༢༠༡༡ ཟླ་ ༤ ཚེས་ ༡༢ རེས་གཟའ་མིག་དམར།
༅༅། །འདི་གར་བོད་གཞུང་བདེ་སྲུང་ལས་ཁུངས་ནས་བཏང་གནས་ནང་འཁོད་དོན། བདེ་སྲུང་ཡན་ལག་འགན་འཛིན་དྲུང་ལས་ཟུར་པ་ཀུན་དགའ་འཕྲིན་ལས་ལགས་ཀྱིས་མི་ལོ་ ༤༧ རིང་ཞབས་འདེགས་ཇི་ཞུས་ལོ་རྒྱུས་སྙིང་བསྡུས། ཁོང་ནི་བོད་ཤར་ཕྱོགས་མདོ་ཁམས་སྒ་སྐྱེ་དགུ་མདོར་ཕྱི་ལོ་ ༡༩༣༩ ལོར་འཁྲུངས་ཤིང། ཕྱི་ལོ་ ༡༩༥༩ ལོར་རྒྱ་གར་ལ་བཙན་བྱོལ་དུ་འབྱོར་རྗེས་ལོ་གཉིས་ཙམ་ཀ་སྦུག་ཁུལ་བཞུགས་པ་དང། ཕྱི་ལོ་ ༡༩༦༣ ནས་༸རྒྱལ་བའི་སྐུ་སྲུང་ཞབས་ཞུར་བཅར་ནས་ཞབས་ཕྱི་ཞུ་མུས་སྐབས་འཆར་འབུལ་ཕྱག་རྟགས་རིན་པོ་ཆེའི་དགོངས་དོན་ ༡༩༦༤ ཟླ་ ༣ ཚེས་ ༤ ནས་གནས་བཅུ་པར་བསྐོ་གཞག་དང། ཕྱི་ལོ་ ༡༩༨༦ ཟླ་ ༩ ཚེས་ ༡ ནས་གནས་དགུ་པར་གནས་སྤར་གྱིས་ལས་འགན་རང་འཇགས། ཕྱི་ལོ་ ༡༩༩༢ ཟླ་ ༨ ཚེས ༡ ནས་ལས་ཁུངས་དོ་དམ་པའི་གནས་རིམ་ཐོག་ལས་འགན་རང་འཇགས། ཕྱི་ལོ་ ༡༩༩༣ ཟླ་ ༦ ཆེས་ ༧ ནས་སྡེ་ཚན་འགན་འཛིན་དུ་གནས་སྤར་གྱིས་ལས་འགན་རང་འཇགས། ཕྱི་ལོ་ ༡༩༩༧ ཟླ་ ༤ ཚེས་ ༢༤ ནས་དྲུང་གཞོན་ལས་རོགས་སུ་གནས་སྤར་གྱིས་བདེ་སྲུང་ཡན་ལག་འགན་འཛིན་དུ་བསྐོ་གཞག་གནང། ཕྱི་ལོ་ ༡༩༩༧ ཟླ་ ༧ ཚེས་ ༡ ནས་ལོ་གཉིས་བགྲེས་ཡོལ་འཕར་འགྱངས་དང། ཕྱི་ལོ་ ༡༩༩༩ ཟླ་ ༧ ཚེས་ ༣ ནས་སྒྲིག་གསལ་བགྲེས་ཡོལ་གནང་ཟིན་ཡང་ཕྱི་ལོ་ ༡༩༩༩ ཟླ་ ༧ ཚེས་ ༡༥ ནས་ལོ་གཉིས་གཞུང་ཞབས་བསྐྱར་བསྐོ་གནང། དེ་རྗེས་ལས་དོན་རྒྱུས་མངའི་ཆ་ནས་མུ་མཐུད་ཐུགས་འགན་བཞེས་དགོས་དཔལ་ལྡན་སྐུ་སྒེར་ཡིག་ཚང་དང། བདེ་སྲུང་ལས་ཁུངས་གཉིས་ནས་རེ་འདུན་ཇི་ཞུས་ལྟར། ཕྱི་ལོ་ ༢༠༡༡ ཟླ་ ༣ ཚེས་ ༣༡ བར་ཁྱོན་མི་ལོ་ཧྲིལ་པོ་ ༤༧ ལྷག་རང་འཁྲིའི་ལས་དོན་ཞུ་སྒོ་ཁག་འཐུས་ཤོར་མེད་པར་ངལ་བ་ཁྱད་བསད་དང། ལྷག་བློ་ཆེ་བསྐྱེད་གནང་བར་བསྔགས་བརྗོད་དང་སྦྲགས་ཕྱི་ལོ་ ༢༠༡༡ ཟླ་ ༤ ཚེས་ ༤ ཉིན་བདེ་སྲུང་ལས་ཁུངས་ཀྱི་འགོ་ལས་ཡོངས་ནས་དགའ་སྐྱེལ་གྱི་གསོལ་སྟོན་བཤམས་ཡོད་པ་བཅས།།