༢༠༡༡ ཟླ་ ༣ ཚེས་ ༢༩ རེས་གཟའ་མིག་དམར།

༄༅། །ཕྱི་ལོ་ ༢༠༡༡ ཟླ་ ༣ ཚེས་ ༢༨ སྔ་དྲོ་བཞུགས་སྒར་ཕོ་བྲང་དུ་རྒྱལ་སྤྱིའི་མཛངས་མ་(Sushmita Sen)སུ་ཤི་མི་ཏ་སེན་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་འདུག
དེ་ཡང་མཇལ་ཁ་ཞུས་གྲུབ་རྗེས་ཁོང་གིས་གསར་འགོད་པའི་དྲི་བར་ལན་འདེབས་གནང་དོན། ངའི་མི་ཚེའི་ནང་འཛམ་གླིང་འདིའི་ནང་གི་མི་སྣ་གཉིས་མཇལ་རྒྱུའི་རེ་འདོད་ཆེན་པོ་བྱེད་བཞིན་ཡོད་པ་དེ་ནི་གཅིག་མ་ངྷར་ཊེ་རི་ས་དམ་པ་ཁོང་དང་དེ་བཞིན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཡིན། ༸གོང་ས་ཏཱ་ལའི་བླ་མ་མཆོག་མཛད་འཕྲིན་ཧ་ཅང་ཆེན་པོ་ཡིན་རུང་ང་ཚོར་མཇལ་ཁའི་གོ་སྐབས་སྩལ་ཐོབ་བྱུང་བ་མ་ཟད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ང་ཚོར་བཀའ་སློབ་སྩོལ་སྐབས་ང་ཚོས་ཁྱིམ་ཚང་གཅིག་ལྟར་ཡིན་པའི་ཚོར་སྣང་ཐོག་ཉན་པ་ཡིན།  ཁོང་གིས་ང་ཚོར་འཛམ་གླིང་གི་མང་ཚོགས་ཁྲོད་དངུལ་དང་དབང་ཆར་དགའ་མོས་ཀྱི་བསམ་བློ་དེ་དག་ལས་བརྒལ་ཏེ་དོན་དམ་གྱི་བདེ་སྐྱིད་ཐོག་དམིགས་ཚད་བཟུང་དགོས་པ་མ་ཟད། གཞན་ལ་ཕན་སེམས་བཅངས་རྒྱུའི་ཀུན་སློང་དགོས་པའི་ལམ་སྟོན་བཀའ་སློབ་སྩལ་བྱུང་། ༸གོང་ས་ཏཱ་ལའི་བླ་མ་མཆོག་ནི་ཁྱད་ཆོས་དེ་དག་ལྡན་པའི་མཚོན་དོན་ཞིག་ཀྱང་ཡིན་ལ་༸སྐྱབས་མགོན་ཏཱ་ལའི་བླ་མ་མཆོག་ནི་ཧ་ཅང་བྱམས་བརྩེ་དང་ལྡན་པ་ཞིག་རེད་འདུག ད་ཐེངས་ཕྲན་ལ་ཁོང་གི་ཞལ་མཇལ་ཐོབ་པ་དེ་ནི་ཧ་ཅང་གི་གཟི་བརྗིད་དང་སྤོབས་པ་ཐོབ་བྱུང་ཞེས་འགྲེལ་བརྗོད་གནང་འདུག
རང་ལོ་ ༣༥ སོན་པའི་ལྕམ་སྐུ་ཁོང་ནི་ཕྱི་ལོ་ ༡༩༩༤ ལོར་(Philippines)ཕི་ལི་ཕིན་སི་ནང་གོ་སྒྲིག་གནང་བའི་རྒྱལ་སྤྱིའི་མཛངས་མའི་འགྲན་བསྡུར་ནང་གི་རྩེ་ཕུད་དུ་སོན་པ་དེ་ཡིན་པ་དང་ད་བར་རྒྱ་གར་གྱི་གློག་བརྙན་འདྲ་མིན་མང་དག་ཅིག་འཁྲབ་སྟོན་གནང་མྱོང་ཡོད། དེ་བཞིན་ཁོང་ནི་དབུལ་ཕོངས་ཀྱི་གནས་སུ་གྱར་བའི་བྱིས་པ་དབང་པོ་སྐྱོན་ཅན་སོགས་ཀྱི་ལས་དོན་ཆེད་ཕྱག་ལས་གནང་མཁན་སྤྱི་ཚོགས་ཞབས་ཞུ་བ་ཞིག་ཀྱང་ཡིན་འདུག་པ་བཅས། །