༢༠༡༡ ཟླ་ ༣ ཚེས་ ༢༨ རེས་གཟའ་ཟླ་བ།
༅༅། །འདི་གར་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་བཏང་གནས་ ནང་འཁོད་དོན། ཕྱི་ལོ་ ༢༠༡༡ ཟླ་ ༣ ཚེས་ ༢༥ བོད་ཀྱི་རྒྱལ་ས་ལྷ་སའི་ཆུ་ཚོད་ ༡༢ དང་ཕྱེད་ཐོག་རྒྱལ་གཅེས་དཔའ་བོ་བུ་ལུག་ལགས་དེ་ཉིད་ལྷ་སའི་སྨན་ཁང་ཞིག་ཏུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག དེ་ཡང་རྒྱལ་གཅེས་དཔའ་བོ་བུ་ལུག་ལགས་ནི་བོད་མདོ་ཁམས་སྡེ་དགེ་འཇོ་མདའ་རྫོང་ཁོངས་འཛི་སྒར་ཤང་པདྨ་ཀུང་ཧྲེ་སྟག་ཆེན་སྐེ་ནས་ཡིན་ཞིང། ཕྱི་ལོ་ ༢༠༠༩ ལོའི་ཕྱི་ཟླ་དྲུག་པའི་ནང་ཁམས་འཇོ་མདའ་སྐྱབས་ཆེ་དགོན་དུ་རྒྱ་གཞུང་གིས་རྒྱལ་གཅེས་ཆོས་གཅེས་ཟེར་བའི་ལས་འགུལ་སྤེལ་ཏེ་༸གོང་ས་མཆོག་ལ་མཚན་སྨད་ཞུས་དགོས་པའི་མིང་རྟགས་བསྡུ་རུབ་བྱས་པར་དགེ་འདུན་པ་སུ་ཞིག་གིས་མིང་རྟགས་མ་བཀོད་པ་མ་ཟད། གནད་དོན་དེ་ནས་གཡོལ་ཆེད་ས་ཕྱོགས་གང་སར་བྲོས་བྱོལ་དུ་ཕྱིན་ནས་ཟླ་ངོ་གཅིག་རིང་དགོན་པར་དགེ་འདུན་པ་གཅིག་ཀྱང་མེད་པའི་གནས་སུ་གྱར་ཡོད། གནས་ཚུལ་འདི་ནི་ལྔ་བཅུ་ང་དགུའི་རྗེས་དགོན་པ་སྟོང་པར་གྱུར་བའི་གནས་ཚུལ་ཐེངས་དང་པོ་དེ་ཡིན་འདུག གོང་གསལ་མི་ངོ་རྣམས་སྐབས་དེར་རྒྱ་གཞུང་ཉེན་རྟོག་མི་སྣས་གྲོང་ཚོའི་འགོ་ཁྲིད་ལ་ཁོང་རྣམ་ཆེད་འགུག་གིས་དགོན་པའི་དགེ་འདུན་པ་གང་དུ་ཡོད་ན། ཆ་ཚང་རྩིས་སྤྲོད་དགོས་པའི་བཙན་བཀའ་བཏང་བར་ངོས་ལེན་མ་བྱས་པའི་ཉེས་མིང་འོག་ བཙོན་འཇུག་བྱས་ཏེ་ལོ་ལྔའི་ཁྲིམས་ཐག་བཅད་པ་ཞིག་ཡིན་འདུག་ལ། དེ་ནས་བཟུང་བོད་ལྗོངས་སྤོ་བོ་རྫོང་གི་བཙོན་ཁང་དུ་བཙོན་འཇུག་གིས་སྡུག་སྦྱོང་མནར་གཅོད་ཚད་མེད་བཏང་རྐྱེན་ལོ་སྔོན་མ་ནས་ཁོང་གི་སྐུ་གཟུགས་ཀྱི་གནས་སྟངས་ཇེ་སྡུག་ཏུ་ཕྱིན་ཡང་ནང་མི་སྤུན་མཆེད་སོགས་ལ་ད་བར་ཐུག་ཕྲད་བྱེད་བཅུག་མེད། གོང་ཚེས་ཉིན་ཁོང་དགོང་མོ་བཙོན་ཁང་ནས་ལྷ་སའི་སྨན་ཁང་དུའཁྲིད་ཡོད་ཀྱང་དྲག་ སྐྱེད་གང་ཡང་མ་བྱུང་བར་ཕྱི་ལོ་ ༢༠༡༡ ལོའི་ ༣ ཚེས་ ༢༥ ཉིན་གྱི་ལྷ་སའི་ཆུ་ཚོད་ ༡༢ དང་ཕྱེད་ཐོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག
