༢༠༡༡ ཟླ་ ༤ ཚེས་ ༢༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༢༣ ཉིན་རྡ་ས་བཞུགས་སྒར་གངས་སྐྱིད་གསོལ་ཐབ་ཡང་སྟེང་ཚོགས་ཁང་དུ་བཙན་བྱོལ་བོད་གཞུང་ནང་སྲིད་ལས་ཁུངས་ནས་གོ་སྒྲིག་ཐོག་ས་གནས་འགོ་འཛིན་རྣམས་ཀྱི་འཛིན་སྐྱོང་དང་འབྲེལ་བའི་ཚོགས་ཆེན་ཐེངས་བདུན་པ་དེ་ཚོགས་ཡོད།
དེ་ཉིན་སྔ་དྲོ་ཆུ་ཚོད། ༩ ཐོག་བཀའ་ཁྲི་ཟམ་གདོང་རིན་པོ་ཆེ་མཆོག་གིས་དབུས་བློན་ཆེན་ལས་ཁུངས་བདུན་གྱི་བཀའ་བློན་རྣམ་པ་དང། དྲུང་ཆེ་འགན་འཛིན་རྣམ་པ། དེ་བཞིན་རྒྱ་བལ་འབྲུག་གསུམ་ནས་ཕེབས་པའི་ས་གནས་འགོ་འཛིན་རྣམ་པ། དབུས་ནང་སྲིད་ལས་ཁུངས་ཀྱི་འབྲེལ་ཡོད་ལས་བྱེད་དང་གཞུང་འབྲེལ་གསར་འགོད་པ་བཅས་ཁྱོན་མི་གྲངས་ ༦༠ བརྒལ་བ་ལྷན་འཛོམས་ཀྱིས་ཐོག་མར་བཀའ་ཁྲི་མཆོག་གིས་ཚོགས་འདུ་དབུ་འབྱེད་ཀྱི་སྣང་གསལ་ཞལ་ཕྱེ་གནང་རྗེས་གསོལ་ཇ་འབྲས་སིལ་ཕུལ། དེ་ནས་ནང་སྲིད་དྲུང་ཆེ་དངོས་གྲུབ་རྡོ་རྗེ་ལགས་ཀྱི་ངོ་སྤྲོད་གསུང་བཤད་གནང་མཚམས་བློན་ཆེན་ལས་ཁུངས་ཁག་དང། ལྡི་ལི་དོན་གཅོད་དང་བཀའ་བློན་གཅིག་ལྕོགས་བཅས་ཀྱིས་རིམ་བཞིན་གསུང་བཤད་གནང་བའི་སྙིང་དོན།
ས་གནས་འགོ་འཛིན་རྣམས་ནི་རྒྱ་བལ་འབྲུག་གསུམ་གྱི་བཙན་བྱོལ་བོད་མིའི་འདུ་སྡོད་ཁག་ཏུ་བཙན་བྱོལ་བོད་གཞུང་གི་ངོ་གདོང་དང་སྐུ་ཚབ། ཉིན་མོའི་མི་དང་མཚན་མོའི་ཁྱི་ལྟར་ལས་དོན་ཐད་ས་གནས་སུ་དབུས་ཀྱི་ལྷན་ཁང་བདུན་གྱི་ལས་འགན་ངོ་བོ་མི་འདྲ་བ་མི་གཅིག་གིས་འཁུར་དགོས་པ་མ་ཟད། དབུས་ས་གཉིས་ཀྱི་འབྲེལ་མཐུད་སོགས་གལ་ཆེན་ཡིན་པར་སོང་། འདས་པའི་བཀའ་ཤག་ལས་ཡུན་ཐེངས་གཉིས་དང་བཀའ་བློན་རྣམ་པ་སོ་སོའི་ལས་ཡུན་ལོ་ངོ་བཅུ་ཡིས་རིང་ལྷན་ཁང་ཁག་དང་སྤྱི་ཚོགས་ཀྱི་མྱོང་བ་ཞིབ་འཇུག་དང་འབྲེལ་བའི་ཐོག་ནས་ཕྱོགས་བསྡོམས་ཀྱི་བཙན་བྱོལ་བོད་མིའི་ཆབ་སྲིད་ཀྱི་ལངས་ཕྱོགས་དང་། ཁྲིམས། སྒྲིག་གཞི་མཚོན་པའི་ལས་དོན་སྣེ་མང་ཐད་ལམ་སྟོན་གསུང་བཤད་གནང་ཡོད། དེ་རྗེས་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་དོན། དེ་རིང་འདི་གར་ཚོགས་འདུར་ཕེབས་པའི་ཕྱག་སྦྲེལ་བཀའ་བློན་རྣམ་པ་ཚོ་དང། དྲུང་ཆེ་རྣམ་པ། ས་གནས་འགོ་འཛིན་རྣམ་པ། ནང་སྲིད་ལས་ཁུངས་ཀྱི་ལས་བྱེད་ཚང་མར་ནང་སྲིད་ཁྱབ་ཁོངས་སུ་ཡོད་པའི་བོད་མི་གནས་སྡོད་གང་སར་ཡོད་པའི་ས་གནས་འགོ་འཛིན་རྣམ་པ་ཚོའི་འཛིན་སྐྱོང་གི་ཚོགས་འདུ་ཐེངས་བདུན་པ་འདིར་སྔོན་དུ་ནང་སྲིད་དྲུང་ཆེས་སྙན་སེང་ཞུས་པ་ལྟར་གཞུང་ཞབས་སྲི་ཞུ་བ་ཚོས་༸གོང་ས་༸སྐྱབས་མགོན་ཆེན་པོ་མཆོག་ལ་ལྷ་མི་ཟུང་འབྲེལ་གྱི་བརྟན་བཞུགས་འབུལ་བའི་སྐབས་དེར་ས་གནས་འགོ་འཛིན་རྣམས་མཉམ་ཞུགས་གནང་རྒྱུ་དེ་གལ་ཆེན་པོ་ཞིག་མཐོང་སྟེ། ད་རེས་འདིར་ཕེབས་པའི་ཞོར་དུ་ཚོགས་འདུ་འདི་གོ་སྒྲིག་ཞུས་པ་རེད། སྤྱིར་བཏང་ལོ་གཉིས་རེར་ཐོག་ཚོགས་ཀྱི་ཡོད་ནའང་ལོ་རེའི་ནང་ཚོགས་མི་ཆོག་པ་མིན། ལྷག་པར་ད་ལྟའི་གནས་སྐབས་ལ་གནས་ཚུལ་མང་པོ་འཕོ་འགྱུར་འགྲོ་རྒྱུའི་སྐབས་ཤིག་འཁེལ་ཡོད་སྟབས། ཁྱེད་རང་ཚོ་རྡ་སར་བསླེབས་ཏེ་གནས་ཚུལ་མང་པོ་ཞིག་ཤེས་ཐུབ་ན་ཐུགས་ཕན་གསོ་ངེས་རེད།
དེར་བརྟེན་ནམ་རྒྱུན་དང་མི་འདྲ་བར་དེ་རིང་ཚོགས་འདུའི་འགོ་འཛུགས་ཐོག་བཀའ་བློན་ལས་ཁུངས་བདུན་དང། ལྡི་ལི་དོན་གཅོད་དང་བཀའ་བློན་གཅིག་ལྕོགས་བཅས་ཚང་མས་སོ་སོའི་ལས་ཁུངས་དང་འབྲེལ་ཡོད་ཀྱི་གནད་དོན་དེ་དག་ནང་སྲིད་བཀའ་བློན་དང་ནང་སྲིད་ལས་ཁུངས་བརྒྱུད་མི་དགོས་པར་ཐད་ཀར་ས་གནས་འགོ་འཛིན་རྣམ་པ་ཚོ་དང་ལྷན་བཀའ་མོལ་གནང་ཐུབ་ན་ཕན་ཡོན་ཆེ་བ་ཡོང་ངེས་ལ་བརྟེན། བཀའ་བློན་རྣམ་པ་ཚོར་གསུང་བཤད་གནང་རོགས་ཞེས་ཞུ་རྒྱུའི