༢༠༡༡ ཟླ་ ༣ ཚེས་ ༢༨ རེས་གཟའ་ཟླ་བ།
༄༅། །འདི་གར་ཉི་ཧོང་བོད་གཞུང་སྐུ་ཚབ་དོན་ཁང་ནས་བཏང་གནས་ནང་འཁོད་དོན།  ཕྱི་ལོ་ ༢༠༡༡ ཟླ་ ༣ ཚེས་ ༢༦ ཉིན་ཉི་ཧོང་བོད་གཞུང་སྐུ་ཚབ་དོན་ཁང་དང་ཉི་ཧོང་དགེ་འདུན་ལྷན་ཚོགས་ཟུང་འབྲེལ་གྱིས་ཉི་ཧོང་གི་རྒྱལ་ས་ཊོཀ་ཁྱོའི་གྷོ་ཀོ་ཀུ་ཇི་ (Gokokuji ) ནང་པའི་དགོན་པར་ཉི་ཧོང་དང་བོད་པའི་དགེ་འདུན་པ་བཅས་ཁྱོན་མི་གྲངས་ ༡༥༠ ཙམ་གྱིས་ཉེ་ལམ་ཉི་ཧོང་ནང་ས་ཡོམ་དང་མཚོ་རླབས་ཀྱི་གནོད་འཚེ་ཤུགས་ཆེ་འོག་ཚེ་སྲོག་ཤོར་བ་རྣམས་དང་དཀའ་སྡུག་མྱོང་བཞིན་པའི་ཡུལ་མི་རྣམས་ཀྱི་ཆེད་ཤེས་རབ་སྙིང་པོ་གསོག་སྒྲུབ་བྱས་ཡོད།
སྐབས་དེར་ཉི་ཧོང་བོད་གཞུང་སྐུ་ཚབ་དོན་གཅོད་སྐུ་ཞབས་ལྷག་པ་མཚོ་སྒོ་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་བོད་མི་སེར་སྐྱ་མང་ཚོགས་རྣམས་ཀྱིས་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་ཤེས་རབ་སྙིང་པོ་འབུམ་གཅིག་བསགས་ཡོད་སྐོར་གསལ་བཤད་གནང་ཡོད་པ་མ་ཟད། ༸གོང་ས་མཆོག་གིས་ཤེས་རབ་སྙིང་པོ་བཀའ་ཁྲིད་མཛད་པའི་འོད་སྡེར་ཉི་ཧོང་མང་ཚོགས་ལ་འགྲེམས་སྤེལ་ཞུས་ཡོད། ཕྱོགས་མཚུངས་སྐབས་དེར་དགོན་པ་དེའི་མཁན་པོ་སྐུ་ཞབས་ཨོ་ཀ་མོ་ཊོ་ལགས་ཀྱིས་གསུང་དོན། ༸གོང་ས་ཏཱ་ལའི་བླ་མ་མཆོག་གིས་ཉི་ཧོང་མང་ཚོགས་ཆེད་ཐུགས་སྨོན་མཛད་པར་ང་ཚོས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན་ཞེས་གསུང་། གཞན་ཡང་ཉི་ཧོང་གྲོང་ཁྱེར་ཧི་རོ་ཤི་མའི་ནང་རྟེན་གཞི་བྱས་པའི་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གི་འཇམ་དབྱངས་ཐེག་ཆེན་ཆོས་ཚོགས་ཀྱི་དགེ་འདུན་པ་རྣམས་ཀྱིས་ཤེས་རབ་སྙིང་པོ་གསུང་འདོན་གནང་ཡོད་པ་མ་ཟད། ཉི་ཧོང་གི་དགེ་འདུན་པ་རྣམས་ཀྱིས་ཉི་ཧོང་སྐད་ཐོག་ཤེས་རབ་སྙིང་པོ་གསུངས་ཡོད། སྨོན་ལམ་གྲུབ་བསྟུན་ཉི་ཧོང་དགེ་འདུན་ལྷན་ཚོགས་ཀྱི་ཚོགས་གཙོ་སྐུ་ཞབས་ཧ་ཡཱ་ཤི་ (Hayashi) ལགས་ཀྱིས་ཚོགས་བཅར་བ་རྣམས་ལ་ཐུགས་རྗེ་ཆེ་ཞུས་ཡོད། དེ་བཞིན་ཉི་ཧོང་བོད་གཞུང་སྐུ་ཚབ་དོན་གཅོད་ཀྱིས་ཚེ་སྲོག་ཤོར་བ་རྣམས་ཀྱི་ཞག་ ༤༩ མཆོད་འབུལ་སྨོན་ལམ་དེ་ཡང་དགོན་པ་དེར་ཚུགས་རྒྱུ་ཡིན་སྐོར་གསལ་སྒྲགས་གནང་ཡོད་པ་བཅས།།