༢༠༡༡ ཟླ་ ༣ ཚེས་ ༩ རེསགཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༣ ཚེས་ ༩ ཉིན་བོད་གཞུང་འཕྲོད་བསྟེན་ལས་ཁུངས་ནས་བོད་གཞུང་ཕྱི་དྲིལ་ལས་ཁུངས་ལྷག་པ་ཚེ་རིང་དྲན་རྟེན་ཚོགས་ཁང་དུ་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་སྐོར་ལ་གསར་འགོད་གསལ་བསྒྲགས་སྐོང་ཚོགས་གནང་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་བོད་གཞུང་འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག་དང།
དྲུང་ཆེ་ཕ་ཟུར་དབང་ཕྱུག་ལགས། དྲུང་འཕར་སྟོབས་རྒྱལ་ཚེ་རིང་ལགས། དྲུང་གཞོན་བསྟན་འཛིན་དོན་ཡོད་ལགས་བཅས་ནས་རྡ་སའི་ཁུལ་གྱི་རང་རིགས་གསར་ལམ་ཁག་གི་གསར་འགོད་པ་ ༢༠ བརྒལ་བ་ལྷན་འཛོམས་བྱུང་བ་རྣམས་ལ་ཐོག་མར་འཕྲོད་བསྟེན་བཀའ་བློན་མཆོག་གིས་གསར་འགོད་གསལ་བསྒྲགས་མ་གནང་གོང་ལས་གཞི་དེའི་སྐོར་ལ་ངོ་སྤྲོད་གསུང་བཤད་གནང་དོན། འདི་གར་ཕེབས་པའི་རྣམ་པ་ཚང་མར་ངས་བོད་གཞུང་འཕྲོད་བསྟེན་ལས་ཁུངས་ཀྱི་ཚབ་ཞུས་ཏེ་བོད་རྒྱལ་ལོ་ ༢༡༣༨ ལྕགས་ཡོས་གནམ་ལོ་གསར་ཚེས་ལ་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་འདིར་རྣམ་པ་ཚོ་ཕེབས་རོགས་ཞུ་རྒྱུ་དེ་བོད་གཞུང་འཕྲོད་བསྟེན་ལས་ཁུངས་ཀྱི་ལས་གཞི་གལ་ཆེན་པོ་ཞིག་གསལ་བསྒྲགས་ཞུ་ཆེད་ཡིན། འཕྲོད་བསྟེན་ལས་ཁུངས་ཀྱི་ངོས་ནས་བཙན་བྱོལ་བོད་མི་སྤྱི་ལ་ཁྱབ་པའི་ཉེན་སྲུང་ལྟ་བུ་སྨན་བཅོས་ལྟ་སྐྱོང་གི་ལས་གཞི་ཕྱི་ལོ་ ༢༠༡༡ ཟླ་ ༤ ཚེས་ ༡ ནས་འགོ་འཛུགས་ཀྱིས་ཕྱི་ཟླ་ ༡༠ ཚེས་ ༡ བར་ཟླ་དྲུག་ནང་ཚུད་ལ་ཆ་ཚང་མང་ཚོགས་ལ་གསལ་བསྒྲགས་དང་ཆབས་ཅིག་ལས་དོན་འདི་ཡང་ཟླ་དྲུག་ནང་ཚུད་བསྒྲུབ་ཐུབ་པའི་ཆེད་དེ་རིང་གསར་འགོད་གསལ་བསྒྲགས་འདི་སྐོང་ཚོགས་བྱས་པ་ཞིག་ཡིན། དེ་ཡང་བྱུང་རིམ་ལོ་རྒྱུས་ནས་བཤད་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་འོག་བཙན་བྱོལ་བོད་གཞུང་འཕྲོད་བསྟེན་ལས་ཁུངས་གསར་འཛུགས་བསྐྱངས་པ་ནས་བཟུང་དུས་ད་ལྟ་བར་དུ་འཕྲོད་བསྟེན་ལས་ཁུངས་དབུས་ས་གཉིས་ཀྱི་ལས་བྱེད་ཆེ་ཕྲ་ཡོངས་ཀྱི་ལྷག་བསམ་དང་ཧུར་བརྩོན་ལ་བརྟེན་ནས་བོད་མིའི་འཕྲོད་བསྟེན་གྱི་གནས་སྟངས་གང་ལ་གང་ཙམ་ཡག་པོ་ཡོད་ཅེས་བརྗོད་ཆོག་པ་ཞིག་ཡིན། ད་ལྟའི་ཆ་ནས་བོད་གཞུང་འཕྲོད་བསྟེན་ལས་ཁུངས་ཀྱི་གཟིགས་རྟོག་འོག་ཡོད་པའི་བོད་མིའི་འཕྲོད་བསྟེན་གྱི་གནས་སྟངས་གཞི་རིམ་འཕྲོད་བསྟེན་གྱི་ལྟ་སྐྱོང་གང་ཙམ་ཚད་མཐོན་པོར་བསླེབས་པ་ལྟ་བུ་ཆགས་ཡོད། དེར་བརྟེན་མ་དང་བྱིས་པའི་ལས་གཞི་གཙོ་བོར་གྱུར་བའི་སྔོན་འགོག་གི་ལས་གཞི་དེ་དག་ཆ་ཚང་བ་ཞིག་ཡག་པོ་འགྲོ་མུས་ཡིན། ཕྱི་ལོ་ ༡༩༦༠ སྨད་དང་ ༧༠ སྟོད་བོད་མི་བརྒྱ་ཆ་སུམ་ཅུ་ཙམ་ཞིག་གློ་ནད་(T.B)ནད་མནར་རང་བཞིན་ཅན་དུ་གྱུར་འདུག གང་ལྟར་བཙན་བྱོལ་བོད་མིའི་གཞི་རིམ་འཕྲོད་བསྟེན་གྱི་གནས་སྟངས་དེ་གང་ཙམ་གྱི་ཚགས་ཚུད་པོ་བྱུང་ཡོད་ནའང། ནད་གཞིའི་ཚབས་ཆེན་ཆགས་ཏེ་སྨན་ཁང་དུ་ཛ་དྲག་བསྟེན་དགོས་རིགས་བྱུང་སྐབས་འགྲོ་སོང་ཆེན་པོ་གཏོང་དགོས་པ་ཆགས་ཀྱི་ཡོད། སྒེར་སོ་སོའི་ངོས་ནས་འགྲོ་སོང་ཆེན་པོ་རེད་ལ་བོད་གཞུང་གི་ངོས་ནས་ཀྱང་ཛ་དྲག་གི་སྨན་བཅོས་ལ་མཐུན་འགྱུར་བརྒྱ་ཆ་གང་ཙམ་ཞིག་གནང་དང་གནང་མུས་རེད། དེར་བརྟེན་བཙན་བྱོལ་བོད་མི་ཡོངས་ལ་གཞི་རིམ་གཉིས་པ་དང་གསུམ་པའི་སྨན་བཅོས་ལྟ་སྐྱོང་སྤྱི་སྙོམས་ཡོང་བ་ཞིག་བྱུང་ན་བསམ་བཞིན་ཡོད། དེ་བཞིན་བོད་མིའི་དང་བླངས་འཕྲོད་བསྟེན་ཚོགས་པ་དེ་བཞིན་དེབ་སྐྱེལ་བྱས་པ་ཞིག་ཆགས་ཡོད། དེབ་སྐྱེལ་བྱས་པའི་ཚོགས་པ་དེའི་ཁྲིམས་སྒྲིག་གི་འོག་བོད་མི་ཡོངས་ལ་ཁྱབ་ཐུབ་རྒྱུའི་སྨན་བཅོས་ལྟ་སྐྱོང་གི་ལས་གཞི་ཞིག་བྱུང་ན་སྙམ་སྟེ་རྣམ་པ་ཚོར་གསལ་བསྒྲགས་བྱེད་རྒྱུ་འདི་ལྟ་བུ་ཞིག་གཏན་འཁེལ་བ་ཡིན་ཞེས་སོགས་ཀྱི་གསུང་བཤད་གནང་། དེ་ནས་བོད་གཞུང་འཕྲོད་བསྟེན་ལས་ཁུངས་ནས་སྤེལ་བའི་གསར་འགོད་གསལ་བསྒྲགས་ནང་འཁོད་དོན།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་འོག་བཙན་བྱོལ་བོད་གཞུང་འཕྲོད་བསྟེན་ལས་ཁུངས་གསར་འཛུགས་བསྐྱངས་པ་ནས་བཟུང་དབུས་ས་གཉིས་ཀྱི་འཕྲོད་བསྟེན་ལས་བྱེད་ཆེ་ཕྲ་ཡོངས་ཀྱི་ལྷག་བསམ་དང་ཧུར་བརྩོན་ལ་བརྟེན་ནས་བོད་མིའི་སྡོད་སྒར་ཁག་གི་ནང་དགོས་ངེས་ཀྱི་གཞི་རིམ་འཕྲོད་བསྟེན་ལྟ་སྐྱོང་གི་རྨང་གཞི་འཛུགས་སྐྲུན་(Primary Healthcare Services) གང་ལེགས་ཐུབ་སྟེ། ད་ཆ་བཙན་བྱོལ་བོད་མིའི་གཞི་རིམ་འཕྲོད་བསྟེན་གནས་བབས་འོས་འཚམས་ཡོད་རུང། ནད་གཞི་ཚབས་ཆེའི་དབང་གིས་སྨན་ཁང་ནང་ཡུན་རིང་བཅོས་སྡོད་དགོས་པའི་གཞི་རིམ་གཉིས་པ་དང་གསུམ་པའི་སྨན་བཅོས་བྱ་དགོས་རིགས་(Secondary