༄༅། །ཕྱི་ལོ་ ༢༠༡༡ ཟླ་ ༣ ཚེས་ ༢༤ ཉིན་འདི་རྒྱལ་སྤྱིའི་ཊི་བྷི་ཉིན་མོ་ཡིན་པ་ལྟར་དཔལ་ལྡན་འཕྲོད་བསྟེན་བཀའ་བློན་མཆོག་གིས་དབུས་དང་ཕྱོགས་མཐའ་ཁག་ལ་གནས་པའི་འཕྲོད་བསྟེན་ཞབས་ཞུ་བ་ཡོངས་ལ་བཏང་གནང་བའི་གནས་འཕྲིན་གཤམ་གསལ།
ཕྱི་ལོ་ ༡༨༨༢ ལོར་འཛམ་གླིང་ནང་ཊི་བྷི་ནད་འབུ་ངོས་བཟུང་གསལ་བསྒྲགས་བྱུང་བའི་ཐོག་སྨན་བཅོས་བྱ་ཕྱོགས་སུ་གོམ་པ་དང་པོ་སྤོས་ཐུབ་པ་ཞིག་བྱུང་བ་རེད། དེང་སྐབས་རྒྱལ་སྤྱིའི་འཕྲོད་བསྟེན་ལྷན་ཚོགས་ཀྱི་ལམ་སྟོན་འོག་རྒྱལ་སྤྱིའི་ཊི་བྷི་རྩ་འགོག་མཐུན་ཚོགས་ནས་ལོ་ལྟར་ཕྱི་ཟླ་ ༣ ཚེས་ ༢༤ ཉིན་རྒྱལ་སྤྱིའི་ཊི་བྷི་ཉིན་མོ་ཞེས་དུས་དྲན་སྲུང་བརྩི་ཞུ་བཞིན་ཡོད་པའི་དམིགས་ཡུལ་དང་དགོས་པ་ནི། མང་ཚོགས་ཀྱི་ངོས་ནས་ཊི་བྷི་ནད་གཞིའི་སྨན་བཅོས་སྐོར་གནས་ཚུལ་ཆ་ཚང་བ་ཞིག་ཤེས་རྟོགས་བྱུང་བའི་ཐོག་ནས་རིམ་པས་ནད་གཞི་འདི་བཞིན་རྩ་མེད་བཟོ་རྒྱུར་དམིགས་པའི་དུས་དྲན་གལ་ཆེ་ཞིག་ཆགས་ཡོད། ཊི་བྷི་ནད་གཞི་འདི་ནི་དེང་སྐབས་འཛམ་གླིང་ནང་ཁྱབ་གདལ་འགྲོ་བཞིན་པའི་ནད་གཞི་ཚབས་ཆེ་ཞིག་ཡིན་པས་ལོ་ལྟར་མི་མང་ས་ཡ་མང་པོ་རྐྱེན་འདས་སུ་འགྲོ་བཞིན་ཡོད། རང་རེའི་བཙན་བྱོལ་སྤྱི་ཚོགས་ལ་ཆ་མཚོན་ན། བོད་མི་འདུས་སྡོད་ས་གནས་སོ་སོའི་ནང་ནད་གཞི་འགོག་ཐབས་སུ་འཕྲོད་བསྟེན་སློབ་གསོ་དང་། བྱིས་པ་ཚོར་སྔོན་འགོག་གི་ཁབ། སློབ་ཕྲུག་ཚོར་བརྟག་དཔྱད་བཅས་དང་། ནད་བཅོས་སུ་ཊི་བྷི་སྨན་ཁང་འགའ་ཤས་འཛུགས་སྐྲུན་གྱིས་ནད་གཞི་ཁྱབ་གདལ་སྔར་ལས་ཉུང་དུ་ཕྱིན་ཡོད་མོད་ཀྱང་། རྩ་འགོག་ཐུབ་པ་བྱུང་མེད་པ་མ་ཟད་ནད་མནར་ཕལ་མོ་ཆེ་རང་རིགས་གཞོན་སྐྱེས་ཡིན་འདུག་ན། ཚང་མས་སྣང་ཆུང་དུ་མ་སོང་བར་སྔར་ལྷག་ཐུགས་སྣང་དང་ཡིད་གཟབ་གནང་གལ་ཆེ། ལྷག་པར་དུ། ནད་པ་རང་ཉིད་ནས་རང་སྲོག་རང་གཅེས་ཀྱིས་སྨན་བཅོས་འཐུས་གཙང་བྱ་རྒྱུར་ལྷོད་གཡེང་ནམ་ཡང་གནང་ཐལ་མེད་པ་དགོས། ཊི་བྷི་ནད་གཞི་ཁྱབ་གདལ་མི་འགྲོ་བའི་འགན་ཆེ་ཤོས་ནི་དོ་བདག་ནད་པ་ཚོར་ཡོད། སོ་སོས་སྨན་དུས་ཐོག་ཆད་མེད་ཟ་དགོས་ཐོག