༢༠༡༡ ཟླ་ ༤ ཚེས་ ༣༠ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༢༩ ཉིན་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ཉེ་ལམ་ཉི་ཧོང་ནང་འབྱུང་བའི་གོད་ཆག་འོག་མང་ཚོགས་སྟོང་ཕྲག་མང་པོ་འདས་གྲོངས་སུ་གྱུར་བ་རྣམས་ཀྱི་ཆེད་ཉི་ཧོང་གི་མང་ཚོགས་དང་ལྷན་དུ་འདས་པོ་རྣམས་ཀྱི་ཆེད་གསོལ་འདེབས་སྨོན་ལམ་ཚོགས་ཡོད། སྐབས་དེར་ཐོག་མར་ཉི་ཧོང་བོད་གཞུང་སྐུ་ཚབ་དོན་གཅོད་ལྷག་པ་མཚོ་སྒོ་ལགས་ཀྱིས་སྨོན་ལམ་གོ་སྒྲིག་ཚོགས་ཆུང་གིས་ཚབ་ཞུས་ཏེ་ངོ་སྤྲོད་ཀྱི་གསུང་བཤད་མདོར་ཙམ་གནང་།
དེ་རྗེས་མགོན་པོ་གང་ཉིད་མཆོག་གིས་ཉི་ཧོང་མི་མང་རྣམས་ཀྱིས་སྙིང་སྟོབས་ཞུམ་རྒྱུ་མེད་པའི་ལམ་སྟོན་བཀའ་སློབ་སྩལ་དོན། དེ་རིང་འདིར་ཉི་ཧོང་གི་མི་མང་སྤྱི་དང་། ལྷག་པར་ཐད་ཀར་གནོད་འཚེ་ཆེན་པོ་ཕོག་སྟེ་ད་ལྟ་ཡིད་ཁོང་དུ་ཆུད་ནས་སྡོད་མཁན་རྣམས་ལ་གདུང་སེམས་མཉམ་སྐྱེའི་འཚམས་འདྲི་ཞུ་གི་ཡོད། ཁ་སེང་གནས་ཚུལ་དེ་བྱུང་རྗེས་འཛམ་གླིང་གི་གསར་འགྱུར་ཚང་མའི་ནང་ཐོན་ཡོད། འབྱུང་བའི་རྐྱེན་ངན་དེ་འདྲ་འཕྲད་ཡོང་སྐབས་ཧ་ཅང་མ་སྐྱིད་པ་ཡོང་རྒྱུ་དང་། རྡུལ་ཕྲན་གྱི་གློག་ཁང་དུག་རླངས་བྱས་ནས་ཡོང་སྐབས་དེ་དག་ཕྱེད་ཀ་ང་ཚོ་མིས་བཟོས་པ་ལྟ་བུ་ཡིན།
དཀའ་ངལ་དེ་ལྟར་འཕྲད་སྐབས་སེམས་ལ་དངངས་སྐྲག་ལོས་ཡོང། ཉི་ཧོང་ལ་ཆ་བཞག་ན་ཕྱོགས་གཅིག་ནས་ནང་པའི་ལུང་པ་རེད། གཉིས་ནས་ངོས་སྒེར་གྱི་ངོས་ནས་ཆ་བཞག་ནའང་ངོ་ཤེས་གྲོགས་པོ་མང་དག་ཅིག་ཡོད། དེར་བརྟེན་འདི་གར་རྐྱེན་ངན་གྱི་གནས་ཚུལ་དེ་འདྲ་ཞིག་བྱུང་སྐབས་ངོས་རང་གི་སེམས་ལ་ཡང་ཧ་ཅང་མ་བདེ་བ་ཤུགས་ཆེན་པོ་བྱུང།
འོན་ཀྱང་ང་ཚོས་སྨོན་ལམ་རྒྱག་རྒྱུ་མ་གཏོགས་གཞན་དག་བྱེད་རྒྱུ་གང་ཡང་མི་འདུག དེ་བཞིན་མགོན་པོ་གང་ཉིད་མཆོག་གིས་ཉི་ཧོང་གི་མང་ཚོགས་ནས་སེམས་ཁྲལ་བྱས་ནས་བསྡད་ན་ཕན་ཐོགས་གང་ཡང་མེད་པའི་བཀའ་སློབ་སྩལ་བ་དང་འབྲེལ་རྐྱེན་ངན་གྲོགས་སུ་འགྱུར་ཐབས་ཀྱིས་གོམ་པ་མདུན་སྐྱོད་བྱེད་དགོས་པ་མ་ཟད། རང་ཉིད་ཀྱི་སྙིང་སྟོབས་ནམ་ཡང་ཞུམ་རྒྱུ་མེད་པའི་ལམ་སྟོན་བཀའ་སློབ་སྩལ་ཡོད། རྩ་བའི་ད་ཐེངས་ཀྱི་དུས་ཚོད་དེ་བཞིན་ཉི་ཧོང་ནང་འབྱུང་བའི་དོན་རྐྱེན་འོག་འདས་གྲོངས་སུ་གྱུར་བ་ཚོའི་ཞག་ཞེ་དགུའི་དུས་ཚོད་ཅིག་ཡིན་འདུག མཆོད་འབུལ་སྨོན་ལམ་དེའི་སྐབས་མང་ཚོགས་ ༤༠༠༠ བརྒལ་བ་ཙམ་འདུ་འཛོམས་བྱུང་ཡོད། ཕྱི་ཚེས་ ༣༠ ཉིན་༸གོང་ས་མཆོག་ཉི་ཧོང་ནས་ཨ་རིར་ཆིབས་སྒྱུར་བསྐྱངས་ཡོད་པ་བཅས། །