Treatment and Tertiary Treatment)ས་གནས་ཕྱིའི་སྨན་ཁང་འདྲ་མིན་དུ་བསྟེན་གཏུགས་བྱ་དགོས་ཀྱིས་འགྲོ་གྲོན་དཀའ་ངལ་འཕྲད་བཞིན་པ་རྣམས་ལ་འཕྲོད་བསྟེན་ལས་ཁུངས་ནས་སྨན་གྲོན་བརྒྱ་ཆ་གང་ཙམ་རེ་གནང་སྲོལ་ཡོད་ཀྱང་། གཞུང་གྲོན་ཆེ་ལ་མང་ཚོགས་ལ་ཕན་ཐོགས་ཆ་ཚང་མེད་པར་ཞིག་ཏུ་ཉམས་མྱོང་དངོས་བྱུང་ལ་བརྟེན། ད་ཆ་བཙན་བྱོལ་བོད་མི་ཡོངས་ལ་གཞི་རིམ་གཉིས་པ་དང་གསུམ་པའི་སྨན་བཅོས་ལྟ་སྐྱོང་སྤྱི་སྙོམས་ཡོང་སླད་བོད་མིའི་དང་བླངས་འཕྲོད་བསྟེན་ཚོགས་པའི་དམིགས་ཡུལ་ལྟར་འཕྲོད་བསྟེན་ཉེན་སྲུང་ལྟ་བུའི་ཛ་དྲག་སྨན་བཅོས་ཉེན་སྐྱོབ་ཀྱི་ལས་གཞི་ཞིག་གཞུང་མང་མཉམ་རུབ་ཀྱིས་ལག་བསྟར་བྱ་རྒྱུར་བཀའ་ཤག་ནས་བོད་མིའི་སྨན་བཅོས་ལྟ་སྐྱོང་ལས་གཞི། ཞེས་པ་གཏན་འབེབས་བཀའ་འཁྲོལ་དང་སྦྲགས་ལམ་སྟོན་ཕེབས་པ་བཞིན། ཕྱི་ལོ་ ༢༠༡༡ ཟླ་ ༤ ཚེས་ ༡ ནས་འགོ་འཛུགས་ཀྱིས་ཕྱི་ཟླ་ ༡༠ ཚེས་ ༡ བར་ཟླ་དྲུག་ནང་ཚུད་ཐོ་འགོད་དེབ་སྐྱེལ་ཐུབ་པ་བྱས་ཏེ། ཕྱི་ཟླ་ ༡༠ ཚེས་ ༡ ནས་ལས་གཞི་དངོས་སུ་འགོ་འཛུགས་བྱ་རྒྱུ་ཡིན། ལས་གཞི་འདི་ནི་དེང་དུས་དང་མཐུན་ཞིང་གསར་གཏོད་རང་བཞིན་ཞིག་ཀྱང་ཡིན་པས་སྔོན་ཚུད་ནས་ཞིབ་ཚགས་རྟོག་ཞིབ་གཟབ་ནན་དགོས་པ་ཡིན། ལས་གཞི་འདིའི་ཁོངས་སུ་ཞུགས་མིན་རང་མོས་ཡིན་ཡང། གལ་ཏེ་སྨན་བཅོས་ལྟ་སྐྱོང་ལས་གཞིའི་ཁོངས་སུ་ཞུགས་བློ་མེད་རིགས་ལ་ ༢༠༡༡ ཟླ་ ༡༠ ཚེས་ ༡ ནས་ད་ཡོད་ཛ་དྲག་སྨན་བཅོས་མཐུན་འགྱུར་ཡང་འཐོབ་རྒྱུ་མིན། སྨན་བཅོས་ལྟ་སྐྱོང་ལས་གཞི་འདིའི་ཁོངས་ནང་མི་ལྔ་ཅན་བར་གྱི་ཁྱིམ་ཚང་ཞིག་ལ་གཞི་རིམ་གཉིས་པ་དང་གསུམ་པའི་སྨན་བཅོས་འགྲོ་གྲོན་ཆེད་ལོ་རེར་མཐོ་ཚད་སྒོར་འབུམ་གཅིག་བར་འཐོབ་རྒྱུ་ཡོད་པ་དང་། དེ་ལ་ཕན་པར་ནང་མི་ལྔ་ཅན་བར་གྱི་ཁྱིམ་དུད་རང་ངོས་ནས་ལོ་རེར་བསྡུ་ཆ་སྒོར་ ༣.༥༦༥།༠༠ ལས་འབུལ་དགོས་མེད། ཞིབ་ཆའི་ལས་རིམ་འགྲོ་སྟངས་རིམ་པས་མང་ཚོགས་ལ་ལམ་སྟོན་དང་གསལ་བསྒྲགས་ཡོང་རྒྱུ་བཅས་ཀྱི་གསར་འགོད་གསལ་བསྒྲགས་སུ།
བོད་གཞུང་འཕྲོད་བསྟེན་ལས་ཁུངས་ནས་ཕྱི་ལོ་ ༢༠༡༡ ཟླ་ ༣ ཚེས་ ༩ ལ་སྤེལ་ཞེས་སྒྲོགས་སྦྱང་གནང་རྗེས་གསར་འགོད་པའི་དོགས་འདྲི་ཁག་ལ་བཀའ་བློན་མཆོག་གིས་ལན་འདེབས་དང་གསལ་བཤད་གནང་ཡོད་པ་བཅས། །
