༢༠༡༡ ཟླ་ ༣ ཚེས་ ༢༢ རེས་གཟའ་མིག་དམར།
༄༅། །འདི་གར་བོད་གཞུང་ཨ་རིའི་སྐུ་ཚབ་དོན་ཁང་ནས་རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན། ཉེ་ཆར་ཨ་རི་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཨ་རིའི་ས་གནས་ཁག་གཅིག་ལ་ལས་དོན་ཆེད་གཞུང་དོན་ཕྱོགས་བསྐྱོད་དུ་ཕེབས་ཡོད་པ་དང་། སྐབས་དེར་ས་གནས་དེ་གར་ཡོད་པའི་བོད་རིགས་སྤྱི་མཐུན་ཚོགས་པའི་རྒྱུན་ལས་དང་མཇལ་འཛོམས་གནང་ཡོད་ཅིང་། མང་ཚོགས་ལ་གསུང་བཤད་ཀྱང་གནང་ཡོད། ཕྱི་ཟླ་ ༣ ཚེས་ ༡༣ ཉིན་སྐུ་ཚབ་དོན་གཅོད་ནས་བྱང་ཁ་ལི་ཕོར་ནི་ཡ་ས་གནས་བོད་རིགས་སྤྱི་མཐུན་ཚོགས་པའི་སྤྱི་ཁང་གསར་པར། ཚོགས་པའི་རྒྱུན་ལས་རྣམས་དང་མཇལ་འཕྲད་གནང་ཞིང་། ས་གནས་སྤྱི་མཐུན་ཚོགས་པའི་ཚོགས་གཙོ་སྐལ་རྡོར་དབུ་དཀར་ཚང་ནས་ས་གནས་མང་ཚོགས་རྣམས་ལ་ཐོག་མའི་ངོ་སྤྲོད་ཀྱི་གསུང་བཤད་གནང་། སྐུ་ཚབ་དོན་གཅོད་ཀྱིས་ས་གནས་མང་ཚོགས་རྣམས་ལ་གསུང་བཤད་གནང་སྐབས། བཙན་བྱོལ་བོད་གཞུང་གི་དབུ་མའི་ལམ་གྱི་སྲིད་བྱུས་ཀྱི་སྔ་ཕྱིའི་བྱུང་རིམ་ལོ་རྒྱུས་དང་། ད་ལྟའི་གནས་སྟངས་སྐོར་གསུངས་པ་མ་ཟད། བཀའ་ཤག་ནས་དབུ་མའི་ལམ་གྱི་སྲིད་བྱུས་ཀྱི་བྱུང་རིམ་ལོ་རྒྱུས་མང་ཚོགས་ནས་གསལ་རྟོགས་དགོས་རྒྱུ་དེ་ནི་ཧ་ཅང་གི་གལ་ཆེར་གཟིགས་ཀྱི་ཡོད་པའི་སྐོར། ལོ་ཤས་སྔོན་བཞུགས་སྒར་དུ་སྐོང་ཚོགས་གནང་བའི་དམིགས་བསལ་ཚོགས་ཆེན་སྐབས་དབུ་མའི་ལམ་གྱི་སྲིད་བྱུས་ལ་མང་མོས་ཀྱིས་རྒྱབ་སྐྱོར་ཐོབ་ཡོད་པའི་སྐོར་ལ་ཞིབ་ཕྲ་འགྲེལ་བརྗོད་གནང་ཡོད། དེ་ནས་སྐུ་ཚབ་དོན་གཅོད་ཀྱིས་ས་གནས་མང་ཚོགས་ལ་དབུ་མའི་ལམ་གྱི་སྐོར་གསུང་བཤད་མ་གནང་གོང་སྤྱི་མཐུན་ཚོགས་པའི་རེས་གཟའ་ཉི་མའི་བོད་ཡིག་སློབ་གྲྭའི་འབྲེལ་ཡོད་མི་སྣ་དང་ལྷན་དུ་མཇལ་འཕྲད་གནང་ཞིང་། སློབ་གྲྭའི་འགན་འཛིན་ཨོ་རྒྱན་ཚེ་རིང་ལགས་དང་། འབྲེལ་ཡོད་ལས་བྱེད་ནས་སློབ་གྲྭའི་བྱེད་སྒོའི་སྐོར་དང་། རྩིས་ཁྲའི་སྐོར། གདོང་ལེན་བྱེད་དགོས་པའི་གནད་དོན་གང་ཞིག་ཡོད་མེད་སྐོར། སློབ་གྲྭ་ཡར་རྒྱས་གཏོང་འཆར་གྱི་སྐོར་སོགས་ངོ་སྤྲོད་སྙན་སེང་གནང་ཡོད། ཡང་ཕྱི་ཚེས་ ༡༦ ཉིན་སྐུ་ཚབ་དོན་གཅོད་མཆོག་ནས་མི་ནི་སུད་ཊར་ས་གནས་བོད་རིགས་སྤྱི་མཐུན་ཚོགས་པའི་རྒྱུན་ལས་དང་ཐུག་འཕྲད་གནང་ཡོད། མི་ནི་སུ་ཊར་ནི་བྱང་ཨ་རིའི་ནང་གི་བོད་རིགས་སྤྱི་མཐུན་ཚོགས་པ་ཆེ་ཤོས་གཉིས་པ་དེ་ཆགས་ཡོད། སྐུ་ཚབ་དོན་གཅོད་ཀྱིས་ས་གནས་དེར་ཡང་གོང་བཞིན་དབུ་མའི་ལམ་གྱི་སྐོར་ས་གནས་མང་ཚོགས་ལ་ངོ་སྤྲོད་གསུང་བཤད་གནང་ཡོད་པ་མ་ཟད། བྱང་ཨ་རིའི་ནང་ཡོད་པའི་བོད་རིགས་སྤྱི་མཐུན་ཚོགས་པ་ཁྱོན་ཡོངས་ཀྱི་གནས་སྟངས་ཀྱང་ངོ་སྤྲོད་མདོར་བསྡུས་གནང་ཡོད། ཨ་རི་སྐུ་ཚབ་དོན་གཅོད་ཁང་གིས་ཐེངས་འདིའི་གོ་སྐབས་བསྟུན་ནས་བོད་མི་འདུས་སྡོད་མང་བའི་གོང་གསལ་ས་གནས་གཉིས་ལ་རང་གཞུང་ཕྱི་འབྲེལ་ལས་ཁུངས་ནས་པར་སྐྲུན་གནང་བའི་དབུ་མའི་ལམ་གྱི་སྲིད་བྱུས་ཀྱི་ངོ་བོ་དང་། བྱུང་རབས་ལོ་རྒྱུས་ཞེས་པའི་ཕྱག་དེབ་འགྲེམས་སྤེལ་ཞུས་ཡོད།།