༢༠༡༡ ཟླ་ ༣ ཚེས་ ༡༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༣ ཚེས་ ༡༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐེ་ལན་ཌིའི་ནང་པའི་ཆོས་ཚོགས་ཁག་གཅིག་གིས་ཇི་ལྟར་གསོལ་འདེབས་ཞུས་དོན་ལྟར་མགོན་པོ་གང་ཉིད་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་དང་། སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་པའི་གསུང་ཆོས་དབུ་འཛུགས་བསྐྱངས་པ།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐེ་ལན་ཌིའི་དད་ལྡན་ཆོས་ཞུ་བའི་འཐུས་ཚབ་རྣམས་ཀྱིས་ཕོ་བྲང་ནས་སྤོས་སྣེས་སྔོན་བསུས་ཏེ་ཐེག་ཆེན་ཆོས་གླིང་གཙུག་ལག་ཁང་གི་ཡང་སྟེང་དུ་གདན་ཞུས་དང་སྦྲགས་བཞུགས་ཁྲི་རིན་པོ་ཆེར་༸ཞབས་སོར་འཁོད་རྗེས་སྔོན་འགྲོའི་གསུང་ཆོས་སྩལ་དོན། དེ་རིང་འདིར་ནང་པའི་ཡུལ་གྲུ་ལྷག་པར་འདུལ་བའི་ཉམས་བཞེས་ཞེ་དྲག་ཡག་པོ་ཡོད་མཁན་འབར་མ་དང་། ཐེ་ལན་ཌི། ཁམ་པོ་ཌི་ཡ་དེ་ཚོའི་གྲས་ཞེ་དྲག་ཡག་པོ་རེད། དེ་རིང་འདིར་ཐེ་ལན་ཌི་ནས་ཆོས་གྲོགས་ཚོ་ཁག་ཅིག་འདིར་ཕེབས་ཏེ་ཆོས་འབྲེལ་བྱུང་ན་ཞེས་རེ་འདུན་གནང་བྱུང། ཕྱི་ལོ་ ༡༩༦༠ ནང་ངོས་རང་ཐེ་ལན་ཌི་ལ་ཐེངས་གསུམ་བཞི་ཙམ་བསླེབས་ཡོད། འདུལ་བའི་ཉམས་བཞེས་ཞེ་དྲག་ཡག་པོ་རེད། དགེ་སློང་འབུམ་རམས་པ་དེ་ཚོའི་ནང་རེ་ཟུང་ཞབས་འདྲེན་ཞུ་མཁན་ཡོང་གི་ཡོད་ཀྱང། སྤྱིར་འདུལ་ཁྲིམས་དེ་ཚོའི་གྲས་ཞེ་དྲག་ཡག་པོ་རེད། གསོལ་སྙོམས་ལ་ཕེབས་ནས་ངོས་རང་དེ་དུས་ཐེ་ལན་ཌི་ལ་ཡོད་སྐབས་གསོལ་སྙོམས་ལ་མཉམ་དུ་ཕྱིན་པ་ཡིན། བཅོམ་ལྡན་འདས་ཞལ་བཞུགས་དུས་འདི་འདྲ་ཡིན་གྱི་རེད་བསམ་པ་ཞིག་བློ་ལ་ཤར་བྱུང་།  ཁོང་རྣམ་པ་ལུང་པ་དེ་ནས་ཕེབས་པ་ཞིག་རེད། ཆོས་བརྒྱུད་པཱ་ལིའི་གཞུང་རྩ་འཛིན་ཐོག་གནང་གི་ཡོད། བོད་གངས་ཅན་གྱི་ཆོས་བརྒྱུད་དེ་གཙོ་བོ་མཁན་ཆེན་ཞི་བ་འཚོ་ཆོས་རྒྱལ་ཁྲི་སྲོང་ལྡེའུ་བཙན་གྱི་གདན་ཞུ་གནང་ནས་བོད་ལ་ཕེབས་ཏེ་སངས་རྒྱས་ཀྱི་བསྟན་པ་རྨང་གཞི་བཙུགས་གནང་བ་རེད།  