚོར་ད་དུང་སྡུག་སྦྱོང་མནར་གཅོད་དང་སྲོག་སྐྱོན་མི་ཡོང་བའི་རོགས་རམ་དགོས་པའི་འབོད་སྐུལ་ཞུ་རྒྱུ་དང་།
ང་ཚོས་ཞུ་སྙན་འདི་མཉམ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་རྩིས་མེད་རྡོག་རོལ་ཇི་འདྲ་གཏོང་བཞིན་ཡོད་མེད་ཀྱི་ལོ་འཁོར་སྙན་ཐོ་གསར་ཤོས་ཤིག་སྤྱན་འབུལ་ཞུས་པ་དང་སྦྲགས་སྐུ་ཉིད་ཀྱིས་སྐབས་བབ་རོགས་མགོན་གནང་སྐྱོང་ཡོང་བའི་འབོད་སྐུལ་ཞུ་བཞིན་ཡོད།
ཅེས་སོགས་བཀོད་ཡོད། གོང་འཁོད་ཞུ་སྙན་འདི་བཞིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ཚོགས་ཆུང་དང་རྒྱལ་སྤྱིའི་ཉེས་ཡངས་ཚོགས་པ། འགྲོ་བ་མིའི་ཐོབ་ཐང་རྟོག་ཞིབ་ཚོགས་པ། དེ་བཞིན་ (Human Rights Without Frontiers International and INPaT) བཅས་ལ་ཕུལ་འདུག་པ་བཅས།།
མ་ཡིག་དབྱིན་ཡིག་ནང་ཡོད་པ་དེར་རྩ་འཛིན་ཞུ།།
