༢༠༡༡ ཟླ་ ༣ ཚེས་ ༣༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ལོར་བོད་ནང་ལྟ་སྐོར་དུ་ཕེབས་མཁན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ལྷན་ཁང་གི་ལས་བྱེད་པ་ཚོས་བོད་ཀྱི་དཔལ་འབྱོར་དང་རིག་གཞུང་གི་གནད་དོན་ཐོག་ཨ་རི་གཞུང་གིས་རྒྱ་ནག་དང་ལྷན་ངེས་པར་དུ་མཉམ་ལས་གནང་དགོས་པའི་འབོད་སྐུལ་ཞུས་འདུག
དེ་ཡང་ཕྱི་ལོ་ ༢༠༡༠ ཟླ༌ ༩ པའི་ནང་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ལྷན་ཁང་གི་ལས་བྱེད་འགའ་ཤས་ཤིག་བོད་ལ་ལྟ་སྐོར་དུ་ཕེབས་ཡོད་ཅིང་ཁོང་ཚོས་ཕྱི་ལོ་ ༢༠༡༡ ཟླ་ ༣ ཚེས་ ༢༩ རེས་གཟའ་མིག་དམར་ཉིན་ཁོང་རྣམ་པས་ན་ནིང་བོད་ལ་ལྟ་སྐོར་དུ་བསྐྱོད་པའི་འབྲེལ་ཡོད་སྙན་ཞུ་ཞིག་ཕྱིར་བསྒྲགས་གནང་ཡོད། ཕྱིར་བསྒྲགས་གནང་བའི་སྙན་ཞུ་དེའི་ནང་བོད་ཀྱི་ས་གནས་ཀྱི་དཔལ་འབྱོར་ཡར་རྒྱས་གཏོང་ཕྱོགས་དང་། བོད་ཀྱི་རིག་གཞུང་སྲུང་སྐྱོབ་བྱེད་ཕྱོགས་ཐད་ཨ་རིའི་གཞུང་ཕྱོགས་ནས་ངེས་པར་དུ་རྒྱ་ནག་དང་ལྷན་མཉམ་ལས་བྱེད་དགོས་པའི་འབོད་སྐུལ་ཞུས་འདུག དེ་བཞིན་སྙན་ཞུ་དེའི་ནང་སྤྱིར་རྒྱ་ནག་གཞུང་ནས་བོད་ནང་མ་རྩ་ཕོན་ཆེན་ཞིག་བཏང་ཡོད་པའི་ཁྲོད་ནས་བོད་ནང་གི་གནས་སྟངས་ཕུན་སུམ་ཚོགས་སུ་ཕྱིན་ཡོད། འོན་ཀྱང་གནས་སྟངས་དེ་ལྟ་བུའི་འོག་རྒྱ་མི་འབོར་ཆེན་ཞིག་བོད་ནང་འབྱོར་ཏེ་ཁོང་ཚོས་བོད་མི་རིགས་དང་བོད་པའི་རིག་གཞུང་ལ་མཐོང་ཆུང་བྱས་དང་བྱེད་མུས་ཡིན། དེ་བཞིན་རྒྱ་ནག་གཞུང་གིས་བོད་ཀྱི་དགོན་སྡེ་ཁག་ལ་དམ་བསྒྲགས་ཤུགས་ཆེ་བྱས་དང་བྱེད་མུས་ཡིན་པའི་གནས་སྟངས་དེ་ད་དུང་ཡང་མུ་མཐུད་གནས་མུས་ཡིན་པར་བརྟེན། ཨ་རིའི་གཞུང་ཕྱོགས་ཀྱིས་རྒྱ་ནག་གཞུང་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་ཞི་མཐུན་ཡོང་ཐབས་གནང་དགོས་པའི་འབོད་སྐུལ་གནང་གལ་ཆེ་བ་ཡང་གསུངས་ཡོད་པ་བཅས། །
བོད་ཀྱི་དཔལ་འབྱོར་དང་རིག་གཞུང་གི་གནད་དོན་ཐོག་ཨ་རི་གཞུང་གིས་རྒྱ་ནག་དང་ལྷན་ངེས་པར་དུ་མཉམ་ལས་གནང་དགོས་པའི་འབོད་སྐུལ་ཞུས་པ།
གསར་གནས།
འབྲེལ་གནས།
