༢༠༡༡ ཟླ་ ༣ ཚེས་ ༡༦ རེས་གཟའ་ལྷག་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ། ཕ་མིང་ལ་ཚེ་རིང་བཀྲ་ཤིས་དང་མ་མིང་ལ་རྫོགས་དཀར་ཟེར་ཞིང་ཕ་ཡུལ་རྔ་པ་རྨེའུ་རུ་མའི་རུ་ཆེན་གཉིས་པའི་ཇ་རུ་ཚང་ནས་ཡིན་པའི་རང་ལོ་ ༢༡ ལ་སོན་པའི་རྔ་པ་ཀིརྟི་དགོན་གྱི་དགེ་འདུན་པ་ཕུན་ཚོགས་ལགས་ཀྱིས་ཕྱི་ལོ་ ༢༠༡༡ ཟླ་ ༣ ཚེས་ ༡༦ ཉིན་བོད་ནང་གི་ཕྱི་དྲོའི་ཆུ་ཚོད་ ༤ པ་ཙམ་ལ་རྔ་པའི་ཁྲོམ་མགོ་ནས་རང་ལུས་ལ་མེ་སྤར་ཏེ་༸རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག་སོགས་ཀྱི་རྒྱ་ནག་གཞུང་ལ་ཞི་རྒོལ་སྐད་འབོད་བྱས་འདུག་ལ་དེ་མ་ཉིད་དུ་ས་གནས་དེ་གའི་ཉེན་རྟོག་མི་སྣས་རྡུང་རྡེག་དང་བཅས་ཏེ་མེ་བསད་ཡོད་འདུག་མོད། ཁོང་རྒྱ་དམག་གི་ལག་ཏུ་ཤོར་མེད་པར་མི་མང་དང་དགེ་འདུན་པ་རྣམས་ཀྱིས་ཉེན་རྟོག་པའི་ལག་ནས་འཕྲོགས་ཏེ་རྔ་པ་ཀིརྟི་དགོན་དུ་འཁྱེར་ཡོད་འདུག དེ་རྗེས་མི་མང་དང་དགེ་འདུན་པ་གྲངས་ ༡༠༠༠ བརྒལ་བས་ཞི་རྒོལ་གྱི་སྐད་འབོད་བྱས་ཏེ། ཁྲོམ་མགོ་ནས་སྤྱི་ལེ་ཕྱེད་མ་ཟིན་ཙམ་གྱི་བར་གོམ་འགྲོས་བྱས་འདུག་མོད། དེ་ནས་དམག་དཔུང་འབོར་ཆེན་འབྱོར་ཏེ་ལྕགས་དབྱུག་དང་གློག་རྒྱུག་སོགས་གཞུས་ནས་ཚང་མ་ཁ་འཐོར་བཏང་ཞིང་། ཞི་རྒོལ་བྱེད་ས་དེ་ནས་ལག་སོན་བྱུང་བའི་དགེ་འདུན་པ་དང་མི་མང་ཡོངས་རྫོགས་འཛིན་བཟུང་བྱས་འདུག ལྷག་པར་དགེ་འདུན་པ་མཐོང་ཚད་འཛིན་བཟུང་བྱས་དང་བྱེད་མུས་ཡིན་འདུག་ལ་རྒྱ་ལག་ཏུ་མ་ཤོར་བའི་མི་མང་དང་དགེ་འདུན་པ་རྣམས་ཀྱི་ཁྲོད་རྨས་སྐྱོན་ཚབས་ཆེན་ཕོག་པའང་མང་པོ་ཡོད་འདུག རྔ་པ་རྫོང་ཐོག་གི་ཁྲོམ་གཞུང་དང་ཕྱོགས་ཡས་མས་སུ་ཐོན་སའི་ལམ་ཁ་ཡོངས་རྫོགས་དམག་མིས་བཀག་སྡོམ་བྱས་ཏེ། བོད་པ་ཞིག་ཕྱིར་ཐོན་ས་མེད་པ་ལྟ་བུ་གྱུར་ཡོད། གནས་ཚུལ་འབྱོར་གསལ་ལྟར་ན། རང་ལུས་མེར་སྲེག་གཏོང་མཁན་གྱི་དགེ་འདུན་པ་ཕུ
ན་ཚོགས་ལགས་འདས་གྲོངས་སུ་གྱུར་ཡོད་པ་དང་། ཁོང་གི་སྐུ་ཕུང་རྒྱ་དམག་གི་ལག་ཏུ་ཤོར་མེད་ཀྱང་དགོན་པའི་གླིང་མགོའི་སྒོ་ཆེན་ནང་ལ་དགེ་འདུན་པ་རྣམས་ཀྱིས་རྒྱ་དམག་བཀག་འགོག་བྱས་ཏེ། ཚང་མ་མ་འཆི་བར་དུ་ཁོང་གི་སྐུ་ཕུང་རྒྱ་དམག་གི་ལག་ཏུ་མི་སྤྲོད་ཟེར་ནས་བསྡད་ཡོད་འདུག ད་ཆ་དགོན་པའི་ལྕགས་རིའི་ཕྱི་ཡོངས་རྫོགས་དམག་དཔུང་གིས་སྐོར་ཡོད་པའི་ཤིན་ཏུ་ཛ་དྲག་གི་གནས་སྟངས་འོག་གནས་མུས་ཡིན་འདུག དམ་པ་ཁོང་རྔ་པ་
རྫོང་སྨན་ཁང་དུ་ཁྲིད་འདུག་ཀྱང་མྱུར་སྐྱོབ་མ་ཐུབ་པར་ཕྱི་ཚེས་ ༡༧ ཉིན་སྔ་དྲོའི་བོད་ནང་གི་ཆུ་ཚོད་ ༣ པ་ཡོལ་ཙམ་ལ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག ད་ལྟའི་ཆར་རྔ་པ་ཁུལ་དུ་ས་ཕྱོགས་གང་ས་ནས་འབྲེལ་ཐབས་བྱེད་དཀའ་བའི་གནས་སུ་ལྷུང་འདུག
འདི་ཕྱོགས་ནས་གནས་ཚུལ་ཤེས་རྟོགས་བྱུང་དོན་ལྟར་ན། ཨ་མདོ་རྔ་པ་ཁུལ་ཙམ་མིན་པར་བླ་བྲང་ཁུལ་དུ་ཡང་ཁ་པར་ལ་དམ་བསྒྲགས་ཤུགས་ཆེན་བྱས་རྐྱེན་འབྲེལ་བ་བྱེད་དཀའ་བའི་གནས་སུ་གྱུར་ཡོད་པ་བཅས། །