དེ་འདྲ་ཡིན་དུས་ཁོང་རང་ཉིད་འདུལ་བ་འཛིན་པ་ཆེན་པོ་རེད། པཱ་ལིའི་གཞུང་དང་ཐུན་མོང་བ་བྱས་ཏེ་འདུལ་བའི་ཉམས་བཞེས་དེ་དག་ཡོད་པའི་ཐོག་ལེགས་སྦྱར་ནང་ཡོད་པའི་མངོན་པའི་གཞུང་དེ་དག་ཞེ་དྲག་གལ་ཆེན་པོ་རེད། དེ་བཞིན་ཁོང་ཧ་ཅང་གི་མཁས་པ་ཡིན་པ་མ་ཟད།  ཁོང་གིས་གསར་གཏོད་མཛད་པའི་ནང་ཆོས་ཀྱི་ཆོས་བརྒྱུད་གཅིག་ངོས་ཀྱིས་ནམ་རྒྱུན་བོད་གངས་ཅན་ལྗོངས་ཀྱི་ཆོས་བརྒྱུད་དེ་དཔལ་ནཱ་ལེནྡྲ་ནས་བརྒྱུད་པའི་ཆོས་བརྒྱུད་ཡིན་ཞེས་ཤོད་ཀྱི་ཡོད། དེ་རིང་འདི་གར་བཤད་རྒྱུའི་གཞུང་དེ་ཐོག་མར་ཁོང་རྣམ་པས་ཆོས་འབྲེལ་བྱུང་ན་གསུངས་དུས་ངོས་ནས་གཞུང་དེ་ག་རེ་བྱེད་དགོས་ཡིན་ནམ་བསམ་བྱུང་། བདེན་བཞིའི་མདོ་ཡོད་པ་དེ་ཐུན་མོང་བ་རེད་འདུག བོད་ཡིག་དང་པཱ་ལི་ནང་ལའང་ཡོད་པ་ཞིག་རེད། དེ་འདྲ་ཞིག་གི་ཐོག་ནས་ཞུ་དགོས་ཡིན་ནམ་བསམ་པ་དྲན་བྱུང་། ཡང་བསམ་བློ་གཉིས་པ་དེར་ཁོང་རྣམ་དོན་གཉེར་ཆེན་པོ་བྱས་ཏེ་འདིར་ཕེབས་པ་རེད། དེར་བརྟེན་གཞུང་གསར་པ་ཞིག་གཟིགས་ཐུབ་ན་བློ་བསྐྱེད་ཡོང་རྒྱུའི་ཕན་ཐོགས་མི་ཡོང་ངམ་བསམ་པ་དྲན་བྱུང་། གཞུང་དེ་སློབ་དཔོན་ཀ་མ་ལ་ཤི་ལས་མཁན་ཆེན་ཞི་བ་འཚོའི་བཀའ་དགོངས་གཞིར་བཟུང་བྱས་ཏེ་ཆོས་རྒྱལ་གྱི་གདན་ཞུ་གནང་སྟེ་བོད་ལ་ཕེབས་ཏེ་མཛད་པ་ཞིག་རེད། ཁོང་གིས་རྒྱ་གར་ལ་བཞུགས་སྐབས་དབུ་མ་སྣང་བ་ལ་སོགས་པ་དེ་ཚོའི་གྲས་མཛད་ཡོད་ལ་བོད་ནང་ཕེབས་རྗེས་སྒོམ་རིམ་ཐོག་མཐའ་བར་གསུམ་མཛད་པ་དེ་ལོ་རྒྱུས་ནང་གསལ་པོ་ཞེ་དྲག་རེད། སྒོམ་རིམ་དེ་མར་ཞུས་ན་ཡག་པོ་མེད་དམ་བསམ་པ་དེ་འདྲ་ཞིག་དྲན་བྱུང་། དེ་རིང་ཞུ་རྒྱུ་དེ་སྒོམ་རིམ་རེད། ཁྱེད་རང་ཚོ་འདིར་བོད་པ་ཚོ་དང་། གར་ཞྭ། ཁུ་ནུ། ལ་དྭགས་སོགས་ནས་ཡོང་བ། ཁྱེད་རང་ཚོ་དང་།ཁྱེད་རང་ཚོས་ཕྱི་རྒྱལ་བ་ཐེངས་མང་གོ་ཡོད་ངེས་རེད། དཔེ་ཆ་དེ་རྙིང་པ་རྒྱུས་ཡོད་པའི་བཟོ་འདྲ་ཞིག་ཡིན། འོན་ཀྱང་ང་ཚོས་འདུལ་བའི་གླེགས་བམ་ལྟ་བུ་ཉན་རྒྱུ་ཡིན་ན་