༢༠༡༡ ཟླ་ ༣ ཚེས་ ༢༥ རེས་གཟའ་པ་སངས།
གྲྭ་ལྷ་ལྡན་ལགས།
༅༅། །ཕྱི་ལོ་ ༢༠༠༨ ལོར་བོད་ས་ཡོངས་ལ་ཞི་བའི་གྱེན་ལངས་བྱུང་ནས་ལོ་གསུམ་འཁོར་བའི་དུས་དྲན་དང་སུད་སིའི་གྲོང་ཁྱེར་ཇི་ནི་ཝར་ཚོགས་བཞིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༡༦ ཚོགས་སྐབས་སུ་བོད་ནང་གི་རྩོམ་པ་པོ་གྲྭ་ལྷ་ལྡན་ལགས་ཀྱིས་༼ཚེ་སྲོག་གིས་བསྐྲུན་པའི་སྐད་ཆ།༽ ཞེས་པའི་དཔེ་དེབ་གཅིག་བོད་ནང་འགྲེམས་སྤེལ་གནང་ཡོད། གྲྭ་ལྷ་ལྡན་ལགས་ཀྱིས་ལོ་གསུམ་རིང་རྟོགས་ཞིབ་ཧ་ཅང་ཞིབ་ཚགས་གནང་ཐོག་ཕྱི་ལོ་ ༢༠༠༨ ལོར་བོད་ནང་ཞི་རྒོལ་བྱུང་དགོས་དོན་དང་དེའི་མཇུག་འབྲས་སྐོར་བྲིས་གནང་ཡོད། ཤོག་གྲངས་ ༢༥༥ དང་ལེའུ་ལྔ་ལྡན་གྱི་དེབ་དེའི་ནང་རྒ་སྐྱེ་དགུ་རྡོའི་ནང་ས་ཡོམ་སྐོར་འགྲེལ་བཤད་དང་བོད་ནང་གི་དཔོན་རིགས་དང་ཆོས་ལ་སོགས་པའི་སྐོར་ལའང་འགྲེལ་བརྗོད་གནང་ཡོད། གྲྭ་ལྷ་ལྡན་ལགས་ཀྱིས་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ལྷན་ཚོགས་ལ་རང་དབང་ལྡན་པའི་མི་རྣམས་ཀྱིས་བགྲོ་གླེང་གནང་སའི་ལྡིང་ཆ་ཙམ་མིན་པར་བཙན་གནོན་འོག་ཡོད་པའི་མི་རྣམས་ཀྱི་སྐད་སྒྲར་ཡང་གསན་རོགས་ཞེས་འབོད་སྐུལ་ཞུས་ཡོད། གྲྭ་ལྷ་ལྡན་ལགས་ནི་ཕྱི་ལོ་ ༡༩༨༠ ལོར་མདོ་སྨད་མགོ་ལོག་གི་པདྨ་རྫོང་ཁོངས་སྡེ་མཐའ་གྲོང་ཚོར་སྐྱེས། རང་ལོ་ ༡༡ ཐོག་ས་གནས་ཀྱི་དགོན་པར་འཛུལ་ཞུགས་བྱས་རྗེས་གསེར་ཐ་ནང་བསྟན་སློབ་གླིང་དུ་འཛུལ་ཞུགས་བྱས་ཡོད། རང་ལོ་ ༢༥ ཐོག་
ལྷ་སར་འབྲས་སྤུངས་དང་སེ་ར་དགོན་དུ་སློབ་གཉེར་བྱེད་དུ་ཕྱིན་ཡོད་ཀྱང་དེར་དུས་ཡུན་ཐུང་ཐུང་ཞིག་ལས་མ་བཞུགས་པར་རང་ཡུལ་དུ་ཕྱིར་ལོག་བྱས་ཡོད། ཕྱི་ལོ་ ༢༠༠༨ ལོ་ནས་བཟུང་ཁོང་བོད་ནང་གི་ས་གནས་གང་སར་ཕེབས་ཏེ་དཔེ་དེབ་དེའི་གནས་ཚུལ་མཁོ་སྒྲུབ་ཆེད་བསྐྱོད་ཡོད།།
དཔེ་དེབ་ཀྱི་ནང་དོན་རྒྱས་པ་གཟིགས་འདོད་ན་འདིར་གནོན།ཚེ་སྲོག་གིས་བསྐྲུན་པའི་སྐད་ཆ།