ཟས་སྤྱོད་ཚུལ་བཞིན་བསྟེན་དགོས་ཤིང་། ནད་གཞི་མི་གཞན་ལ་མ་འགོས་པ་གཙོ་དོན་བྱ་རྒྱུ་ཤིན་ཏུ་གལ་ཆེན་པོ་ཡིན། ང་ཚོའི་སྤྱི་ཚོགས་ནང་ཊི་བྷི་ནད་གཞི་ཁྱབ་གདལ་དུ་འགྲོ་བཞིན་པའི་རྒྱུ་རྐྱེན་གཅིག་ནི། ཚང་མས་སྣང་ཆུང་དང་ལྷོད་གཡེངས་སུ་སོང་སྟེ་མི་གཅིག་ནས་གཅིག་ལ་འགོས་པ་ལས། གཙང་འཕྲོད་དང་ཟས་བཅུད་མ་འདང་བའི་རྐྱེན་གྱིས་མིན་པར་མངོན། སྨན་བཅོས་བྱ་ཕྱོགས་ཐད། དེང་སྐབས་ལམ་ལུགས་ཚད་ལྡན་དུ་བརྩི་བ་ཐད་ཀར་ལྟ་རྟོག་སྨན་བཅོས་ (Direct Observe Therapy) ཞེས་སྨན་བཅོས་ལམ་སྟོན་གཏན་འབེབས་ཡོད་པ་གཞིར་བཟུང་འབྲེལ་ཡོད་འཕྲོད་བསྟེན་ཞབས་ཞུ་བ་ཚོས་ཐུགས་འཁུར་ཆེན་པོས་ལག་བསྟར་གནང་རྒྱུ་ནི་རང་ལ་ཐོག་ཏུ་བབས་པའི་ལས་འགན་གལ་ཆེ་ཞིག་ཡིན། སྤྱི་ཚོགས་ངོས་ནས་ནད་པ་རྣམས་ལ་མཐོང་ཆུང་དང་དབྱེ་འབྱེད་མེད་པར། བདེ་བ་འདོད་མཁན་གཅིག་མཚུངས་ཡིན་པའི་བསམ་ཤེས་ཀྱིས་བྱམས་སྐྱོང་དང་ལྡན་པའི་ཐོག་ནས་ནད་གཞི་བཅོས་ཐབས་སུ་རྒྱབ་སྐྱོར་གང་ཐུབ་གནང་རྒྱུ་གལ་ཆེན་པོ་ཡིན། དེ་ལྟར་ཕྱོགས་ཚང་མས་འཁུར་མཉམ་ལེན་གནང་ཚེ་རིང་པོ་མི་ཐོག་པར་རང་རེའི་སྤྱི་ཚོགས་ཁྲོད་ཊི་བྷི་ནད་གཞི་རྩ་འགོག་ཐུབ་ངེས་ཡིན་པར་སོང་། བོད་མི་སེར་སྐྱ་རྒན་བྱིས་བར་གསུམ་ཚང་མས་དེ་དོན་དམ་གཟབ་གནང་དགོས་ནན་སྐུལ་ཞུ་རྒྱུ་དང་། ཊི་བྷི་ནད་གཞི་འདི་བཞིན་རྩ་མེད་དུ་གང་མྱུར་འགྲོ་བའི་རེ་སྨོན་བཅས། བོད་གཞུང་འཕྲོད་བསྟེན་བཀའ་བློན་དཔལ་འབྱོར་ཚེ་རིང་གིས། ཕྱི་ལོ་ ༢༠༡༡ ཟླ་ ༣ ཚེས་ ༢༤ ལ།།