་རྒྱུ་མཚན་འདི་ལྟར་རེད། ནང་སྲིད་ལས་ཁུངས་ཀྱི་དམིགས་བསལ་འབྲེལ་ཡོད་ཀྱི་དོན་དག་དེ་དག་དེ་རིང་ཕྱི་དྲོ་དང་སང་གནངས་བཅས་ཉིན་གཉིས་རིང་དུས་ཚོད་ཡོད། དེར་བརྟེན་བཀའ་བསྡུར་ཞུ་རྒྱུའི་དུས་ཚོད་ཡོད། བློན་ཆེན་ལས་ཁུངས་ཁག་དང་འབྲེལ་བ་ཡོད་པའི་གནས་ཚུལ་དང། ཁྱོན་ཡོངས་ཀྱི་བཙན་བྱོལ་བོད་མིའི་དབུས་གཞུང་གི་སྒྲིག་འཛུགས་ཀྱིི་བཀའ་བློན་ལས་ཁུངས་སོ་སོའི་གནད་འགག་ཆེ་བའི་གནས་ཚུལ་ལྷན་རྒྱས་ཚོས་ཤེས་དགོས་པ་དེ་དག་ཞིབ་ཚགས་པོར་ཞུས་ཟིན་པ་རེད། དེའི་ཐོག་ནས་ས་གནས་ལ་ཕྱག་ལེན་འཁེལ་བའི་རེ་བ་བྱེད་ཀྱི་ཡོད། བཀའ་ཤག་སྐབས་ ༡༣ དང་ ༡༤ སྐབས་འཕོ་འགྱུར་ཉེ་བ་དང། སྤྱི་འཐུས་སྐབས་ ༡༤ དང་ ༡༥ ཡང་འཕོ་ལེན་བྱེད་རྒྱུར་ཉེ་བ་རེད།
དེ་དང་ཆབས་ཅིག་༸གོང་ས་༸སྐྱབས་མགོན་ཆེན་པོ་མཆོག་གི་བོད་རྒྱལ་ཁབ་དང་འཛིན་སྐྱོང་གི་བླ་ན་མེད་པའི་དབུ་ཁྲིད་ཀྱི་སྐོར་བཅའ་ཁྲིམས་ནང་གསལ་བའི་དོན་གནད་དེ་དག་མུ་མཐུད་ནས་མི་གནང་རྒྱུའི་ཐུགས་ཐག་བཅད་པར་བརྟེན་ཕྱི་ཟླ་ ༥ པའི་ནང་བཅའ་ཁྲིམས་བསྐྱར་བཅོས་འགྲོ་གི་རེད། བཅའ་ཁྲིམས་བསྐྱར་བཅོས་ཕྱིན་རྗེས་བཙན་བྱོལ་གཞུང་གི་གནས་བབས་དེ་སྔོན་མ་དང་མི་འདྲ་བར་འགྱུར་བ་ཆེན་པོ་ཞིག་འགྲོ་རྒྱུ་ཡིན་པ་གསལ་པོ་རེད། དེ་ལྟ་བུའི་འགྱུར་བ་ཕྱིན་པའི་སྐབས་བཙན་བྱོལ་བོད་མི་འདུ་སྡོད་བྱེད་སའི་ས་གནས་སོ་སོའི་ནང་འགྱུར་བ་དེ་ཚོ་ཚད་དང་ལྡན་པ་དང་དཀའ་ངལ་མེད་པ་ཞིག་གི་ཐོག་ནས་སྒྲུབ་ཐུབ་པ་བཟོ་མཁན་ས་གནས་འགོ་འཛིན་ཚོ་ཆགས་ཡོད། དེར་བརྟེན་ས་གནས་འགོ་འཛིན་ཚོས་ད་ལྟའི་གནས་སྐབས་ལྷག་པར་བཅའ་ཁྲིམས་བསྐྱར་བཅོས་ཟིན་པའི་རྗེས་གནས་ཚུལ་གསར་པའི་ནང་གཞུང་གི་ལས་ཁུངས་ཁག་ཙམ་མིན་པར་མི་མང་གི་བསམ་བློ་དང་ཀུན་སྤྱོད་གཉིས་ཀ་ཏག་ཏག་ཚུད་ཐུབ་པ་ཞིག་གནང་དགོས་རྒྱུའི་ཛ་དྲག་གི་ལས་འགན་དེ་ས་གནས་འགོ་འཛིན་ཚོར་ཡོད། བཅའ་ཁྲིམས་དང་སྒྲིག་གཞི་ཁག་ལ་འགྱུར་བ་གང་ཕྱིན་པ་དེ་དག་ས་གནས་འགོ་འཛིན་ཚོས་ཤེས་དགོས་ཀྱི་རེད། དེ་དག་ཤེས་པའི་སྒོ་ནས་སོ་སོས་ཕྱག་ལེན་དུ་བསྟར་དགོས། དེ་བཞིན་མང་ཚོགས་ལའང་དེ་དག་ལག་བསྟར་བྱེད་དགོས་རྒྱུའི་འགོ་ཁྲིད་དང་ལམ་སྟོན་གནང་ཐུབ་པ་ཞིག་དགོས། རྒྱུ་མཚན་དེ་ལ་བརྟེན་ནས་དེ་རིང་གི་ཚོགས་འདུ་འདི་གལ་ཆེན་པོ་ཞིག་ཆགས་ཀྱི་ཡོད།
དེ་རིང་ཚོགས་འདུ་འདིའི་ནང་བཅའ་ཁྲིམས་འགྱུར་བ་ཇི་ལྟར་འགྲོ་གི་ཡོད་མེད་ཤེས་ཀྱི་མེད། འོན་ཀྱང་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་ངོས་ནས་གྲོས་ཚོགས་ལ་རྒྱབ་གཉེར་གང་ཞུས་ཡོད་པ་དེ་ཁྱེད་ཚོར་ཡིག་ཐོག་ནས་བཀྲམ་གྱི་རེད་ལ་དྲ་རྒྱའི་ཐོག་ལའང་བཞག་ཡོད། མི་མང་གི་གཟིགས་ཐུབ་པ་ཞིག་རེད། དེར་བརྟེན་དེ་ཚོའི་ཐོག་ཐུགས་ཞིབ་གནང་སྟེ་དོགས་གཅོད་དང་གསལ་བཤད་དགོས་རིགས་ཡོད་ན་དེ་རིང་ཚོགས་འདུ་འདིའི་ཐོག་ནས་ཞུས་ཐུབ་ན་ཡག་པོ་ཡོད། ཁྱེད་རང་ཚོར་ཡིག་ཆ་བཀྲམ་མེད་ན་ཚོགས་དྲུང་ལས་ཁུངས་སུ་ཞུ་དགོས་བྱུང་ན་རེད། དེ་གྲ་སྒྲིག་གནང་སྟེ་ཁྱེད་རང་ཚོས་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་རྒྱབ་གཉེར་དེ་དག་ཚོགས་འདུ་འདིའི་ཐོག་ནས་གསལ་པོ་ཞིག་ཤེས་ཐུབ་ན་མི་མང་ལ་གསལ་བཤད་གནང་རྒྱུ་དང། གཞུང་མང་ཚོགས་ཆེན་ཐེངས་གཉིས་པའི་སྐབས་ཕེབས་མཁན་གྱི་མི་མང་སྐུ་ཚབ་ཚོ་ལའང་དགོངས་འཆར་གནང་རྒྱུར་ཐུགས་ཕན་གསོ་བ་ཞིག་ཡོང་གི་རེད། དེ་རིང་ཕྱག་སྦྲེལ་བཀའ་བློན་རྣམ་པ་ཚོས་བཀའ་གནང་སོང་། སྒྲིག་གཞི་དང་གཞུང་གི་ལམ་སྟོན་གང་ཡོད་པ་དེ་དག་གི་ཐོག་ལ་ཇི་མ་ཇི་བཞིན་ཕེབས་དགོས་རྒྱུ་གལ་ཆེན་པོ་རེད་ཅེས་གསུང་རྒྱུ་དེ་དངོས་ཡོད་ཀྱི་གནས་ཚུལ་རེད། དེ་ཚོར་མ་གཟིགས་མཁན་ངས་མཚམས་རེ་ཚོར་གྱི་འདུག ད་ཕན་གཞུང་གི་ལམ་སྟོན་གང་ཡོད་པ་དེ་དག་ས་གནས་ཁག་ལ་ཡིན་ན་དམིགས་བསལ་ཕྱོགས་བསྡོམས་བརྒྱབ་ནས་ནང་སྲིད་ལས་ཁུངས་ཀྱི་ལག་དེབ་པར་སྐྲུན་བྱས་ཏེ་སྔ་རྗེས་ཕུལ་ཡོད།
བཀའ་ཤག་འགྱུར་བ་ཕྱིན་པའི་སྐབས་ལམ་སྟོན་དང་སྲིད་བྱུས་སྟེང་ལའང་འགྱུར་བ་འགྲོ་སྲིད་པ་རེད། དེར་བརྟེན་ས་གནས་འགོ་འཛིན་ཚོས་རྗེས་ལུས་ཐེབས་རྒྱུ་མེད། ལམ་སྟོན་གང་ཡང་རུང་བ་ཞིག་ལ་འགྱུར་བ་ཕྱིན་ན་འགྱུར་བ་ཕྱིན་པའི་ཉིན་མོ་དེ་ནས་རྙིང་པ་དེ་བཞག་ནས་གསར་པ་དེའི་ཐོག་འགྲོ་ཐུབ་དགོས་རྒྱུ་དང། དེ་སྔ་ངས་མང་པོ་ཞུ་མྱོང་ཡོད། ང་ཚོ་གཞུང་གི་སྲི་ཞུ་ལས་བྱེད་པ་ཟེར་བ་དེ་གཞུང་ཞབས་རེད་མ་གཏོགས་སྲིད་བྱུས་ཀྱི་ཕྱོགས་བཟུང་མཁན་ཆགས་མེད། སྲིད་བྱུས་བཀའ་ཤག་དང་གྲོས་ཚོགས་ནས་གཏན་ལ་ཕབ་པ་ལྟར་ལག་ལེན་བསྟར་ནས་འགྲོ་མཁན་དེ་སྲི་ཞུ་ལས་བྱེད་པ་རེད། ལམ་སྟོན་དང་སྒྲིག་གཞི་རྙིང་པར་གོམས་པ་ཡོད་མཁན་དང་མེད་མཁན་ཅི་རིགས་ཡོད། གོམས་པ་ཡོད་མཁན་དེ་ཚོ་སྒྲིག་གཞི་དང་ལམ་སྟོན་གསར་པ་བསླེབས་ན་གསར་པའི་ཐོག་ལམ་སང་ཕེབས་མ་ཐུབ་པར་རྙིང་པའི་གོམས་གཤིས་མུ་མཐུད་ནས་བསྡད་ན་འགྲིག་གི་མེད། དེར་བརྟེན་སྒྲིག་གཞི་གསར་པ་གང་འདྲ་ཞིག་བྱུང་ན་ལྷག་པར་དེ་རིང་བཅའ་ཁྲིམས་འགྱུར་བ་ཕྱིན་རྗེས་བཅའ་ཁྲིམས་ནང་༸གོང་ས་༸སྐྱབས་མགོན་ཆེན་པོ་མཆོག་གི་མཚན་གནས་དང་འབྲེལ་བ་ཡོད་པའི་དོན་ཚན་ ༣༩ ཡོད་དེ་དག་འགྱུར་བ་འགྲོ་རྒྱུ་རེད། དོན་ཚན་ ༣༩ མ་ཚད་པའི་ད་དུང་དོན་ཚན་ཁ་ཤས་༸སྐྱབས་མགོན་ཆེན་པོ་མཆོག་གི་མཚན་གནས་དང་འབྲེལ་བ་མེད་ནའང་སྤྱིར་བཏང་༸རྒྱལ་བ་རིན་པོ་ཆེ་མཆོག་གི་སྐུ་དབང་དང་འབྲེལ་བའི་བསྐྱར་བཅོས་ཤིག་ཕྱིན་པའི་དབང་གི་དོན་ཚན་གཞན་ལ་བསྐྱར་བཅོས་ཕྱིན་པ་དེ་འདྲ་ཡང་ཡོད། དེའི་དབང་གི་ཁྲིམས་དང་སྒྲིག་གཞི་ཡོངས་སུ་རྫོགས་པའི་ནང་འགྱུར་བ་འགྲོ་རྒྱུ་རེད། སྒྲིག་གཞི་ཡོངས་སུ་རྫོགས་པའི་ནང་འགྱུར་བ་འགྲོ་རྒྱུ་དེ་སྐབས་ ༡༥ གྲོས་ཚོགས་ཀྱི་དམིགས་བསལ་ཚོགས་འདུ་ལྟ་བུ་ཚོགས་སྲིད། ཡང་ན་ཕྱི་ཟླ་ ༩ བར་འགྱང་ཡང་སྲིད། དེའི་བར་དུ་ཁྲིམས་དང་སྒྲིག་གཞི་སྐོར་གསལ་པོ་མ་ཆགས་པ་དེ་འདྲ་མང་པོ་ཡོང་སྲིད་པ་ཞིག་རེད།
དེར་བརྟེན་བཅའ་ཁྲིམས་འགྱུར་བ་ཕྱིན་པ་གཞིར་བཞག་གི་འོག་ནས་ཁྲིམས་དང་སྒྲིག་གཞི་ཡོངས་རྫོགས་འགྱུར་བ་འགྲོ་དགོས་ཀྱི་ཡོད་དུས་ས་གནས་འགོ་འཛིན་སོ་སོའི་རང་གི་རྣམ་དཔྱོད་བེད་སྤྱོད་བཏང་ནས་ཤེས་དགོས་པ་མང་པོ་ཡོང་གི་རེད་བསམ་གྱི་འདུག ད་རེས་འཕོ་འགྱུར་གྱི་གོ་སྐབས་འདིའི་སྐབས་ལ་ས་གནས་འགོ་འཛིན་ཚོས་རྣམ་དཔྱོད་དང་སྤྱང་གྲུང་ལྡན་པའི་ཐོག་ནས་གསར་གཏོད་དང་གསར་བརྗེ་གང་ཕྱིན་པ་དེ་ཐད་ཀར་ལག་ལེན་བསྟར་ཐུབ་དང་མང་ཚོགས་ནང་སླེབས་ཐུབ་པ་ཞིག་མ་བྱས་ན་གསལ་པོ་མེད་པ་དང་རྙོག་གྲ་དེ་འདྲ་ཡོང་སྲིད་པ་རེད། དེའི་དབང་གི་དེ་རིང་དམིགས་བསལ་ཚོགས་འདུ་ཉིན་གསུམ་བར་འཚོགས་རྒྱུའི་རྒྱུ་མཚན་དེ་ལྟར་ཡིན། ཁྱེད་རྣམ་པར་དོགས་གཅོད་དང་གསལ་བཤད་གང་དགོས་ཀྱི་ཡོད་པ་དེ་དག་ད་ལྟ་ནས་དགོངས་པ་བཞེས་ཐུབ་དགོས་རྒྱུ་དེ་དག་གལ་ཆེན་པོ་རེད་ཞུ་རྒྱུ་ཡིན་ཞེས་གསུང་བཤད་གནང་གྲུབ་བསྟུན་ནང་སྲིད་དྲུང་འཕར་དོན་གྲུབ་རྡོ་རྗེ་ལགས་ཀྱི་ཐུགས་རྗེ་ཆེ་ཞུས་ཏེ་ཚོགས་འདུ་མུ་མཐུད་ཚོགས་གནང་བ་དང་།
ད་ཐེངས་ཉིན་བཞིའི་ཚོགས་འདུ་འདིའི་ནང་འཛིན་སྐྱོང་ཚོགས་འདུའི་གྲོས་གཞིའི་ཐོག་བཀའ་བསྡུར་ལྷུག་གླེང་གྱིས་གྲོས་ཆོད་གཏན་འབེབས་དང་། ཉིན་མཐའ་མར་ལྷན་ཁང་ཁག་གི་ལས་དོན་དང་འབྲེལ་བའི་སྐོར་ལ་ས་གནས་སུ་དོན་ཕན་ལྡན་པ་ཡོང་བའི་ལམ་སྟོན་ཞིབ་རྒྱས་གནང་རྒྱུ་ཡིན་འདུག་བཅས།།
