༢༠༡༡ ཟླ་ ༣ ཚེས་ ༡༧ རེས་གཟའ་ཕུར་བུ།
༅༅། །ཕྱི་ལོ་ ༢༠༡༡ ཟླ་ ༣ ཚེས་ ༡༥ ཉིན་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༡༦ པའི་ཐོག་འཇིག་ཉེན་མི་རིགས་སྲུང་སྐྱོབ་ཚོགས་པས་(Society for Threatened People) བསྒྲགས་གཏམ་ཞིག་སྤེལ་བ་དེ་ཚོགས་པ་དེའི་ཚབ་ཞུས་ཏེ་བསྟན་འཛིན་བསམ་འཕེལ་ལགས་ཀྱིས་སྒྲོགས་སྦྱང་གནང་ཡོད། བསྒྲགས་གཏམ་དེའི་ནང་ཕྱི་ལོ་ ༢༠༠༨ ལོར་བོད་ས་ཡོངས་ལ་ཞི་བའི་གྱེན་ལངས་རྒྱ་ཆེ་བྱུང་བ་ནས་བཟུང་བོད་མི་ཚོས་ཚད་ལས་འདས་པའི་སྡུག་སྦྱོངས་མྱངས་དང་མྱོང་བཞིན་པ་དང། རྒྱ་ནག་དམག་དཔུང་གིས་བོད་མི་མང་པོ་འཛིན་བཟུང་བྱས་ཏེ་བཙོན་འཇུག་བྱས་ཏེ་མནར་གཅོད་ཚད་མེད་གཏོང་གི་ཡོད་པ་མ་ཟད། བོད་མི་མང་པོ་ཞིག་གསང་བའི་ཐོག་འཛིན་བཟུང་བྱས་པ། དེ་བཞིན་མང་དག་ཅིག་གར་སོང་ཆ་མེད་དུ་གྱུར་བ། ཕྱོགས་མཚུངས་བོད་མི་ཚོར་ཁྲིམས་རྩོད་ཀྱི་རང་དབང་མེད་པ་སོགས་བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་སྐོར་དང། བོད་ནང་གི་འབྲོག་པ་ཚོ་སྐྱས་སྤོ་བྱེད་ཏུ་བཅུག་པའི་རྒྱ་ནག་གཞུང་གི་སྲིད་བྱུས་ཀྱི་རྐྱེན་པས་བོད་ཀྱི་འབྲོག་པའི་གནའ་རབས་མི་ཚེ་སྐྱེལ་སྟངས་ཀྱི་ལམ་སྲོལ་རྩ་གཏོར་འགྲོ་གི་ཡོད་པ་མ་ཟད། འབྲོག་པ་རྣམས་ལ་དཔལ་འབྱོར་ཐོག་ནས་དཀའ་ངལ་ཡང་འཕྲད་བཞིན་ཡོད། གཞན་ཡང་རྒྱ་ནག་གཞུང་གིས་བོད་ཀྱི་བླ་སྤྲུལ་ངོས་འཛིན་བྱེད་ཕྱོགས་ཐོག་ཐེ་བྱུས་བྱེད་ཀྱི་ཡོད་ཁར། བོད་ཀྱི་དགོན་སྡེ་ཁག་ནང་གྲྭ་བཙུན་ཚོར་ནང་པའི་ལྟ་གྲུབ་དང་ཚན་རིག་སོགས་ཀྱི་སློབ་གཉེར་བྱེད་རྒྱུར་དོ་དམ་ནན་པོ་བྱས་དང་བྱེད་བཞིན་ཡོད་པ། དེ་མིན་བོད་ནང་རྒྱལ་གཅེས་ཆོས་གཅེས་ཟེར་བའི་སློབ་གསོ་ལས་གཞིའི་འོག་བོད་མི་ཚོར་བཙན་དབང་གིས་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུ་རུ་བཅུག་གི་ཡོད། ཅེས་སོགས་ཀྱི་སྐོར་འཁོད་ཡོད།
ཡང་ཕྱི་ཚེས་ ༡༦ ཉིན་ལྷན་ཚོགས་དེའི་ཐོག་མཁས་དབང་ཁག་གཅིག་གིས་རྒྱ་ནག་གིས་བཙན་དབང་འོག་ཡོད་པའི་བོད་མི་རྣམས་སོ་སོའི་ཕ་མེས་ཀྱི་ཁྱིམ་གཞི་ནས་ཕྱིར་འབུད་བཏང་བར་བརྟེན་གྲོང་ཁྱེར་ནང་དབུལ་པོ་ཇེ་མང་དུ་ཕྱིན་ཡོད། དེ་ཡང་ཧ་གྷི་(Hague) ནང་ཡོད་པའི་སྤྱི་ཚོགས་རིག་གནས་བསྟི་གནས་ཁང་གི་སློབ་དཔོན་ཨན་ཌི་ཡུ་ཕི་ཤར་Prof.Andrew Fisher ལགས་ཀྱིས་བོད་ནང་གི་འབྲོག་པ་རྣམས་གྲོང་ཁྱེར་དུ་སྤོ་རུ་བཅུག་ཀྱང་ཁོང་རྣམས་ལ་གྲོང་ཁྱེར་ནང་ལས་ཀ་རག་རྒྱུ་ཁག་པོ་ཆགས་པར་བརྟེན་གྲོང་ཁྱེར་ནང་དབུལ་ཕོངས་མང་དུ་ཕྱིན་ཡོད། ཅེས་གསུངས་ཡོད། དེ་བཞིན་ཕྱི་ཚེས་ ༡༥ ཉིན་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༡༦ ཚོགས་སྐབས་གཞུང་འབྲེལ་མ་ཡིན་པའི་ཚོགས་པ་གཉིས་ཀྱིས་གོ་སྒྲིག་ཐོག་༼རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་རྒྱ་ནག་གཞུང་ནས་བོད་ཀྱི་འབྲོག་པ་རྣམས་ལ་འཛིན་པའི་སྲིད་བྱུས་ཀྱི་ཤུགས་རྐྱེན།༽ཞེས་པའི་བརྗོད་གཞིའི་ཐོག་གླེང་སློང་བྱེད་སྐབས་སློབ་དཔོན་ཨན་ཌི་ཡུ་ཕི་ཤར་ལགས་ཀྱིས་འབྲོག་པ་རྣམས་སོ་སོའི་ཕ་མེས་ཀྱི་ཁྱིམ་གཞི་ནས་གྲོང་ཁྱེར་ནང་གནས་སྤོས་བྱེད་རྒྱུ་དེར་བློ་འཚབ་ཡོད། རྒྱ་ནག་ཧན་མི་རིགས་མང་པོ་ཞིག་བོད་ཀྱི་གྲོང་ཁྱེར་ནང་སྤོས་བཞུད་བྱས་པར་བརྟེན་དཔལ་འབྱོར་ཐོག་རྒྱ་མི་རིགས་ཀྱིས་དབང་སྒྱུར་བྱེད་ཀྱི་ཡོད། ཅེས་སོགས་གསུངས་ཡོད། གཞན་ཡང་ཕྱི་ཟླ་ ༣ ཚེས་ ༡༤ ཉིན་ཧན་གྷ་རིའི་སྐུ་ཚབ་ཨེནཌ་རས་ཌི་ཀ་ནི་(Andras Dekany) ལགས་ཀྱིས་ཡུ་རོབ་སྤྱི་མཐུན་རྒྱལ་ཁབ་ཀྱི་ཚབ་ཞུས་ཏེ་བརྗོད་དོན། གྲངས་ཉུང་མི་རིགས་དང་ཆོས་ལུགས་ཀྱི་ཐོབ་ཐང་དེ་བོད་དང་ཤིན་ཅང་ནང་ཇི་ལྟར་ཡོད་མེད་ཡོངས་གྲགས་རེད། དེར་བརྟེན་དེ་དག་རྒྱ་ནག་གཞུང་གི་རྩ་ཁྲིམས་གཞིར་བཟུང་ཐོབ་ཐང་ཇི་ཡོད་སྤྲོད་དགོས་ཞེས་གསུངས་ཡོད། དེ་བཞིན་ཕྱི་དྲིལ་ཁོར་ཡུག་ཚན་པའི་ལས་བྱེད་འཇིགས་མེད་ནོར་བུ་ལགས་ཀྱིས་བོད་ཀྱི་ཁོར་ཡུག་ཉམས་ཆག་འགྲོ་ཉེན་ཅན་དུ་གྱུར་ཡོད་པ་དེར་བོད་མི་རྣམས་ཀྱི་བློ་འཚབ་ཡོད་པ་དང། བོད་ནང་གི་འཁྱགས་རོམ་བཞུར་ཚད་དེ་ལོ་རེར་བརྒྱ་ཆ་བདུན་བཞུར་བཞིན་པ། གལ་ཏེ་ད་ལྟའི་འཁྱགས་རོམ་བཞུར་ཚད་དེ་དག་མུ་མཐུད་ན་ཕྱི་ལོ་ ༢༠༥༠ བར་བོད་ནང་གི་འཁྱགས་རོམ་གསུམ་ཆ་གཉིས་མེད་པ་ཆགས་རྒྱུ་ཡིན་པ་མ་ཟད། ཕྱི་ལོ་ ༢༡༠༠ ནང་བོད་ནང་གི་འཁྱགས་རོམ་ཡོངས་རྫོགས་མེད་པ་ཆགས་རྒྱུ་ཡིན་སྐོར་འགྲེལ་བརྗོད་བྱས་ཡོད། དེ་བཞིན་ཁོང་གིས་པར་རིགས་བརྒྱུད་ཇོ་མོ་གླང་མའི་ཉེ་འདབས་སུ་ཡོད་པའི་རོང་སྦུག་འཁྱགས་རོམ་ལོ་རེ་བཞིན་ཇེ་ཉུང་དུ་འགྲོ་གི་ཡོད་སྐོར་སོགས་ཚོགས་བཅར་བ་ཚོར་དེ་སྔའི་འདྲ་པར་དང་ཉེ་དུས་ཀྱི་འདྲ་པར་ལམ་ནས་གསལ་སྟོན་བྱས་ཡོད་པ་བཅས།།
