༢༠༡༡ ཟླ་ ༣ ཚེས་ ༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༢༨ དང་ཕྱི་ཟླ་ ༣ ཚེས་ ༡ ཉིན་གཉིས་རིང་ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་གོ་སྒྲིག་འོག་ཨ་རིའི་ཁུལ་དུ་གནས་སྡོད་བོད་མི་དང་བོད་དོན་རྒྱབ་སྐྱོར་བ་ཚོས་བོད་དོན་རྒྱབ་སྐྱོར་འཚོལ་བའི་ཉིན་མོ་ཞེས་པའི་ལས་འགུལ་ཐེངས་གསུམ་པ་དེ་སྤེལ་ཡོད།
དེ་ཡང་ཨ་རིའི་མངའ་སྡེ་ཁག་ནང་གནས་པའི་བོད་མིའི་འཐུས་ཚབ་ ༡༠༠ བརྒལ་བ་ཞིག་ནས་བོད་དོན་རྒྱབ་སྐྱོར་འཚོལ་བའི་ཉིན་མོ་ཞེས་པའི་ལས་འགུལ་ནང་མཉམ་ཞུགས་གནང་སྟེ། ཁོང་རྣམས་ནས་རང་རང་སོ་སོའི་མངའ་སྡེ་ནང་ཡོད་པའི་ཨ་རིའི་གྲོས་ཚོགས་གོང་འོག་གི་འཐུས་མི་བརྒྱ་བརྒལ་བའི་ལས་ཁུངས་སུ་ངོ་བཅར་ཞུས་ཏེ་ཨ་རིའི་གྲོས་ཚོགས་ངོས་ནས་བོད་ཀྱི་ཆོས་དང་། རིག་གཞུང་། ལེགས་བྱང་། བོད་རྒྱལ་ཁབ་དང་བོད་མི་རིགས་ངོ་བོ་སྲུང་སྐྱོབ། བོད་མི་ཚོར་ཡོངས་ཁྱབ་འགྲོ་བ་མིའི་ཐོབ་ཐང་། དེ་བཞིན་བོད་མིའི་ཤེས་ཡོན་དང་སྤྱི་ཚོགས་བདེ་དོན་ལ་དམིགས་ཏེ་དཔལ་འབྱོར་གྱི་རོགས་རམ་མུ་མཐུད་ཡོང་ཐབས། བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཀྱི་ཡན་ལག་ལས་ཁུངས་ཤིག་འཛུགས་ཐབས་ཡོང་བ་སོགས་ཀྱི་འབོད་སྐུལ་ཞུས་འདུག
ཕྱོགས་མཚུངས་ཁོང་རྣམས་ནས་ཨ་རིའི་གྲོས་ཚོགས་གོང་འོག་གི་འབྲེལ་ཡོད་ལས་བྱེད་རྣམས་དང་ཐུག་འཕྲད་ཀྱིས་ད་བར་ཨ་རིའི་གྲོས་ཚོགས་ནས་བོད་ཀྱི་གནད་དོན་དེ་གལ་གནད་ཅན་དུ་ངོས་འཛིན་གྱིས་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་གྲོས་ཚོགས་སུ་གདན་ཞུ་གནང་བ་དང་། དེ་བཞིན་བཙན་བྱོལ་བོད་མི་རྣམས་ལ་དཔལ་འབྱོར་གྱི་རོགས་རམ་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག་དེང་སྐབས་ཨ་རིའི་གྲོས་ཚོགས་ནས་རོགས་དངུལ་བསྐྱར་ཞིབ་གནང་བའི་སྐབས་སུ་ཡང་བོད་ཀྱི་གནད་དོན་ཐོག་མུ་མཐུད་རྒྱབ་སྐྱོར་ཡོང་བའི་འབོད་སྐུལ་ཞུས་འདུག རྒྱལ་སྤྱིའི་བོད་དོན་ལས་འགུལ་ཁང་ནས་བོད་དོན་རྒྱབ་སྐྱོར་འཚོལ་བའི་ཉི་མོ་ཞེས་པའི་ལས་འགུལ་དེ་བཞིན་ཕྱི་ལོ་ ༢༠༠༩ ལོར་སྤེལ་ཡོད་པ་དང་། ད་རེས་ལས་འགུལ་ཐེངས་ ༣ པ་དེ་ཆགས་ཀྱི་ཡོད་པ་བཅས། །