༢༠༡༡ ཟླ་ ༣ ཚེས་ ༣༡ རེས་གཟའ་ཕུར་བུ།
༄༅། །ཨ་རིའི་ཨེ་ཊ་ལན་ཊར་(Atlanta) མངའ་སྡེའི་ནང་ཡོད་པའི་ཨེ་མོ་རི་(Emory University)ཆེས་མཐོའི་གཙུག་ལག་སློབ་གཉེར་ཁང་དུ་(Tibet Week)བོད་ཀྱི་བདུན་ཕྲག་ཅེས་པའི་དུས་དྲན་ཐེངས་བཅུ་གཅིག་པ་དེ་སྲུང་བརྩི་ཞུ་འགོ་ཚུགས་ཡོད།
དེ་ཡང་ཨེ་མོ་རི་ཆེས་མཐོའི་གཙུག་ལག་སློབ་གཉེར་ཁང་དུ་ཕྱི་ལོ་ ༢༠༡༡ ཟླ་ ༣ ཚེས་ ༢༨ ཉིན་ནས་འགོ་འཛུགས་ཀྱིས་ཕྱི་ཟླ་ ༤ ཚེས་ ༢ བར་ཉིན་གྲངས་དྲུག་གི་རིང་(Tibet Week)བོད་ཀྱི་བདུན་ཕྲག་ཅེས་པ་དེ་སྲུང་བརྩི་ཞུ་བཞིན་ཡོད་པ་རེད། གཙུག་ལག་སློབ་གཉེར་ཁང་དེ་ནས་བོད་དོན་དང་འབྲེལ་བའི་དུས་སྟོན་དེ་བཞིན་ལོ་རེར་ཐེངས་རེ་སྲུང་བརྩི་ཞུས་དང་ཞུ་མུས་ཡིན་འདུག ཐེངས་འདིའི་དུས་སྟོན་དང་འབྲེལ་བའི་གཙུག་ལག་སློབ་གཉེར་ཁང་ནས་སློབ་གཉེར་ཁང་དེའི་སློབ་ཕྲུག་ཡོངས་ལ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་རྣམས་གཙོ་བོ་ངོ་སྤྲོད་གནང་བཞིན་ཡོད་པ་མ་ཟད། བོད་དོན་དང་འབྲེལ་བའི་དུས་སྟོན་དེའི་ནང་བོད་ཀྱི་རིག་གཞུང་ངོ་སྤྲོད་ནང་བོད་ཀྱི་རོལ་དབྱངས་ངོ་སྤྲོད་དང་གཞས་སྣ་ཁག་གཅིག་འཁྲབ་སྟོན་གནང་གི་ཡོད། དེ་བཞིན་བོད་ཀྱི་རིག་གཞུང་དང་འབྲེལ་བའི་གློག་བརྙན་ཁག་གཅིག་ཀྱང་སྟོན་རྒྱུ་ཡིན་འདུག ཕྱོགས་མཚུངས་ཆོས་ཕྱོགས་ནས་དུས་སྟོན་དེའི་སྐབས་དཀྱིལ་འཁོར་དང་མཆོད་པ། སྒོམ་སྒྲུབ་ཉམས་ལེན་གྱི་རྣམ་གཞག་བཅས་ཆོས་ཕྱོགས་ཀྱི་བྱེད་སྒོར་འཇུག་ཚུལ་མང་དག་ཅིག་ངོ་སྤྲོད་གནང་རྒྱུ་ཡིན་པ་མ་ཟད། ལྷག་པར་དུས་སྟོན་གྱི་གཟའ་འཁོར་དེའི་རིང་གཙུག་ལག་སློབ་གཉེར་ཁང་དེའི་སློབ་མ་རྣམས་ལ་བོད་ཀྱི་ཆོས་དང་རིག་གཞུང་ཐོག་དོ་སྣང་དང་གོ་རྟོགས་སྤེལ་སླད་ཆེད་ལས་མི་སྣ་གདན་ཞུས་ཐོག་བགྲོ་གླེང་གནང་རྒྱུའི་ལས་རིམ་ཞིག་ཀྱང་གོ་སྒྲིག་གནང་འདུག
གཞི་རྩའི་ཨེ་མོ་རི་ཆེས་མཐོའི་གཙུག་ལག་སློབ་གཉེར་ཁང་དེ་ནི་ཨ་རིའི་ནང་ཡོད་པའི་ཤེས་ཡོན་གྱི་བསྟི་གནས་ཆེ་ཤོས་གྲས་ཤིག་ཡིན་པ་མ་ཟད། སློབ་ཕྲུག་གི་ཤེས་ཡོན་གནས་ཚད་ཀྱང་ལེགས་པའི་སྙན་གྲགས་ཅན་གྱི་གཙུག་ལག་སློབ་གཉེར་ཁང་ཆགས་ཡོད། དེ་བཞིན་སློབ་གཉེར་ཁང་དེ་ནི་བོད་དང་བོད་མིའི་གནས་སྟངས་ཐོག་དོ་སྣང་དང་རྒྱབ་སྐྱོར་ཤུགས་ཆེ་གནང་མཁན་ཞིག་ཀྱང་ཆགས་ཡོད། ཨེ་མོ་རི་ཆེས་མཐོའི་གཙུག་ལག་སློབ་གཉེར་ཁང་ནས་ཕྱི་ལོ་ ༢༠༠༧ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སློབ་གཉེར་ཁང་དེའི་ཆེ་བསྟོད་ཀྱི་སློབ་དཔོན་ཆེན་མོའི་མཚན་གནས་ཕུལ་ཡོད་པ་མ་ཟད། མགོན་པོ་གང་ཉིད་མཆོག་གིས་གཙུག་ལག་སློབ་གཉེར་ཁང་དེར་ཐེངས་འགའ་ཤས་ཆིབས་སྒྱུར་བསྐྱངས་ཏེ་བཀའ་སློབ་སྩལ་ཡོད་པ་བཅས། །