༢༠༡༡ ཟླ་ ༣ ཚེས་ ༡༤ རེས་གཟའ་ཟླ་བ།
༅༅། །ཕྱི་ལོ་ ༢༠༡༡ ཟླ་ ༣ ཚེས་ ༡༤ ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང། ཚོགས་གཞོན་རྒྱ་རི་སྒྲོལ་མ་མཆོག བཙན་
བྱོལ་བོད་གཞུང་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་རྣམ་པ་དབུ་བཞུགས་ཐོག་སྤྱི་འཐུས་ཚོགས་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ཐོག་སྩལ་བའི་གསུང་འཕྲིན་དང་འབྲེལ་བའི་གསར་འགོད་གསལ་བསྒྲགས་ཤིག་སྤེལ་ཡོད། དེ་ཡང་༸གོང་ས་མཆོག་གིས་གྲོས་ཚོགས་སུ་སྩལ་བའི་གསུང་འཕྲིན་གྱི་ནང་དོན་སྙིང་མདོར་བསྡུས་ཤིག་ཐོག་མར་སྤྱི་འཐུས་ཚོགས་གཙོ་མཆོག་གིས་དེར་འདུས་གསར་འགོད་པར་འགྲེལ་བརྗོད་གནང་དོན། གསུང་འཕྲིན་གྱི་ཆ་ཤས་དང་པོ་ནི་འདས་པའི་ལོ་ཆིག་ཁྲི་ཉིས་སྟོང་རིང་གི་བོད་ཀྱི་རྒྱལ་རབས་ལོ་རྒྱུས་ལུང་འདྲེན་མཛད་ཡོད་པ་དང། གསུང་འཕྲིན་གྱི་ཆ་ཤས་གཉིས་པ་ནི་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་མ་ཕེབས་གོང་ནས་བོད་དེ་མང་གཙོ་ཡང་དག་གཅིག་ཏུ་བསྒྱུར་རྒྱུའི་སྐོར་ཡིན། གསུང་འཕྲིན་གྱི་ཆ་ཤས་གསུམ་པ་ནི། བཅའ་ཁྲིམས་གཙོ་བོ་གྱུར་བའི་ཁྲིམས་སྒྲིག་ཁག་ལ་བསྒྱུར་བཅོས་བཏང་ནས་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་འགན་འཁྱེར་དགོས་པའི་༸གོང་ས་མཆོག་གི་བཞེད་དགོངས་སྐོར་ཡིན། བསྒྱུར་བཅོས་དེ་དག་བྱུང་མཚམས་༸གོང་ས་མཆོག་གིས་སྩལ་བའི་ཆབ་སྲིད་ཡིག་ཆ་དང་གསུང་འཕྲིན་འགའ་ཤས་ནུས་མེད་དུ་འགྲོ་རྒྱུ་དང་། དགའ་ལྡན་ཕོ་བྲང་ཞེས་པའི་མིང་བྱང་ཡང་སྐབས་བསྟུན་བསྒྱུར་བ་གཏོང་དགོས་སྐོར་སོགས་འཁོད་ཡོད། ཅེས་ཡིན་ཞེས་འགྲེལ་བརྗོད་གནང། ཡང་ཚོགས་གཙོ་མཆོག་གིས་གྲོས་ཚོགས་ཀྱི་བརྒྱུད་རིམ་ལྟར་ན་སང་ཉིན་གྲོས་ཚོགས་འཐུས་མི་ཡོངས་རྫོགས་ནས་༸གོང་ས་མཆོག་གི་གསུང་འཕྲིན་སྩལ་བའི་ཐོག་གྲོས་བསྡུར་དང་སོ་སོའི་བསམ་ཚུལ་འདོན་རྒྱུའི་གོ་སྐབས་འབུལ་རྒྱུ་ཡིན། དེ་བཞིན་སང་ཉིན་ཕྱི་དྲོ་བར་གྲོས་ཚོགས་ཀྱི་ཐག་གཅོད་ཐུབ་པའི་རེ་བ་དང་ཐག་གཅོད་དེར་བརྟེན་ནས་ང་ཚོོས་ལག་བསྟར་བྱེད་རྒྱུ་ཡིན། ཕལ་ཆེར་ཚོགས་ཆུང་ཁག་གི་ཐུགས་ཞིབ་བྱས་རྗེས་ངོས་ནས་ཚོད་དཔག་བྱས་ན་གནད་དོན་གསུམ་ཙམ་ཞིག་ཡོང་སྲིད་པ་ཞིག་མཐོང་གི་འདུག དང་པོ་ནི། གྲོས་ཚོགས་ཀྱི་ཚོགས་མི་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་མུ་མཐུད་ཆོས་སྲིད་གཉིས་ཀྱི་ཐུགས་འགན་བཞེས་པའི་ཐོག་
བསྒྱུར་བཅོས་གང་ཡང་གཏོང་མི་དགོས་པའི་ཐག་གཅོད་གནང་སྲིད་པ་དང། གཉིས་པ་ནི། ང་ཚོས་མགོན་པོ་གང་ཉིད་མཆོག་གི་གསུང་འཕྲིན་ནང་གསལ་ལྟར་ངོས་ལེན་བྱས་ཏེ་བསྒྱུར་བཅོས་གཏོང་རྒྱུར་མོས་མཐུན་གནང་སྲིད། གསུམ་པ་ནི་མགོན་པོ་གང་ཉིད་མཆོག་གིས་མུ་མཐུད་ཆབ་སྲིད་ཀྱི་ཐུགས་འཁུར་བཞེས་རྒྱུ་དང་མི་མང་གིས་འོས་འདེམས་བྱས་པའི་སྐུ་ཚབ་དེའི་འཛིན་སྐྱོང་གི་ལས་དོན་ཐོག་འགན་བཞེས་རྒྱུའི་ལམ་དབུ་མ་ཞིག་འཚོལ་ཐབས་བྱེད་སྲིད་པ་རེད། འོན་ཀྱང་ངས་མཐའ་མའི་ཐག་གཅོད་ཐོག་ཏག་ཏག་ཅིག་བརྗོད་མི་ཐུབ། གལ་ཏེ་གྲོས་ཚོགས་འཐུས་མི་རྣམས་ནས་༸གོང་ས་མཆོག་གི་གསུང་འཕྲིན་ནང་གསལ་ལྟར་མོས་མ྄ཐུན་གནང་ན་ཚོགས་ཆུང་གཅིག་ཟུར་འཛུགས་དགོས་པ་དང་། དེ་ནི་བརྒྱུད་རིམ་རིང་པོ་ཞིག་འགོར་རྒྱུ་ཡིན་པས་སྐབས་བཅུ་བཞི་པའི་གྲོས་ཚོགས་འདི་བཞིན་མཇུག་སྒྲིལ་ལ་ཉེ་བས་སྐབས་འདིའི་ཐོག་ཐག་གཅོད་ཐུབ་དཀའ་བས་གྲོས་ཚོགས་སྐབས་བཅོ་ལྔ་པར་༸གོང་ས་མཆོག་གི་གསུང་འཕྲིན་མཇུག་སྐྱོང་དང་ལག་བསྟར་གནང་རྒྱུའི་འགན་ཡོད་ཅེས་སོགས་གསུངས་ཡོད། དེ་རྗེས་གསར་འགོད་པ་ཁག་གཅིག་གིས་དྲི་བར་བཀའ་ཁྲི་མཆོག་གིས་དབུས་ཚོགས་གཙོ་དང་ཚོགས་གཞོན་གྱིས་ཀྱང་ཁོང་ཚོའི་དྲི་བར་ལན་འདེབས་གནང་ཡོད་པ་བཅས།།