ལོ་རྒྱུས་མར་གསུང་ཡོང་གི་ཡོད་དུས་ཐེངས་གཅིག་གོ་ནས་འཇོག་རྒྱུ་རེད། གཞུང་འདི་ཚོའི་གྲལ་དེ་ཡང་ནས་ཡང་དུ་བསམ་དགོས་པ་དང་སྒོམ་དགོས་རྒྱུ་ཞིག་ཡིན་དུས་ཐེངས་གཉིས་གསུམ་བཅུ་ཉི་ཤུ་ཐོས་པ་ཡིན་ནའང། ངོམས་པ་མེད་པ་དང་ཚིམ་པ་མེད་པ་བྱས་ཏེ་ལྟ་དགོས་རྒྱུ་ཞིག་ཆགས་ཡོད། དེར་བརྟེན་གཉིས་བརྩེགས་རང་ཆགས་ཨེ་ཡོང་བསམ་པ་དྲན་བྱུང་།
ཁ་སང་ནིའུ་ཛི་ལན་ཌི་དང་ཨོ་སི་ཊོ་ཡར་འབྱུང་བའི་གནོད་པ་ཤུགས་ཆེན་པོ་བྱུང་ཡོད། ཆར་པས་ཆུ་ལོག་རྒྱག་རྒྱུ་དང་ནིའུ་ཛི་ལན་ཌིར་ས་འགུལ་རྒྱག་རྒྱུ། ཉེ་ཆར་ཉི་ཧོང་ལ་ས་འགུལ་ཤུགས་ཆེ་བརྒྱབ་རྗེས་རྒྱ་མཚོའི་མཚོ་རླབས་ཀྱི་སྐྱོན་ཞེ་དྲག་བཏང་སྟེ་གོད་ཆག་ཆེན་པོ་བྱུང་བ་རེད། ཕྱོགས་གཅིག་ནས་བཤད་ན་ཉི་ཧོང་ནང་པའི་ལུང་པ་རེད། ངོས་རང་སྒེར་གྱི་ངོས་ནས་བཤད་པ་ཡིན་ནའང་ཉིང་ཧོང་ནང་གྲོགས་པོ་མང་པོ་ཡོད། དེ་འདྲ་ཡིན་དུས་ཕ་གིར་རྐྱེན་ངན་ཡོང་སྐབས་ང་ཚོས་སྨོན་ལམ་རྒྱག་རྒྱུ་མ་གཏོགས་གཞན་དག་བྱེད་རྒྱུ་གང་ཡང་མི་འདུག།  ཁ་སང་གཡས་གཡོན་དགོན་ཁག་ཚོ་དང། གདན་ས་ཚོ་ལ་ཤེས་རབ་སྙིང་པོ་ཏོག་ཙམ་གསོག་ཐུབ་ན་ཞུས་པ་ཡིན། དེ་རིང་ང་ཚོས་འདིར་ཉི་ཧོང་ལ་བློ་ཡུལ་ལས་འདས་པའི་སྐྱོན་ཆག་བྱུང་བ་དང་འདས་པོ་ཚོའི་ཆེད་དུ་སྨོན་ལམ་རྒྱག་རྒྱུ་དང། དེ་བཞིན་ཕྱིན་ཆད་དེ་ལྟ་བུའི་འབྱུང་བའི་གནོད་པ་མི་ཡོང་བའི་སླད་ཁ་སང་ཆེད་དུ་དམིགས་ཏེ་ཤེས་རབ་སྙིང་པོ་འབུམ་གཅིག་ཙམ་གསོག་རྒྱུའི་རེ་འདུན་བྱས་པར་གསོག་འགོ་བཙུགས་ཡོད། འདི་གར་ཤེས་རབ་སྙིང་པོ་ཐེངས་གསུམ་ཞིག་བཏོན་ན་བསམ་དྲན་བྱུང། ཁྱེད་རྣམ་པ་ཉི་ཧོང་གི་མི་ཁ་ཤས་ཡོད་པ་རྣམས་ནས་ཉི་ཧོང་སྐད་ནང་བཏོན་ནའང་འགྲིགས་ཀྱི་རེད། ཅེས་བཀའ་སློབ་ཕེབས་ཏེ་སྔོན་འགྲོའི་གསུང་ཆོས་བཀའ་དྲིན་ཆེ་བ་སྩལ། ད་རེས་གསུང་ཆོས་འདིར་ཐེ་ལན་ཌིའི་ནང་པ་ཆོས་ཞུ་བའི་དབུས་ཕྱི་རྒྱལ་ཡུལ་གྲུ་ཁག་ ༦༡ ནས་མི་གྲངས་ ༡༠༩༧ དང་རང་རིགས་བཅས་ཁྱོན་མི་གྲངས་ ༦༠༠༠ བརྒལ་བ་བཅར་ཡོད་འདུག་པ་བཅས།